پاکستان نے دشمن سے جنگ جیت لی، اب معیشت کی جنگ جیتنے کا وقت ہے، احمد عظیم علوی
اللہ کی نصرت، عوام کی دعائیں اور پاک فوج کی قربانیاں فتح کی ضامن بنی،صدر سائٹ ایسوسی ایشن آف انڈسٹری
حکومت بزنس کمیونٹی پر اعتماد کرے،ٹیکس بوجھ کم کرے، ون ونڈو سسٹم متعارف کروائے،احمد عظیم علوی کی وزیراعظم شہباز شریف سے اپیل
سائٹ ایسوسی ایشن آف انڈسٹری کراچی کے صدر احمد عظیم علوی نے کہا ہے کہ اللہ تعالیٰ کے حضور سجدہ شکر بجا لاتے ہیں کہ اس نے پاکستان کو دشمنوں کے خلاف فتح عطا فرمائی۔ ہماری تعداد کم ہونے کے باوجود اللہ کی مدد اور عوام کی دعاؤں سے پاک فوج نے دشمن کو شکست فاش دی۔پاک فوج کے شیر دل جوانوں نے دشمن کو نیست و نابود کیا۔
انہوں نے کہا کہ اب معیشت کی جنگ جیتنے کا وقت ہے۔ ہم اقتصادی محاذ پر اپنی توجہ مرکوز کریں۔ انہوں نے حکومتِ پاکستان اور متعلقہ حکام سے اپیل کی کہ وہ بزنس کمیونٹی کو فیصلوں میں شامل کریں تاکہ ترقی کے عمل کو تیز کیا جا سکے۔
احمد عظیم علوی کہا کہ بزنس کمیونٹی پر زائد ٹیکسز اور ایف بی آر کے نمائندوں کے دباؤ سے اجتناب کیا جائے اور ون ونڈو آپریشن کی جانب بڑھا جائے۔ صنعتکاروں اور تاجروں کو ایک واضح اور آسان نظام فراہم کیا جائے جس کے تحت وہ اپنے بینک اکاؤنٹس کے ذریعے براہ راست ٹیکس ادا کریں تاکہ کرپشن کا خاتمہ ممکن ہو۔
انہوں نے وزیراعظم شہباز شریف سے اپیل کی کہ وہ ایسے فیصلے کریں جو بزنس فرینڈلی ہوں۔ شہباز شریف ایک کاروباری پس منظر رکھتے ہیں اور کاروباری طبقے کی مشکلات سے بخوبی واقف ہیں۔ ہمیں امید ہے کہ وہ بزنس کمیونٹی کو ریلیف فراہم کریں گےاور ایف بی آر سمیت دیگر محکموں کی ہراسانی سے بزنس طبقے کو نجات دلائیں گے۔بزنس کمیونٹی صرف ایک بات پر توجہ دینا چاہتی ہےکہ کاروبار کیسے بڑھایا جائے، روزگار کیسے پیدا ہو اور زرمبادلہ کیسے ملک میں لایا جائے۔
انہوں نے عزم ظاہر کیا کہ جیسے ہم نے جنگی میدان میں دشمن کو شکست دی ویسے ہی ہم معاشی میدان میں بھی کامیاب ہوں گے۔انشاءاللہ پاکستان کو ایک مضبوط اقتصادی طاقت بنائیں گے۔
