انسداد پولیو مہم کے چوتھے دن کی کارکردگی کا جائزہ لینے کے لیے اجلاس

خبرنامہ نمبر 2871/2025
کوئٹہ 25 اپریل۔ ڈپٹی کمشنر کوئٹہ لیفٹننٹ (ر) سعد بن اسد کی زیر صدارت انسداد پولیو مہم کے چوتھے دن کی کارکردگی کا جائزہ لینے کے لیے اجلاس منعقد ہوا۔ اجلاس میں اسسٹنٹ کمشنر سٹی، اسسٹنٹ کمشنر صدر، اور اسسٹنٹ کمشنر کچلاک سمیت ڈسٹرکٹ ہیلتھ آفیسر (ڈی ایچ او) کوئٹہ، پی پی ایچ آئی، ای پی آئی اسٹاف، تمام یونین کونسلز کے سینیئر میڈیکل آفیسرز (SMOs)، اور لاءاینڈ آرڈر ڈپارٹمنٹ کے نمائندوں نے شرکت کی۔اجلاس میں پولیو مہم کے چوتھے دن کی سرگرمیوں کا تفصیلی جائزہ لیا گیا۔ زیرو ڈوز کیسز، والدین کی جانب سے انکار (Refusals)، اور مجموعی کوریج سمیت تمام پہلووں پر غور کیا گیا۔ڈپٹی کمشنر کوئٹہ نے مہم کی مجموعی کارکردگی پر اطمینان کا اظہار کیا اور کہا کہ ضلعی انتظامیہ عوامی صحت کے اس قومی فریضے کو کامیاب بنانے میں بھرپور کردار ادا کر رہی ہے۔ انہوں نے تمام اسسٹنٹ کمشنرز کو ہدایت کی کہ وہ فیلڈ میں موجود ٹیموں سے قریبی رابطہ رکھیں اور مہم کے ہر مرحلے میں مکمل تعاون یقینی بنائیں۔ڈپٹی کمشنر نے والدین، علما کرام، قبائلی عمائدین اور سماجی رہنماوں سے اپیل کی کہ وہ بچوں کو پولیو جیسے مہلک مرض سے محفوظ رکھنے کے لیے مہم میں مکمل تعاون کریں۔انہوں نے مزید کہا کہ پولیو کا خاتمہ صرف حکومتی کوششوں سے ممکن نہیں، بلکہ عوامی شعور اور اجتماعی کاوشوں سے ہی اس موذی مرض کو جڑ سے ختم کیا جا سکتا ہے۔
﴾﴿﴾﴿﴾﴿

خبرنامہ نمبر 2872/2025
پنجگور 25 اپریل۔گورنمنٹ گرلز انٹر کالج تسپ کے پرنسپل، مشتاق احمد گچکی نے زرعی کالج میں پلانٹ بریڈنگ ڈیپارٹمنٹ اور کالج لیب کی افتتاحی تقریب سے خطاب کرتے ہوئے کہا کہ یہ اقدامات طلبہ کے روشن مستقبل کی طرف ایک اہم پیش رفت ہیں ان کا کہنا تھا کہ زرعی تعلیم کے فروغ سے نہ صرف طلبہ کو جدید سائنسی تحقیق سے آشنا کیا جائے گا بلکہ علاقائی زرعی ترقی میں بھی اہم کردار ادا کیا جا سکے گا۔ پلانٹ بریڈنگ ڈیپارٹمنٹ اور جدید لیبارٹری کا قیام نوجوانوں کو تحقیقی مہارتیں سکھانے اور عملی میدان میں آگے بڑھنے کے نئے مواقع فراہم کرے گا انہوں نے کہاکہ تعلیمی ادارے صرف نصاب کی تدریس تک محدود نہیں ہونے چاہییں، بلکہ انہیں تحقیق، اختراع اور طلبہ کی مجموعی استعداد بڑھانے کا مرکز بننا چاہیے۔ انہوں نے حکومت اور متعلقہ اداروں سے مطالبہ کیا کہ بلوچستان میں زرعی تعلیم کے فروغ کے لیے مزید اقدامات کیے جائیں تاکہ مقامی سطح پر خود کفالت کی راہ ہموار ہو سکے۔
﴾﴿﴾﴿﴾﴿
خبرنامہ نمبر 2873/2025
تربت 25 اپریل۔ :چیئرمین میونسپل کارپوریشن بلخ شیر قاضی کی ہدایت پر اور چیف آفیسر شعیب ناصر کی نگرانی میں میونسپل کارپوریشن نے مچھر مار اسپرے مہم کا آغاز کر دیا۔ مہم کا مقصد مچھروں کی افزائش روک کر شہریوں کو ڈینگی، ملیریا اور دیگر بیماریوں سے محفوظ رکھنا ہے اس سلسلے میں ابتدائی مرحلے میں سلالہ بازار، سنگانی سر اور تربت سٹی میں اسپرے کیا گیا، جہاں گلیوں اور نالیوں پر خاص توجہ دی گئی اسپرے میں جدید اور محفوظ کیمیکل استعمال ہو رہے ہیں، اور مہم کو مرحلہ وار پورے شہر تک وسعت دی جائے گی شہریوں نے اس اقدام کو خوش آئند قرار دیتے ہوئے مہم کو مستقل جاری رکھنے کا مطالبہ کیا ہے۔ میونسپل کارپوریشن نے عوام سے صفائی ستھرائی اور پانی جمع نہ ہونے دینے کی اپیل کی ہے تاکہ مچھر کی افزائش روکی جا سکے۔
﴾﴿﴾﴿﴾﴿
خبرنامہ نمبر 2874/2025
پنجگور 25 اپریل۔پنجگور زرعی کالج میں پلانٹ بریڈنگ ڈیپارٹمنٹ اور جدید لیبارٹری کا افتتاح تقریب منعقد ھوا یونیورسٹی آف مکران وائس چانسلر ڈاکٹر ممتاز احمد بلوچ نے پلانٹ بریڈنگ ڈیپارٹمنٹ اور جدید لیبارٹری کا افتتاح کیا تقریب میں پرنسپل لطف اللہ بلوچ، وائس پرنسپل شفیق الرحمان خلیل، پرنسپل انٹر کالج تسپ مشتاق احمد گچکی، پروفیسر محمد یونس ملازئی، ڈاکٹر شاہ بانو بلوچ، عطائ مہر اور دیگر اساتذہ کرام اور
یونیورسٹی کے طلبا و طالبات نے شرکت کی تقریب سے خطاب کرتے ہوئے یونیورسٹی کے وائس چانسلر نے کہا کہ جدید تحقیق اور تعلیم وقت کی اہم ضرورت ہے، اور زرعی کالج نوجوانوں کے لیے گھر کی دہلیز پر تعلیمی مواقع فراہم کر رہا ہے۔ انہوں نے کہا کہ بلوچستان کی معیشت زراعت سے جڑی ہوئی ہے، اور طلباء کو چاہیے کہ وہ محنت اور تحقیق کے ذریعے اس شعبے کو ترقی دیں تقریب سے مقررین نے خطاب کرتے ہوئے کہا کہ فیکلٹی کی کمی کا ذکر کرتے ہوئے بتایا کہ دستیاب وسائل میں رہتے ہوئے 13 لیکچرار کنٹریکٹ پر تعینات کیے گئے ہیں، جبکہ طلباءم پر وائس چانسلر نے پلانٹ بریڈنگ ڈیپارٹمنٹ کے دو ہونہار طلبائ ، عبدالرحمن اور عطیع اللہ کو 10،000 روپے فی کس انعام سے نوازا ہے۔
﴾﴿﴾﴿﴾﴿
خبرنامہ نمبر 2875/2025
تربت 25 اپریل۔ :ڈپٹی کمشنر کیچ بشیر احمد بڑیچ کی خصوصی ہدایت پر لیویز ہیڈکوارٹر تربت کے انچارج رسالدار عبدالسلام بلوچ کی قیادت میں لیویز فورس نے کلاتک اور ڈبک کے علاقوں میں کامیاب آپریشن کیا۔ کارروائی کے دوران دو منشیات فروشوں کو گرفتار کر لیا گیا، جب کہ متعدد منشیات کے عادی افراد کو بھی حراست میں لے کر بحالی کے مراکز منتقل کرنے کے اقدامات جاری ہیں۔ڈپٹی کمشنر بشیر احمد بڑیچ نے کامیاب کارروائی پر لیویز فورس کو خراجِ تحسین پیش کرتے ہوئے کہا کہ منشیات کی لعنت سے ضلع کیچ کو پاک کرنا انتظامیہ کی اولین ترجیح ہے۔ انہوں نے کہا کہ اس مقصد کے لیے بلا تفریق کارروائیاں جاری رہیں گی، اور نوجوان نسل کو منشیات سے بچانے کے لیے ہر ممکن اقدامات اٹھائے جائیں گے۔ڈی سی کیچ نے عوام سے اپیل کی کہ وہ منشیات فروشوں کی نشاندہی میں انتظامیہ کے ساتھ تعاون کریں۔ انہوں نے یقین دلایا کہ اطلاع دینے والے افراد کا نام مکمل رازداری میں رکھا جائے گا۔رسالدار عبدالسلام بلوچ نے بھی اپنے عزم کا اظہار کرتے ہوئے کہا کہ لیویز فورس منشیات کے خلاف بلاامتیاز آپریشن جاری رکھے گی اور ڈپٹی کمشنر بشیر احمد بڑیچ کی قیادت میں جرائم پیشہ عناصر کے خلاف ہر وقت الرٹ ہے۔
﴾﴿﴾﴿﴾﴿
خبرنامہ نمبر 2876/2025
کوئٹہ 25 اپریل۔ ضلعی انتظامیہ کی ٹیموں نے انسداد پولیو مہم کے دوران مختلف سب ڈویژنز میں انکاری (رفیوزل) بچوں کی کامیابی سے کوریج کی۔ یہ اقدامات پولیو کے مکمل خاتمے کے لیے کیے جا رہے ہیں تاکہ ہر بچہ حفاظتی قطرے حاصل کر سکے۔اس سلسلے میں اسسٹنٹ کمشنر کچلاک نعمت اللہ ترین نے کچلاک کے مختلف علاقوں میں گھر گھر جا کر والدین سے بات چیت کی اور متعدد رفیوزل بچوں کو پولیو کے قطرے پلائے۔اسی طرح اسسٹنٹ کمشنر سٹی عبداللہ بن عارف نے سب ڈویژن سٹی میں فیلڈ ٹیموں کے ہمراہ رفیوزل بچوں کی نشاندہی کر کے ان کو کامیابی سے کور کیا۔ضلعی انتظامیہ کی ٹیموں نے والدین سے براہ راست ملاقاتیں کیں، ان کے تحفظات سنے اور پولیو ویکسین کی اہمیت پر آگاہی دی، جس کے نتیجے میں کئی والدین نے اپنے بچوں کو قطرے پلوانے کی اجازت دی۔تاہم، مہم کے دوران سخت انکار کرنے والے 3 افراد کو قانون کے مطابق حراست میں لیا گیا تاکہ آئندہ عوامی صحت کی اس اہم مہم میں رکاوٹ نہ پیدا ہو۔ضلعی انتظامیہ نے پولیو کے مکمل خاتمے کے عزم کا اعادہ کرتے ہوئے کہا کہ آئندہ بھی ایسے اقدامات جاری رہیں گے تاکہ ہر بچہ صحت مند اور محفوظ مستقبل کی جانب بڑھے۔
﴾﴿﴾﴿﴾﴿
خبرنامہ نمبر 2877/2025
موسی خیل 25 اپریل۔ ہیلتھ ڈیپارٹمنٹ موسیٰ خیل اور بی آر ایس پی کے اشتراک سے ڈسٹرکٹ موسیٰ خیل میں ورلڈ ملیریا ڈے منایا گیا۔اس حوالے سے ایک واک کا بھی انعقاد کیا گیا جس میں ڈی ایچ او موسیٰ خیل غفّار کھیتران۔ بی آر ایس پی کے ڈسٹرکٹ کوارڈینیٹر شفیق جعفر اور لاجسٹکس افسر شفیق موسیٰ خیل پی پی ایچ ائی کے حمید شیخ انڈس ہسپتال کے میل افسر ظہور جعفر پیرا میڈیکل اسٹاف کے روف جعفر سوشل ویلفیئر افسر خان محمّد ڈی ایم یو محمّد اقبال نیوٹریشن افسر شیر باز خان اور عوام کی بڑی تعداد نے شرکت کی۔
﴾﴿﴾﴿﴾﴿

خبرنامہ نمبر2864/2025
کوئٹہ 25اپریل۔ صوبائی وزیر خزانہ میر شعیب نوشیروانی کی زیر صدارت سماجی و سیاسی کمیٹی کا پہلا اجلاس منعقد ہوا۔ اجلاس میں ایڈیشنل سیکرٹری داخلہ زاہد سلیم، سیکرٹری خزانہ عمران زرکون سمیت دیگر اعلیٰ حکام نے شرکت کی۔اجلاس میں نیشنل ایکشن پلان پر عملدرآمد کے سماجی پہلووں پر تفصیلی تبادلہ خیال کیا گیا۔ اس موقع پر ایپیکس کمیٹی کے منظور شدہ نکات کا جامع جائزہ لیا گیا اور مختلف اہم امور زیر غور لائے گئے.اجلاس کے دوران جن نکات پر خصوصی توجہ دی گئی ان میں پیفٹاک کا قیام، جے آر سی اور جے سی پی کے قیام، لاپتہ افراد کا مسئلہ، حوالہ و انڈی کے امور، بلوچستان انٹیگریٹڈ سیکیورٹی آرکیٹیکچر، غیر قانونی افغان شہریوں کی میپنگ و مستقبل کا لائحہ عمل، اور پاک افغان سرحد پر منقسم دیہات کا مسئلہ شامل تھے۔اجلاس میں اس بات پر زور دیا گیا کہ سماجی و سیاسی کمیٹی کا قیام بلوچستان میں پائیدار امن، استحکام اور سماجی ہم آہنگی کے فروغ کے لیے ایک اہم اقدام ہے، جو مقامی سطح پر حکومتی اقدامات کو موثر اور مربوط بنانے میں مددگار ثابت ہوگا۔ علاوہ ازیں، بی آئی ایس اے کے 28 نکات، جن میں تخریب کاری سے متعلق تمام امور شامل ہیں، کا بھی تفصیلی جائزہ لیا گیا تاکہ ایک جامع، موثر اور ہمہ جہتی پالیسی تشکیل دی جا سکے۔ اجلاس کے اختتام پر فیصلہ کیا گیا کہ کمیٹی ہر ماہ باقاعدگی سے اجلاس منعقد کرے گی تاکہ طے شدہ اقدامات پر عملدرآمد کے تسلسل کو یقینی بنایا جا سکے۔
﴾﴿﴾﴿﴾﴿
خبرنامہ نمبر 2865/2025
کوئٹہ 25 اپریل۔ محکمہ خزانہ میں اصلاحات کا سلسلہ کامیابی سے جاری ہے، جس کے تحت ادارے کو جدید خطوط پر استوار کرنے کے لیے اہم اقدامات کیے جا رہے ہیں۔ ایک اور تاریخی قدم کے طور پر ماہرین معیشت اور مالیاتی ماہرین کو مکمل طور پر میرٹ کی بنیاد پر تعینات کیا گیا ہے۔کل آٹھ اعلیٰ تعلیم یافتہ افراد، جن میں پی ایچ ڈی اکنامکس اور فنانس کے حامل اور بین الاقوامی جامعات سے فارغ التحصیل ماہرین شامل ہیں، کو محکمہ خزانہ میں شامل کیا گیا ہے۔ اس اقدام کا مقصد بجٹ سازی میں شفافیت، مالی نظم و نسق کو مضبوط بنانا اور ایک جدید اور عالمی معیار کے مطابق نظم و نسق متعارف کرانا ہے۔ سیکرٹری خزانہ عمران زرکون کی قیادت میں محکمہ خزانہ کو مکمل طور پر میرٹ، شفافیت اور عالمی طرزِ عمل کے مطابق ایک فعال اور ترقی پسند ادارے میں تبدیل کیا جا رہا ہے۔
﴾﴿﴾﴿﴾﴿
خبرنامہ نمبر 2866/2025
کوئٹہ 25 اپریل۔صوبائی وزیر خزانہ میر شعیب نوشیروانی نے قومی سلامتی کمیٹی کے حالیہ فیصلوں پر مکمل اعتماد کا اظہار کرتے ہوئے کہا ہے کہ ملکی سلامتی، خودمختاری اور قومی مفادات کے تحفظ کے لیے کمیٹی کے فیصلے انتہائی اہم اور بروقت ہیں۔ اپنے ایک جاری کردہ بیان میں انہوں نے کہا کہ موجودہ چیلنجز کے تناظر میں قومی یکجہتی اور اداروں کے مابین ہم آہنگی ناگزیر ہے۔ انہوں نے مزید کہا کہ حکومت بلوچستان قومی سلامتی کے ہر فیصلے میں وفاق کے ساتھ کھڑی ہے اور صوبے کے عوام ملک کی سلامتی و استحکام کے لیے ہر قربانی دینے کو تیار ہیں۔
﴾﴿﴾﴿﴾﴿
خبرنامہ نمبر 2867/2025
کوئٹہ:25 اپریل۔ صوبائی مشیر برائے کھیل و امورِ نوجوانان، محترمہ مینا مجید بلوچ نے وزیر اعظم پاکستان میاں محمد شہباز شریف کی زیر صدارت منعقدہ قومی سلامتی کمیٹی (NSC) کے حالیہ اجلاس میں کیے گئے فیصلوں کو سراہتے ہوئے انہیں قومی سلامتی اور خودمختاری کے تحفظ کی جانب اہم اقدام قرار دیا ہے۔ اپنے ایک بیان میں محترمہ مینا مجید بلوچ نے نے کہا کہ NSC نے موجودہ علاقائی اور بین الاقوامی حالات کو مدنظر رکھتے ہوئے جو فیصلے کیے، وہ بالغ نظری، سنجیدگی اور دور اندیشی کا مظہر ہیں۔ انہوں نے کہا کہ بھارت کی جانب سے لگاتار بے بنیاد الزامات اور الزام تراشی کا مقصد خطے میں امن کو سبوتاڑ کرنا اور عالمی توجہ مقبوضہ کشمیر میں ہونے والی انسانی حقوق کی سنگین خلاف ورزیوں سے ہٹانا ہے۔ انہوں نے کہا کہ پاکستان ایک پرامن ملک ہے اور ہمیشہ خطے میں استحکام کا خواہاں رہا ہے، لیکن قومی سلامتی، خودداری اور وقار پر کوئی سمجھوتہ نہیں کیا جا سکتا۔ انکا مزید کہنا تھا کہ اپوزیشن جماعتوں، سول سوسائٹی، میڈیا اور تمام قومی اداروں سے اپیل کی کہ وہ باہمی اختلافات سے بالاتر ہو کر قومی مفادات کے تحفظ کے لیے متحد ہوں۔ یہ وقت ہے کہ ہم اپنی صفوں میں اتحاد پیدا کریں، بیرونی چیلنجز کا مقابلہ قومی یکجہتی سے کریں، اور دنیا کو واضح پیغام دیں کہ پاکستان ایک ذمہ دار ریاست ہے جو اپنے دفاع سے غافل نہیں جبکہ کسی بھی جارحیت کا بھرپور جواب دیا جائے گا اور پوری عوام اپنے فوج کے شانہ بشانہ کھڑی ہو گی۔
﴾﴿﴾﴿﴾﴿
خبرنامہ نمبر2869/2025
تربت 25 اپریل۔ رکن صوبائی اسمبلی ڈاکٹر عبدالمالک بلوچ سے دیہات تربت سے تعلق رکھنے والے ایک نمائندہ عوامی وفد نے ان کی رہائش گاہ پر ملاقات کی ملاقات کا مقصد علاقے میں بڑھتے ہوئے پانی کے بحران، سرکاری واٹر سپلائی کی ناقص حالت اور عوامی مشکلات کو اجاگر کرنا تھا۔وفد نے ڈاکٹر عبدالمالک بلوچ کو تفصیل سے آگاہ کیا کہ دیہات کے مکین شدید پانی کی قلت کا شکار ہیں، متعدد دیہات میں ہفتوں تک پانی دستیاب نہیں ہوتا جبکہ بعض علاقوں میں سرکاری واٹر اسکیمیں مکمل طور پر غیر فعال ہو چکی ہیں۔ عوام کو پینے کے صاف پانی کے لیے دور دراز علاقوں سے پانی لانا پڑتا ہے، جو وقت، محنت اور اخراجات کا باعث بن رہا ہے۔ انہوں نے مطالبہ کیا کہ اس سنگین مسئلے کا فوری اور دیرپا حل نکالا جائے رکن صوبائی اسمبلی ڈاکٹر عبدالمالک بلوچ نے وفد کی شکایات اور تحفظات کو سنجیدگی سے سنا اور کہا کہ پانی کا مسئلہ اب صرف دیہات یا کسی ایک مخصوص علاقے تک محدود نہیں رہا بلکہ یہ ایک صوبائی اور قومی سطح کا بحران بن چکا ہے۔ بلوچستان کے بیشتر علاقوں میں زیر زمین پانی کی سطح تیزی سے نیچے جا رہی ہے، جو ناقص منصوبہ بندی، بارشوں کی کمی، ماحولیاتی تبدیلی اور حکومتی عدم توجہ کا نتیجہ ہے انہوں نے کہا کہ ہمارے پارٹی نے ہمیشہ عوامی مسائل کو ترجیح دی ہے اور آئندہ بھی ایسے مسائل کو سیاسی و سماجی سطح پر اجاگر کرنے میں اپنا بھرپور کردار ادا کرے گی۔ انہوں نے اس عزم کا اظہار کیا کہ دیہات سمیت دیگر متاثرہ علاقوں میں پانی کی فراہمی بہتر بنانے کے لیے وہ نہ صرف متعلقہ اداروں کے ساتھ رابطے میں رہیں گے بلکہ اس مسئلے کو ایوانوں اور میڈیا میں بھی بھرپور انداز میں اٹھائیں گے۔
﴾﴿﴾﴿﴾﴿
خبرنامہ نمبر 2870/2025
گوادر 25 اپریل۔ ضلعی محکمہ صحت اور پی پی ایچ آئی نے این آر ایس پی گوادر کے اشتراک سے GFATM-GC7 پروجیکٹ کے تحت ملیریا کے عالمی دن کے موقع پر ایک بیداری سیشن اور واک کا اہتمام کیا۔ تقریب میں ڈسٹرکٹ ہیلتھ آفیسر گوادر ڈاکٹر عبدالطیف دشتی، ملیریا پروگرام کے DMU انچارج ڈاکٹر عبدالواحد، ڈاکٹر فاروق، پی پی ایچ آئی گوادر کے صابر حیاتان، حبیب کریم بخش سمیت مختلف شعبہ ہائے زندگی سے تعلق رکھنے والے افراد نے شرکت کی۔ملیریا کے عالمی دن، جو ہر سال 25 اپریل کو منایا جاتا ہے، کا مقصد عوام میں اس جان لیوا بیماری سے متعلق شعور و آگاہی پیدا کرنا ہے۔ اس دن کو منانے کا مقصد دنیا کو یہ یاد دہانی کرانا ہے کہ ملیریا ایک مہلک مرض ہے جس سے ہر روز لاکھوں لوگ متاثر ہو رہے ہیں، اور اس کی روک تھام ہم سب کی مشترکہ ذمہ داری ہے۔یاد رہے کہ NRSP گوادر، GFATM-GC7 پروجیکٹ کے تحت محکمہ صحت اور پی پی ایچ آئی کے تعاون سے ملیریا کی تشخیص اور علاج کی ادویات تمام ہیلتھ سینٹرز کو مفت فراہم کر رہا ہے، تاکہ اس بیماری کے خلاف موثر اقدامات کو یقینی بنایا جا سکے۔
﴾﴿﴾﴿﴾﴿