کراچی
مورخہ 18 جنوری 2025
٭وزیراعظم کی ہدایت پر پی ایم باکسنگ ٹیلنٹ ہنٹ کا آغاز لیاری سے کیا گیا ہے، رانا مشہود احمد٭
٭چیئرمین پی ایم وائی پی رانا مشہود احمد نے لیاری ککری گراؤنڈ میں پی ایم باکسنگ ٹیلنٹ ہنٹ کا افتتاح کردیا٭
چیئرمین وزیراعظم یوتھ پروگرام رانا مشہود احمد نے لیاری کے ککری گراؤنڈ میں پی ایم باکسنگ ٹیلنٹ ہنٹ کا افتتاح کردیا۔ افتتاحی تقریب سے خطاب کرتے ہوئے انہوں نے کہا کہ ہم نے ملک میں اسپورٹس کلچر بحال کردیا ہے، وزیراعظم شہباز شریف کی ہدایت پر پی ایم باکسنگ ٹیلنٹ ہنٹ کا آغاز لیاری سے کیا گیا ہے کیونکہ ہم لیاری کے باکسرز اور ان کے ٹیلنٹ کو اجاگر کرنا چاہتے ہیں۔
ان کا کہنا تھا کہ حکومت تعلیم، ہنر، آئی ٹی، سائنس و ٹیکنالوجی میں یکساں مواقعوں کی فراہمی کے ساتھ ساتھ کھیلوں پر بھی توجہ دے رہی ہے، ہم نے پاکستان اولمپکس ایسوسی ایشن کے انتخابات کرائے ہیں، نئی منتخب ہونے والی باڈی میرٹ پر کھلاڑیوں کو آگئے لائے گی، ان کھلاڑیوں کو صرف انعامات دے کر رخصت نہیں کریں گے بلکہ ان کی مزید ٹریننگ کرکے بین الاقوامی مقابلوں میں حصہ لینے کا موقع دیں گے۔
رانا مشہود احمد نے کہا کہ وزیراعظم شہباز شریف کے وژن کے مطابق نوجوانوں کیلئے کراچی یونیورسٹی میں پہلی فٹبال اکیڈمی قائم کی جائے گی، لیاری یونیورسٹی میں باکسنگ اکیڈمی قائم کریں گے جبکہ این ای ڈی یونیورسٹی میں بائیومکینک لیب بنائی جائے گی، ان کا کہنا تھا کہ نوجوانوں کیلئے کھیلوں کی اکیڈمیز کا آغاز سندھ سے کیا گیا ہے۔
ان کا کہنا تھا کہ پاکستان کے نوجوانوں میں بہت ٹیلنٹ ہے، ان کو میرٹ پر آگے آنے دیا جائے تو دنیا کے ہر کھیل میں پاکستان اعزازات حاصل کرے گا، انہوں نے کہا کہ رواں برس باکسنگ کے دو ایونٹس پاکستان میں منعقد کرانے کی تیاری کرلی ہے جس میں بیرون ملک سے بھی باکسرز حصہ لیں گے۔
چیئرمین پی ایم وائی پی نے کہا کہ پاکستان کی ترقی اور خوشحالی کے دور کا آغاز ہوچکا ہے، قوم کی بیٹیوں اور نوجوانوں کے ساتھ مل کر ملک کو ترقی کے راستے پر گامزن کریں گے، ہم نے عہد کیا ہے کہ پاکستان کی کوئی بیٹی تعلیم حاصل کرنے سے محروم نہ رہے، چند دن پہلے تمام صوبوں کی معاونت سے بچیوں کی تعلیم پر ایک بین الاقوامی کانفرنس منعقد کرائی جس میں 41 ممالک سے وفود نے شرکت کی۔
انہوں نے مزید کہا کہ وزیراعظم شہباز شریف نے معیشت کی بحالی کیلئے ٹھوس اقدامات کیے، معاشی اشاریے درست سمت میں ہیں، بیرونی ممالک آج پاکستان کے ساتھ نئے نئے معاہدے کر رہے ہیں، یہ سب پاکستان کی قیادت پر اعتماد کا مظہر ہے۔
لیاری ککری گراؤنڈ میں واقع باکسنگ ایرینا میں پی ایم باکسنگ ٹیلنٹ ہنٹ کے افتتاحی روز 7 مقابلے ہوئے جس میں کھلاڑیوں نے 40 کلو کیٹگری سے لے کر 55 کلو کیٹگری کے میچز میں حصہ لیا۔
