فنی تعلیم کو صنعتوں سے جوڑنے کا وقت آ گیا ہے، جنید نقی
انٹر پرینیور شپ کو نصاب کا حصہ بنانا وقت کی اہم ضرورت، صدر کاٹی
ٹیکنیکل اداروں کو پبلک پرائیوٹ پارٹنر شپ کے تحت فروغ دینے کیلئے کوشاں ہیں ،مینیجنگ ڈائریکٹر اسٹیوٹا
کراچی ( ) کورنگی ایسوی ایشن آف ٹریڈ اینڈ انڈسٹری (کاٹی) کے صدر جنید نقی نے کہا کہ بدقسمتی سے موجودہ فنی تعلیم کا نصاب صنعتی ضروریات سے ہم آہنگ نہیں۔صنعتی شعبے کی ترقی کا دارومدار ہنر مند اور تربیت یافتہ افرادی قوت پر ہے۔ یہ بات انہوں نے سندھ ٹیکنیکل ایجوکیشن اینڈ ووکیشنل ٹریننگ اتھارٹی (اسٹیوٹا) کے منیجنگ ڈائریکٹر طارق منظورکی وفد کے ہمراہ کاٹی آمدپر کہی۔صدر کاٹی نے مزید کہا کہ انٹر پرینیور شپ کو نصاب کا حصہ بنانا وقت کی اہم ضرورت ہے تاکہ نوجوان ملازمت کے انتظار کے بجائے اپنا روزگار خود پیدا کریں۔ فنی تعلیم کا اصل مقصد صرف روزگار نہیں بلکہ نوجوانوں کی خودمختاری ہے۔انہوں نے کہا کہ اسٹیوٹا اگر کاٹی اور دیگر صنعتی اداروں سے اشتراک کرے تو جدید تقاضوں کی ہم آہنگی سے بہترین ہنر مند افراد مہیا کرسکتے ہیں۔صدر کاٹی نے تجویز دی کہ اسٹیوٹا تمام شعبوں کے نصاب کو انڈسٹری کی سفارشات کی روشنی میں از سر نو ترتیب دے اور ہر صنعتی زون میں کم از کم ایک مرکزِ ہنر (Skill Hub) قائم کیا جائے۔ سندھ ٹیکنیکل ایجوکیشن اینڈ ووکیشنل ٹریننگ اتھارٹی (اسٹیوٹا) کے منیجنگ ڈائریکٹر طارق منظور نے کاٹی کے صنعتکاروں سے خطاب کے دوران کہا کہ ہماری ترجیح یہ ہے کہ نوجوانوں کو صرف ہنر نہ سکھایا جائے بلکہ انہیں بااختیار اور خود مختار بھی بنایا جائے۔ اسٹیوٹا اب فنی تعلیم کو صنعتوں کے تقاضوں کے مطابق ڈھالنے کے لیے پرائیویٹ سیکٹر سے مسلسل مشاورت کرے گا۔ ہم چاہتے ہیں کہ ہر اسٹیوٹا ادارہ، صنعت کے ساتھ جڑا ہو ،تاکہ سیکھنے والا طالبعلم صرف سند کے بجائے مہارت لے کر نکلے اور فوری روزگار حاصل کرے، یا اپنا کاروبار شروع کرے۔انہوں نے پبلک پرائیوٹ پارٹنر شپ کی اہمیت پر زور دیتے ہوئے کہا کہ ٹیکنیکل اداروں کو زیادہ سے زیادہ پبلک پرائیوٹ پارٹنر شپ کے تحت فروغ دینے کے لئے کوشاں ہیں ۔ کاٹی کی قائمہ کمیٹی برائے ٹیکنیکل ایجوکیشن اور ووکیشنل ٹریننگ سلیم الدین نے کہا کہ کورنگی صنعتی علاقے اور دیگر صنعتی ذون میں زیادہ سے زیادہ تعلیمی اداروں کو اسٹیوٹا کے تحت ماڈل انسٹیٹیوٹس سے جوڑنے کی اشد ضرورت ہے۔اس موقع پر سینئر نائب صدر اعجاز شیخ، احتشام الدین، ماہین سلمان اورکاٹی کے دیگر ممبران نے بھی فنی اداروں میں تربیت کے معیاراور انسٹرکٹرز کی تربیت پر بھی توجہ دینے کی ضرورت پر زور دیا۔ملاقات میں سندھ میں فنی تعلیم، ہنر مند افرادی قوت، انٹرن شپ، اور کاروباری مواقعوں کے فروغ کے حوالے سے تفصیلی گفتگو کی گئی۔
فوٹو کیپشن: کاٹی کے صدر جنید نقی اسٹیوٹاکے منیجنگ ڈائریکٹر طارق منظور کو گلدستہ پیش کررہے ہیں۔اعجاز احمد شیخ، سید طارق حسین، سلیم الدین، احتشام الدین بھی موجود ہیں۔
