لوزرن (عمران مزمل کی خصوصی رپورٹ ) —
سوئٹزرلینڈ کے خوبصورت شہر لوزرن میں پاکستان سوئس سوسائٹی کی جانب سے عید الاضحیٰ کے پرمسرت موقع پر ایک شاندار عید ملن پارٹی کا اہتمام کیا گیا، جس میں پاکستانی فیملیز کے علاوہ مختلف ممالک سے تعلق رکھنے والی غیر ملکی خواتین نے بھی بھرپور شرکت کی۔
تقریب کا ماحول انتہائی خوشگوار اور خوشیوں سے بھرپور رہا۔ شرکاء نے روایتی انداز میں ایک دوسرے سے گلے مل کر عید کی مبارکباد دی اور محبت، اخوت اور اتحاد کا عملی مظاہرہ کیا۔
محفل میں چار چاند تب لگے جب ایک مقامی سنگر نے اپنی سریلی آواز کا جادو جگایا۔ ان کے گیتوں نے حاضرین کو خوب محظوظ کیا اور حاضرین نے دل کھول کر داد دی۔
عید کے موقع پر پاکستانی پکوان کی موجودگی تقریب کا لازمی حصہ ہوتی ہے۔ اسی روایت کو برقرار رکھتے ہوئے عید ملن پارٹی میں لذیذ اور روایتی کھانے جیسے بریانی، کباب، حلوہ، اور دیگر ذائقے دار کھانے پیش کیے گئے جنہیں شرکاء نے خوب انجوائے کیا۔
تقریب کا اہم مقصد نوجوان نسل اور بچوں کو عید قربان کے پیغام اور اسلامی تہذیب و روایات سے روشناس کروانا تھا۔ مقررین نے عید قربان کی فضیلت، حضرت ابراہیمؑ کی قربانی اور اس عظیم واقعے کی اسلامی تاریخ میں اہمیت پر روشنی ڈالی۔ بچوں اور نوجوانوں کو بتایا گیا کہ یہ تہوار صرف خوشی کا موقع نہیں بلکہ اللہ کی رضا اور قربانی کے جذبے کی علامت ہے۔
پاکستان سوئس سوسائٹی کی اس کامیاب تقریب کو شرکاء نے سراہا اور اس امید کا اظہار کیا کہ مستقبل میں بھی ایسے ثقافتی و مذہبی پروگرام تسلسل سے منعقد کیے جاتے رہیں گے تاکہ ہماری نئی نسل اپنی اسلامی اقدار اور پاکستانی ثقافت سے جڑی رہے۔
عید مبارک!
