آرٹس کونسل آف پاکستان کراچی اور آرٹس کونسل لاڑکانو کے مشترکہ تعاون سے 10روزہ ”سندھ تھیٹر فیسٹیول لاڑکانہ2025ع“ کا شاندار افتتاح
جو کام ہمیں کرنا چاہیے وہ آرٹس کونسل کراچی کررہا ہے،کمشنر لاڑکانہ طاہر سانگی
محمد احمد شاہ چاہتے ہیں سندھ میں ثقافتی ماحول بنے،ڈاکٹر ایوب شیخ
لاڑکانہ ( ) آرٹس کونسل آف پاکستان کراچی اور آرٹس کونسل لاڑکانو کے مشترکہ تعاون سے 10روزہ ”سندھ تھیٹر فیسٹیول لاڑکانہ2025ع“ کا شاندار افتتاح آرٹس کونسل لاڑکانو میں کیا گیا جس کے مہمانِ خصوصی کمشنر لاڑکانہ طاہر سانگی تھے، فیسٹیول میں آرٹس کونسل آف پاکستان کراچی کی لوک ورثہ کمیٹی کے چیئرمین ڈاکٹر ایوب شیخ، میوزک کمیٹی کے چیئرمین امجد حسین شاہ شریک تھے جبکہ صدر آرٹس کونسل لاڑکانو اسماعیل جتوئی، سیکریٹری حنیف سہاگ سمیت تھیٹر اور شوبز سے وابستہ شخصیات کے علاوہ لاڑکانہ کی عوام نے بڑی تعداد میں شرکت کی، افتتاحی تقریب سے خطاب کرتے ہوئے کاؤنسل کے چیئرمین کمشنر لاڑکانہ طاہر سانگی نے کہاکہ جو کام ہمیں کرنا چاہیے وہ آرٹس کونسل کراچی کررہا ہے، اس فنکشن کے بعد میں آپ کے درمیان رہوں گا اور ایک بالکل بدلہ ہوا انسان دکھائی دوں گا، مجھے پتا ہے ثقافتی روابط کیا ہوتے ہیں ، ثقافتی تعلقات کے ذریعے بہت سی برائیاں ختم کی جاسکتی ہیں، آرٹس کونسل آف پاکستان کراچی کی لوک ورثہ کمیٹی کے چیئرمین ڈاکٹر ایوب شیخ نے کہاکہ آرٹس کونسل آف پاکستان کراچی کے صدر محمد احمد شاہ پورے سندھ کی آرٹس کونسلز کو فعال کررہے ہیں، اس ضمن میں سندھ بھر کی آرٹس کونسل میں تھیٹر فیسٹیول، میوزک فیسٹیول اور دیگر ثقافتی تقریبات کو آرٹس کونسل آف پاکستان کراچی کی جانب سے مالی تعاون دیا جارہا ہے، احمد شاہ کا وژن ہے 
کہ تمام فنکاروں کی نیٹ ورکنگ ہو اور سندھ میں ثقافتی ماحول بنے، سندھ تھیٹر فیسٹیول کے پہلے روز نشے کی وباءپر مبنی واجد آزاد کا اصلاحی ڈرامہ ”عشق فشق“ پیش کیا جس میں فنکاروں کی شاندار کارکردگی کو شائقین کی جانب سے خوب سراہا گیا، ڈرامہ میں دکھایا گیا کہ کس طرح نشے کی وباءنوجوان نسل کو تباہ کررہی ہے، تقریب کے اختتام پر ڈاکٹر ایوب شیخ نے آرٹس کونسل آف پاکستان کراچی کی جانب سے تھیٹر ڈائریکٹرز میں چیک تقسیم کیے گئے،آرٹس کونسل لاڑکانو میں 22جون تک روزانہ شام ساڑھے آٹھ بجے تھیٹر ڈرامہ پیش کیا جائے گا جس میں امجد ابڑو کا ”ڈیوڑھی“، کاتیء کونھے ڈوھ، (اُفق بشیر چنا)، تھانو سیانو(سلیم عباسی)، تاریکی جو راستو(رفیق ابڑو)، بھالا رے بھاگ (ایوب گاد)، واہ جو بے وَس(اسد کھوکھر)، آس نراس اور آخری روز لونگ شیخ کا ڈرامہ قیدیانی شامل ہے۔
