انٹرمیڈیٹ کے امتحانات 2 روز کے لیے ملتوی
پنجاب بھر میں ہونے والے انٹرمیڈیٹ کے امتحانات 2 روز کے لیے ملتوی کردیے گئے۔
وزیر تعلیم پنجاب رانا سکندر حیات کا کہنا ہے کہ جمعہ اور ہفتہ کو ہونے والے پریکٹیکل بھی ملتوی کردیے گئے ہیں، ملتوی ہونے والے امتحانات اور پریکتیکل کا نیا شیڈول جلد جاری ہوگا۔
انہوں نے بتایا کہ او لیول، اے لیول کے امتحانات شیڈول کے مطابق ہوں گے۔
اس سے قبل وزیر تعلیم پنجاب رانا سکندر حیات نے اپنے ایک بیان میں کہا تھا کہ تمام تعلیمی ادارے بروز جمعہ اور ہفتہ بند رہیں گے۔
ان کا کہنا تھا کہ تمام نجی و سرکاری تعلیمی ادارے 9 اور 10 مئی کو بند رکھے جائیں گے، چھٹیوں کے احکامات تمام اسکول، کالجز اور یونیورسٹیوں کے لیے ہیں۔
یہ پڑھیں: پاک بھارت کشیدگی: تعلیمی ادارے بند رکھنے کا اعلان
صوبائی وزیر نے کہا تھا کہ پنجاب بھر کے اسکول، کالج اور یونیورسٹیاں اتوار تک بند رہیں گی، پیر 12 مئی سے تدریسی عمل معمول کے مطابق شروع ہوگا۔
واضح رہے کہ بھارت نے پاکستان میں دوبارہ دراندازی کی کوشش کی ہے، پاک فوج نے بھارتی ڈرونز گراکر ایک بار پھر بھارت کو منہ توڑ جواب دیا۔
7 اور 8 مئی کی رات سے پاکستان کے مختلف شہروں میں بھارت کے اسرائیلی ساختہ ہیراپ ڈرونز حملہ آور ہوئے جو افواج پاکستان نے گرا دیئے اور کچھ گر کر تباہ ہوگئے۔
لاہور میں بھارت کے چار ڈرونز گرائے گئے، اس دوران پاک فوج کے چار جوان زخمی ہوئے، والٹن ائیرپورٹ پر تین جبکہ برکی روڈ پر ایک ڈرون کو نشانہ بنا کر تباہ کیا گیا۔
=============================
پاک بھارت کشیدگی، پاکستان اسٹاک ایکسچینج میں خوفناک مندی، 2 دنوں میں مارکیٹ میں تقریباً 10 ہزار پوائنٹس کی مندی، سرمایہ کاروں کو کھربوں روپے ڈوب گئے۔ تفصیلات کے مطابق پاک بھارت کشیدگی کے باعث پاکستان سٹاک ایکسچینج مثبت سے اچانک منفی زون میں چلی گئی، انڈیکس میں 7 ہزار سے زائد پوائنٹس کی کمی ریکارڈ کی گئی ہے۔
کاروباری ہفتے کے چوتھے روز کاروبار کے آغاز پر سٹاک مارکیٹ میں زبردست تیزی دیکھی گئی، 1800 سے زائد پوائنٹس کے اضافے کے ساتھ پاکستان سٹاک ایکسچینج میں ہنڈرڈ انڈیکس ایک لاکھ 11 ہزار 881 پوائنٹس کی حد کو چھو گیا۔ بعدازاں ٹریڈنگ کے دوران سٹاک مارکیٹ مثبت سے منفی زون میں داخل ہوگئی، 7516 پوائنٹس کی کمی کے ساتھ ہنڈرڈ انڈیکس ایک لاکھ 2 ہزار 492پوائنٹس کی سطح پر آگیا۔
پاکستان سٹاک ایکسچینج میں بڑی نوعیت کی مندی کی وجہ سے ٹریڈنگ کو عارضی وقت کیلئے روک دیا گیا۔ مارکیٹ ذرائع کے مطابق سٹاک ٹریڈنگ کو 5 فیصد سے زائد کمی کی وجہ سے ریگولیشنز کے تحت ایک گھنٹے کیلئے روکا گیا، انڈیکس 6948 پوائنٹس گھٹ کر ایک لاکھ 3ہزار 60 پوائنٹس کی سطح پر معطل رہا، سٹاک ایکسچینج انتظامیہ نے ٹریڈنگ کے عارضی معطلی کا نوٹیفکیشن بھی جاری کیا۔
تاہم کاروباری روز کے اختتام پر ہنڈرڈ انڈیکس 6482 پوائنٹس کی کمی کیساتھ ایک لاکھ 3 ہزار 526 پوائنٹس کی سطح پر بند ہوا۔ واضح رہے کہ گزشتہ کاروباری دن کے اختتام پر پاکستان سٹاک مارکیٹ میں ہنڈرڈ انڈیکس 3559 پوائنٹس کی کمی کے ساتھ ایک لاکھ 10 ہزار 9 پوائنٹس کی سطح پر بند ہوا تھا۔ سٹاک مارکیٹ میں آج 29 ارب 28 کروڑ 9 لاکھ 70 ہزار 581 روپے مالیت کے 30 کروڑ 80 لاکھ 31 ہزار 81 شیئرز کا لین دین ہوا۔
===========================
ڈائریکٹر جنرل (ڈی جی) انٹر سروسز پبلک ریلیشنز (آئی ایس پی آر) لیفٹننٹ جنرل احمد شریف چوہدری کا کہنا ہے کہ پاکستان جب مارے گا تب پوری دنیا جان جائے گی۔
اسلام آباد میں نائب وزیراعظم و وزیر خارجہ اسحاق ڈار اور ڈی جی آئی ایس پی آر نے مشترکہ پریس کانفرنس کی ۔
وزیر خارجہ اسحاق ڈار کا کہنا ہے کہ پاکستان نے بھارتی پنجاب میں کسی بھی شہری علاقے میں کارروائی نہیں کی، ایک ذمہ دار ملک کے طور پر پاکستان نے ہر ممکن اسٹریٹیجک احتیاط کا مظاہرہ کیا ہے۔
اسحاق ڈار نے کہا کہ پاکستان بھارتی جارحیت کا اپنے طے کردہ وقت اور مقام پر جواب دینے کا حق محفوظ رکھتا ہے، بھارتی ڈرونز نے لاہور میں فوجی تنصیب کو نشانہ بنانے کی کوشش کی، بھارت نے کوئی ایڈونچر کیا تو ہماری آرمی، نیوی اور فضائیہ الرٹ ہیں۔
وزیر خارجہ اسحاق ڈار نے کہا کہ بھارت کے کئی ڈرونز نے پاکستان کی حدود کی خلاف ورزی کی، بھارت کے ڈرون نے لاہور میں فوجی تنصیب کو نشانہ بنانے کی کوشش کی، پاکستان کی مسلح افواج نے بھارت کے 5 جنگی طیاروں کو گرایا۔
