غضنفر حسین نقوی رجسٹرار این ای ڈی، صفی احمد زکائی کنٹرولر امتحانات مقرر
مینجمنٹ سائنس پروگرام میں ایم ایس پروگرام کی منظوری
جامعہ این ای ڈی کے تحت 212 سینڈیکیٹ کا اجلاس منعقد کیا گیا
کراچی() جامعہ این ای ڈی کے تحت 212 سینڈیکیٹ کا اجلاس منعقد کیا گیا، جس کی صدارت شیخ الجامعہ پروفیسر ڈاکٹر سروش لودھی نے کی۔ اس اجلاس میں سید غضنفر حسین نقوی کو رجسٹرار این ای ڈی، صفی احمد زکائی کو کنٹرولر امتحانات، ڈاکٹر مبشر خان کو کمپیوٹر سائنس اینڈ انفارمیشن ٹیکنالوجی کے چیئرمین کی حیثیت سے تعیناتی کی منظوری دی گئی جب کہ کمیونیکشن مینیجر کی حیثیت سے فروا حسن کی تعیناتی کی منظوری بھی دی گئی۔ ڈیپارٹمنٹل سلیکشن کمیٹی کی سفارشات کے تحت ایڈیشنل ڈائریکٹر فنانس سرور امتیاز، ایڈیشنل رجسٹرار لیگل عامر نصیر، ایڈیشنل رجسٹرار تھر انسٹی ٹیوٹ آف انجئینرنگ سائنس اینڈ ٹیکنالوجی خالد مخدوم ہاشمی، ایڈیشنل ڈائریکٹر ورکس اینڈ سروسز اظہر اقبال، ایڈیشنل ڈائریکٹر پلاننگ اینڈ ڈیولپمنٹ حسیب انصاری و دیگر کی تعیناتی کی منظوری بھی دی گئی۔ این ای ڈی کے اس 212ویں اجلاس میں مینجمنٹ سائنس پروگرام میں ایم ایس پروگرام کے آغاز کی منظوری بھی دی گئی۔ اجلاس میں اپنے سابقہ طالب علموں کی مادرِ علمی کے لیے خدمات کو سراہتے ہوۓ پیٹرولیم انجینئرنگ کے ویڈیو کانفرنس ہال کو انجینئر عاصم مرتضی خان، میکینکل انجینئرنگ کے کانفرنس روم کو انجینئر عباس ساجد اور سول انجینئرنگ کے ڈرائنگ ہال کو انجینئر فاروق عربی کے نام سے منسوب کرنے کی منظوری دی جب کہ اس اجلاس میں چیئرمین آئی ای پی انجینئر سہیل بشیر نے المنائی ایسوسی ایشن کی جانب سے ٹیکنالوجی ڈیولپمنٹ انڈومنٹ فنڈ کے لیے ایک کروڑ اور انجینئر فاروق عربی نے دس لاکھ کے عطیے کے چیک شیخ الجامعہ این ای ڈی کو پیش کیے۔ یاد رہے کہ بحیثیت وائس چانسلر یہ ڈاکٹر سروش حشمت لودھی کے دوسرے دَور کا آخری سینڈیکیٹ اجلاس تھا جس میں ممبران نے تالیاں بجاکر شیخ الجامعہ کی این ای ڈی کے لیے گراں قدر خدمات کو سراہا۔ ممبر سینڈیکیٹ نادرہ پنجوانی، پروفیسر ڈاکٹر اے کیو مغل، چئیرمین ہائر ایجوکیشن کمیشن سندھ ڈاکٹر طارق رفیع، سیکریٹری یونی ورسٹیز اینڈ بورڈز عباس بلوچ، سیکریٹری انفارمیشن سائنس اینڈ ٹیکنالوجی نور احمد سموں اور چیئرمین آئی ای پی انجینئر سہیل بشیر نے اس موقعے پر شیخ الجامعہ ڈاکٹر سروش لودھی کی خدمات کو سلام پیش کیا۔
