ڈاکٹر عائشہ عیسانی کا وائس چانسلر شیخ ایاز یونیورسٹی تقرری کا نوٹیفکیشن واپس لے لیا گیا
سید محمد عسکری
ڈاکٹر عائشہ عیسانی کا وائس چانسلر شیخ ایاز یونیورسٹی تقرری کا نوٹیفکیشن واپس لے لیا گیا
شیخ ایاز یونیورسٹی شکارپور میں ڈاکٹر عائشہ عیسانی قیصر مجید کا بطور وائس چانسلر تقرری کا نوٹیفکیشن واپس لے لیا گیا۔
ان کی بطور وائس چانسلر تقرری کا نوٹیفکیشن گزشتہ برس 13 اگست کو جاری کیا گیا تھا تاہم انہوں نے جوائننگ نہیں دی تھی، 6 ماہ تک ان کا انتظار کیا گیا مگر وہ اسلام آباد میں واقع ایک یونیورسٹی کی پی وی سی بن گئیں اور شکار پور آنے پر تیار نہیں ہوئیں۔
ان کی تقرری کے نوٹیفکیشن میں اگر 15 روز کے اندر لازمی جوائننگ کی شرط درج ہوتی تو یہ 6 ماہ ان کے انتظار میں ضائع نہ ہوتے اور ان کی جگہ اہل امیدوار کو وائس چانسلر لگادیا گیا ہوتا۔
=========================
رمضان کا مہینہ روزہ رکھنے کے لیے ہے صرف کھانے کے لیے نہیں
رمضان میں ورزش کرنا نقصاندہ نہیں، پروفیسرریحان عمر کا پنجوانی سینٹر جامعہ کراچی میں خطاب
سحر و افطار میں کاربوہائیڈریٹس اور چکنائی سے بھرپور غذاؤں سے اجتناب ضروری ہے
کراچی: ماہرینِ صحت کے نزدیک رمضان میں ورزش کرنا نہ وقت کا ضیاع اور نہ ہی غیر محفوظ یا خطرناک ہے، ہر فرد کو اس مقدس مہینے میں اپنی طاقت اور قلبی صحت کو برقرار رکھنے کے لیے کچھ وقت ورزش کے لیے ضرور نکالنا چاہیے، رمضان کا مہینہ روزہ رکھنے یعنی تقویٰ اختیار کرنے کا ہے صرف کھانے کے لیے نہیں، مختلف امراض میں مبتلا افراد کے لیے رمضان سے قبل رمضان آگاہی بہت ضروری ہے، سحر و افطار کے اوقات میں بالخصوص کاربوہائڈریٹ اور چکنائی سے بھرپور غذاوں سے اجتناب برتنا چاہیے۔
یہ بات نیشنل میڈیکل سینٹر کراچی کے ماہرِ امراضِ قلب پروفیسر ڈاکٹرریحان عمرنے بدھ کو ڈاکٹر پنجوانی سینٹر برائے مالیکیو لر میڈیسن اور ڈرگ ریسرچ (پی سی ایم ڈی)، جامعہ کراچی کے عوامی آگاہی پروگرام کے تحت”رمضان اور ورزش“ کے موضوع پر ایل ای جے نیشنل سائینس انفارمیشن سینٹر کے لیکچر ہال میں منعقدہ ایک لیکچر کے دوران کہی۔ لیکچر کا انعقادڈاکٹر پنجوانی سینٹر اور سندھ انوویشن، ریسرچ اینڈ ایجوکیشن نیٹ ورک (سائرن) کے باہمی تعاون سے ہو ا۔
پروفیسر ریحان عمر نے کہا سحری اور افطار میں خاص طور پر زیادہ مقدار میں چکنائی اور کاربوہائیڈریٹس والی غذا کھانے سے اجتناب کرنے پر زور دیا اور کہا کہ رمضان میں غذائی مشاورت صحت مند رہنے میں مددگار ثابت ہو سکتی ہے۔ انہوں نے تشویش کا اظہار کیا کہ پاکستان کو دنیا میں ذیابیطس کی سب سے زیادہ شرح کا سامنا ہے۔ انہوں نے کہا کہ رمضان سے پہلے غذائی تعلیم ایک مؤثر حکمت عملی ثابت ہو سکتی ہے، جو لوگوں کی خوراک کے انتخاب کو بہتر بنانے، غذائی اصولوں کی پابندی میں مدد دینے اور وزن کو قابو میں رکھنے میں معاون ہو سکتی ہے۔ انہوں نے کافی اور چائے جیسے کیفین والے مشروبات کی مقدار کم کرنے کی ہدایت کی، کیونکہ یہ جسم میں پانی کی کمی اور سر درد کا سبب بن سکتے ہیں۔ اسی طرح، افطار اور سحری میں متوازن غذا کھانے اور بہت زیادہ میٹھے کھانوں سے بچنے کا مشورہ دیا، تاکہ خون میں شوگر کی سطح متوازن رہے۔
انھوں نے کہا کہ لوگ مچھلی، ایووکاڈو، گری دار میوے، زیتون کے تیل اور سورج مکھی کے تیل جیسی چکنائی کا استعمال کریں جبکہ چربی والے گوشت، مکھن، گھی اور ناریل کے تیل سے پرہیز کریں۔ انہوں نے سفید گوشت (مرغی اور مچھلی) کو ترجیح دینے اور چکنائی اور نمک کی زیادہ مقدار والے پراسیس شدہ گوشت سے بچنے کی ہدایت کی۔ انہوں نے خبردار کیا کہ پاکستان میں غیر صحت مند طرز زندگی کی وجہ سے امراض قلب میں تیزی سے اضافہ ہو رہا ہے، اور ہر دو منٹ میں ایک پاکستانی شہری دل کی بیماری سے جان کی بازی ہار جاتا ہے۔
میڈیا ایڈوائزر
