ڈی جی سندھ انوارمنٹل ایجنسی وقار حسین پھلپوٹو شیخ الجامعہ ڈاکٹر نعمان احمد سے شیلڈ وصول کررہے ہیں، موقعے پر چیئرمین شعبہ فزکس ڈاکٹر عرفان احمد بھی موجود ہیں
کرۀ ارض کی ڈائیورسٹی کو تباہی سے بچانا ہے،ڈاکٹر نعمان احمد
حیاتیاتی تنوع میں انجینئرز بھی اپنا کردار ادا کریں،وقار پھلپوٹو
جامعہ این ای ڈی کے شعبہ فزکس میں سندھ انوارمنٹل پروٹیکشن ایجنسی کے اشتراک سے ورلڈ بائیو ڈائیورسٹی دن کی مناسبت سے سیمینار منعقد کیا گیا
کراچی() جامعہ این ای ڈی میں سندھ انوارمنٹل پروٹیکشن ایجنسی کے اشتراک سے ورلڈ بائیو ڈائیورسٹی دن کی مناسبت سے سیمینار منعقد کیا گیا جس کی صدارت قائم مقام شیخ الجامعہ این ای ڈی پروفیسر ڈاکٹر نعمان احمد کی۔ اس موقعے پر این ای ڈی قائم مقام وائس چانسلر ڈاکٹر نعمان احمد نے تقریر کرتے ہوۓ کہا کہ کسی مثبت تبدیلی کے لیے شعور اُجاگر کرنا بھی اتنا ہی اہم ہے جتنا اس پر عمل کرنا، یہ سیمینار اسی سلسلے کی کڑی ہے۔انہوں نے زُور دیا کہ نیچر بیلنس سسٹم کو خراب نہ کریں۔اس موقعے پر خطاب کرتے ہوۓ ڈی جی سندھ انوارمنٹل پروٹیکیشن ایجنسی وقار حسین پھلپوٹو کا کہنا تھا کہ فرد معاشرے کا حصّہ ہوتے ہیں، ہم سب کو اپنے اپنے طور ماحول کو بہتر بنانے، ذرائع کے بے دریغ استعمال سے گریز اور ماحول کی بہتری کے اقدامات کرنے ہوں گے۔ انہوں نے مزید زُور دیا کہ اگر ہم نے اس بات کو ذہن نشین کرلیا کہ اس کرۀ ارض کی ڈائیورسٹی کو تباہ ہونے سے بچانا ہے تو یہ کامیابی حاصل کرنے کی طرف پہلا قدم ہوگا۔ ان کا مزید کہنا تھا کہ حیاتیاتی تنوع میں انجینئرز کو بھی اپنا کردار ادا کرنا چاہیے۔ مزید انہوں نے خواتین انجینئرز کو مخاطب کرتے ہوۓ کہاکہ وہ اس سلسلے میں اپنا کردار ادا کرتےہوۓ اپنے گھر بھر کے افراد کو بائیو ڈائیورسٹی سے متعلق آگہی پہنچائیں۔ تفصیلات کے مطابق این ای ڈی یونیورسٹی آف انجینئرنگ اینڈ ٹیکنالوجی کے شعبہ فزکس کی زیرِ اہتمام اشرف حبیب اللہ اے وی ہال میں ورلڈ بائیو ڈائی ورسٹی ڈے پر آگہی سیمینار کا باقاعدہ آغاز قاری اسامہ نے تلاوت کلام الہی سے کیا۔ اس سیمینار میں جانوروں کے اسپیشز کو اے آئی کے ذریعے محفوظ بنانے سے متعلق پریزنٹیشن دی گئی جب کہ اس موقعے پر سیمینار میں نیچر سے متعلق مختلف نظریات کو بھی اُجاگر کیا گیا۔ اس سیمینار میں مینگروز اور ہمالیہ رینچ سے متعلق معلومات بھی فراہم کی گئی۔ سیمینار سے ڈاکٹر عرفان احمد، ڈاکٹر عمران اسلم، ڈاکٹر حرا مریم، عمران صابر اور وارث علی گبول نے بھی خطاب کیا اور بائیو ڈائی ورسٹی کے عنوان پر روشنی ڈالی۔
