انصر اقبال بسراء
ایتھنز یونان
دنیا بھر کی طرح یونان میں بھی امیر المومنین حضرت علی ابن ابی طالب ؑ کایوم ولادت کو عقیدت و احترام اور مذہبی جوش و جذبے کے ساتھ منایا گیا۔ اس بابرکت موقع پر یورپ کے قدیمی امام بارگاہ، عزاخانہ گلزارِ زینبؑ میں عظیم الشان محفلِ جشن مولودِ کعبہ کا انعقاد کیا گیا، جس میں فرزندانِ توحید نے کثیر تعداد میں شرکت کرکے حضرت علیؑ سے اپنی عقیدت و محبت کا اظہار کیا۔تقریب میں برطانیہ سے تشریف لائے
شعلہ بیاں خطیب علامہ سید علی کاظم نے فضائلِ علی المرتضیؑ بیان کرتے ہوئے ان کی سیرت اور تعلیمات پر روشنی ڈالی۔ ڈنمارک سے عالمی شہرت یافتہ منقبت خواں قمبر علی کیانی اور سوئیڈن سے معروف منقبت خواں سلیم رضا نگری نے اپنی خصوصی شرکت سے محفل کو چار چاند لگا دیے اور اپنے خوبصورت کلام سے حاضرین کے دلوں کو منور کیا۔محفلِ سعید کے موقع پر عزاخانہ گلزارِ زینبؑ کو برقی قمقموں سے خوبصورتی سے سجایا گیا تھا۔ تقریب
کے اختتام پرہر سال کی طرح شاندار آتش بازی کا مظاہرہ بھی کیا گیا جس نے جشن کے ماحول کو مزید یادگار بنا دیا۔عزاخانہ گلزارِ زینبؑ کی انتظامیہ نے تقریب میں شرکت کرنے والے تمام عقیدت مندوں کا تہہ دل سے شکریہ ادا کیا۔
