امریکی سینیٹ نے سی آئی اے کے سربراہ کے عہدے کے لیے صدر ڈونلڈ ٹرمپ کے نامزد کردہ جان ریٹکلف کی تقرری کی توثیق کر دی ہے۔
ریٹکلف اس سے قبل صدر ٹرمپ کے پہلے دور صدارت میں ڈائریکٹر نیشنل انٹیلیجنس کے عہدے پر فائز رہ چکے ہیں۔ وہ پہلے شخص ہوں گے جو نیشنل انٹیلجنس میں بطور ڈائریکٹر خدمات انجام دینے کے بعد ملک کی سب سے بڑی ایجنسی سی آئی اے کے اعلی ترین عہدے پر فائز ہوئے ہوں۔
سینیٹ سے جمعرات کو ریٹکلف کو ملنے والی توثیق، صدر ٹرمپ کی کابینہ کی تشکیل میں دوسری توثیق ہے۔ اس سے قبل وزیرخارجہ کے عہدے کے لیے مارکو روبیو کی توثیق کی جا چکی ہے۔ ریٹکلف نے گزشتہ ہفتے سینیٹ کو بتایا تھا کہ جب بات ہو مصنوعی ذہانت کے استعمال کی ا ور روس اور چین سمیت مخالفین کا مقابلہ کرنے کی تو سی آئی اے کو بہتر کارکردگی دکھانے کی ضرورت ہے۔
