بھارت: تیسرے بچے کی پیدائش پر 50 ہزار روپے اور لڑکے کی صورت میں گائے کا انعام
12 مارچ 2025
بھارت میں آبادی کے تناسب کو بہتر بنانے کے لیے ایک انوکھا اقدام سامنے آیا ہے۔ تیلگو دیشم پارٹی (ٹی ڈی پی) کے رکن اور لوک سبھا کے ممبر کالیستی اپالا نائیڈو نے خواتین کو تیسرے بچے کی پیدائش پر 50 ہزار روپے نقد انعام دینے کا اعلان کیا ہے۔ اس کے ساتھ ہی، اگر تیسری اولاد لڑکا ہو تو خاندان کو ایک گائے بھی انعام میں دی جائے گی۔
یہ اعلان ہفتہ 8 مارچ کو عالمی یومِ خواتین کے موقع پر منعقدہ ایک تقریب میں کیا گیا۔ نائیڈو نے کہا کہ یہ نقد رقم وہ اپنی تنخواہ سے ادا کریں گے۔ ان کا کہنا تھا کہ اس اقدام کا مقصد خواتین کو بااختیار بنانا اور خاندانوں کو بڑھانے کی ترغیب دینا ہے۔
بھارتی میڈیا کے مطابق، تیلگو دیشم پارٹی کے رہنما اور کارکنان اس پیشکش کو اپنے سوشل میڈیا اکاؤنٹس پر بڑے پیمانے پر شیئر کر رہے ہیں۔ اس سے قبل، آندھرا پردیش کے وزیر اعلیٰ نے جنوبی بھارت میں گرتی ہوئی آبادی پر تشویش کا اظہار کیا تھا۔ ان کا کہنا تھا کہ آبادی میں کمی کے رجحان کو روکنے کے لیے فوری اقدامات کی ضرورت ہے۔
نائیڈو کے اس اعلان نے سماجی حلقوں میں بحث چھیڑ دی ہے۔ کچھ لوگوں کا خیال ہے کہ یہ قدم خواتین کو مالی طور پر مستحکم کرنے اور دیہی علاقوں میں مویشی پالنے کو فروغ دینے کا ایک اچھا موقع ہے۔ وہیں، کچھ لوگوں نے اس پر تنقید بھی کی ہے، جن کا ماننا ہے کہ یہ اقدام لڑکیوں کے مقابلے میں لڑکوں کو ترجیح دینے کے رجحان کو بڑھا سکتا ہے۔
یہ پیشکش نہ صرف بھارت بلکہ پوری دنیا میں زیرِ بحث آئی ہے۔ اب دیکھنا یہ ہے کہ کیا یہ اقدام واقعی آبادی کے تناسب کو بہتر بنانے میں کامیاب ہو پاتا ہے یا نہیں۔
