رپورٹ محمد عاشق پٹھان لاڑکانہ میں دڑی ٹاؤن کمیٹی کے زیر اہتمام 12 روزہ لاڑکانہ میگا فیسٹیول کی اختتامی تقریب آرٹس کونسل آف پاکستان لاڑکانہ میں منعقد ہوئی جس میں مہمان خصوصی پی پی پی سندھ کے صدر ایم پی اے نثار کھوڑو، سابق صوبائی وزیر داخلہ و ایم پی اے سہیل انور سیال، ایم پی اے لاڑکانہ جمیل احمد سومرو، پی پی پی رہنما طارق انور سیال، وزیر اعلیٰ سندھ کے معاون خصوصی خیر محمد شیخ، چیئرمین ڈسٹرکٹ کونسل لاڑکانہ اعجاز احم لغاری، وائس چیئرمین اسداللہ بھٹو، میئر لاڑکانہ ایڈووکیٹ انور علی لہر، سردار صفدر علی مٹھانی، کمشنر لاڑکانہ طاہر حسین سانگی، ڈپٹی کمشنر ڈاکٹر شرجیل نور چنہ، ڈی آئی جی لاڑکانہ ناصر آفتاب، ایس ایس پی احمد چوہدری، شاہد خان سیال، لاڑکانہ پریس کلب کے صدر مرتضیٰ کلہوڑو، جنرل سیکریٹری نوید لاڑک، خزانچی عبدالقادر جاگیرانی، چیئرمین ایمپائر ٹاؤں وقار احمد بھٹو، چیئرمین سچل ٹاؤن سرفراز علی کھوکھر، یوسی چیئرمین شفیق احمد چانڈیو، پیپلز پارٹی رہنما عمران حسن جتوئی، سپاف رہنما کامران اوڈھانو، شیر محمد لغاری، پروفیسرز، ڈاکٹرز، صحافیوں، فنکاروں، ادیبوں، شاعروں، خواتین، نوجوانوں اور بچوں نے بڑی تعداد میں شرکت کی، تقریب کے آغاز میں شاندار آتش بازی کا شاندار مظاہرہ کیا گیا، تقریب سے خطاب کرتے ہوئے پیپلز پارٹی سندھ کے صدر نثار کھوڑو نے کہا کہ میں فخر سے کہہ سکتا ہوں کہ سندھ میں جہاں پہلے کراچی آرٹس کونسل کا نام آتا ہے، وہاں کراچی کے بعد لاڑکانہ آرٹس کونسل کا نام بھی آتا ہے، جسے لاڑکانہ کے باسیوں نے قائم کیا اور اپنی دلچسپی برقرار رکھی، آج کے ماحول میں جہاں انتہاپسندی، بدامنی اور دہشت گردی کا چرچا ہے، وہیں ثقافت اور ایسے پروگراموں سے ان کا خاتمہ کیا جاسکتا ہے، انہوں نے کہا کہ لاڑکانہ کے شاعر، ادیب اور محقق سندھ بھر میں جانے جاتے ہیں، لاڑکانہ کے رہنے والے شاہنواز ڈہانی پاکستان کرکٹ ٹیم کا حصہ ہیں، اس کے علاوہ دیگر شعبوں میں بھی لاڑکانہ کے لوگ نمایاں ہیں، انہوں نے کہا کہ لاڑکانہ سے تعلق رکھنے والے چیئرمین بلاول بھٹو زرداری نے نہ صرف پاکستان بلکہ پوری دنیا میں خود کو منوایا ہے، نوجوانوں کو تعلیم اور کھیلوں کے مواقع فراہم کیے جائیں، سندھیوں کو اپنی 5 ہزار سالہ ثقافت پر فخر ہے جن کے دلوں میں جمہوریت اور پاکستان کے لیے بے پناہ محبت ہے، انہوں نے کہا کہ لاڑکانہ کی سرزمین سے جنم لینے والے شہید ذوالفقار علی بھٹو نے کہا تھا کہ طاقت کا سرچشمہ عوام ہیں، شہید ذوالفقار علی بھٹو اور شہید محترمہ بینظیر بھٹو کی لازوال قربانیوں کے باعث آج ملک میں ہم جمہوریت رواں دواں ہے، ایم پی اے لاڑکانہ جمیل احمد سومرو نے کہا کہ دڑی ٹاؤن کے چیئرمین شاہ رخ انور سیال فیسٹیول کا انعقاد کرکے لاڑکانہ کے باسیوں کو ایک جگہ اکٹھا کیا ہے، ایسے پروگرام مستقبل میں بھی کیے جائیں تاکہ لاڑکانہ کے شہری ان سے لطف اندوز ہوں، انہوں نے کہا کہ ملک کی 68 فیصد آبادی 18 سے 30 سال کی عمر کے نوجوانوں پر مشتمل ہے، جن کی تعلیم، کھیل اور دیگر پروگراموں میں شرکت کی حوصلہ افزائی کی جانی چاہیے، اس لیے ایسے پروگرام منعقد کر کے نوجوانوں کو مواقع فراہم کرنا ہمارا فرض ہے، سابق صوبائی وزیر داخلہ ایم پی اے سہیل انور سیال نے کہا کہ ہم لاڑکانہ کے عوام کی خوش قسمتی ہے کہ لاڑکانہ کی سرزمین پر شہید ذوالفقار علی بھٹو، شہید محترمہ بے نظیر بھٹو اور دیگر عظیم شخصیات نے جنم لیا، لاڑکانہ کے لوگ باشعور اور پڑھے لکھے ہیں جنہوں نے نہ صرف اپنے ملک بلکہ پوری دنیا میں اپنا نام روشن کیا ہے، چیئرمین دڑی ٹاؤن شاہ رخ انور سیال نے مہمانوں کو خوش آمدید کہتے ہوئے کہا کہ لاڑکانہ کے عوام کے چہروں پر مسکراہٹیں لانے کے لیے لاڑکانہ نے ایک میگا فیسٹیول کا انعقاد کیا جس میں سپورٹس ویک کے دوران ثقافتی اور دیگر کھیلوں کی نمائش کی گئی اور میری کوشش ہوگی کہ آئندہ بھی ایسے پروگرام منعقد کرکے شہریوں کو بھرپور تفریح فراہم کی جائے، تقریب میں سابق صوبائی وزیر داخلہ ایم پی اے سہیل انور سیال، چیئرمین دڑی شاہ رخ انور سیال اور دیگر نے مہمانوں سمیت صحافیوں اور زندگی کے مختلف شعبوں سے تعلق رکھنے والی شخصیات کے علاوہ فیسٹیول انتظامیہ اور رضاکاروں کو شیلڈز، تعریفی اسناد، سندھی ٹوپیاں اور اجرک پیش کرکے ان کا شکریہ ادا کیا، تقریب میں سندھی کے معروف گلوکار رجب فقیر، ممتاز مولائی، مارول گروپ، واجد علی صدیقی اور دیگر فنکاروں نے ثقافتی اور صوفی گیت گا کر حاضرین کو محظوظ کیا، اس موقع پر سندھی کامیڈین علی گل ملاح اور اصغر کھوسو نے بھی اپنے فن کا مظاہرہ کیا۔
