اسلام آباد: جنوری 10، 2025۔
وزیراعظم محمد شہباز شریف کی ترسیلات زر میں ریکارڈ اضافے پر قوم کو مبارکباد
دسمبر 2024 تک 3.1 بلین ڈالر ترسیلات زر وصول ہوئیں جو کہ نومبر 2024 سے 5.6 فیصد زیادہ ہے، وزیراعظم
دسمبر 2023 سے دسمبر 2024 تک ترسیلات زر میں 29.3 فیصد کا اضافہ ہوا ہے، وزیراعظم
ترسیلات زر میں ریکارڈ اضافہ ہمارے بیرون ملک پاکستانی بھائیوں اور بہنوں کے ملک و قوم کی ترقی میں اپنا کردار ادا کرنے کے آہنی عزم کی سند ہے، وزیراعظم
ترسیلات زر میں ریکارڈ اضافے سے ملکی معیشت کا پہیہ جام کرنے کا نعرہ لگانے والوں کے دعوے دھرے کے دھرے رہ گئے، وزیراعظم
پاکستان معاشی استحکام کے بعد معاشی ترقی کے راہ پر گامزن ہو چکا ہے، وزیراعظم
حکومت پاکستان ملکی ترقی اور عوامی فلاح و بہبود کے لیے پر عزم ہے، وزیراعظم
==================
سندھ میں مڈل ٹیک اقدامات کے تحت پاکستان میں پہلی مرتبہ تکنیکی تعلیم کو روایتی تعلیمی نظام کا حصہ بنا لیا گیا۔
وزیر تعلیم سید سردار علی شاہ نے “مڈل ٹیک انیشی ایٹو” کا باقائدہ افتتاح کرتے ہوۓ کہا ہے کہ یہ قدم تکنیکی اور پیشہ ورانہ مہارتیں سکھانے اور روزگار کے مواقع تلاش کرنے میں مددگار ثابت ہوگا۔
“مڈل ٹیک انیشی ایٹو” کے تحت 300 اسکولز میں سہولیات فراہم کی گئی ہیں جس سے 65000 بچوں کو اسکولز میں روایتی تعلیم کے ساتھ تکنیکی تعلیم مل سکے گی۔ سردار شاہ
کراچی 9 جنوری ۔ پاکستان میں پہلی مرتبہ “مڈل ٹیک اقدامات” کے تحت سرکاری اسکولز میں ٹینیکل ایجوکیشن کو روایتی تعلیم کا حصہ بنا لیا گیا، صوبائی وزیر سید سردار علی شاہ نے “مڈل ٹیک انیشی ایٹو” کا باقائدہ افتتاح کرتے ہوۓ کہا ہے کہ سندھ نے تعلیمی اصلاحات کے سلسلے کو آگے بڑھاتے ہوۓ ایک اور سنگ میل عبور کیا ہے، اسکولز میں مڈل ٹیک تعلیم ایک ایسا تعلیمی ماڈل ہے جو طلباء کو تکنیکی اور پیشہ ورانہ مہارتیں سکھانے اور روزگار کے مواقع تلاش کرنے میں مددگار ثابت ہوگا۔ سی ایم ایس گورنمینٹ بوائز سیکنڈری کیمپس اسکول کراچی میں منعقدہ افتتاحی تقریب کے موقع پر سابق نگراں وزیر تعلیم سندھ رعنا حسین، سیکریٹری اسکول ایجوکیشن زاہد علی عباسی، چیف ایڈوائزر جاپان انٹرنیشنل کوآپریشن ایجنسی (جائکا) چی ہو اوہاشی، چیف ایگزیکیٹو ایڈوائیزر ڈاکٹر فوزیہ خان، ڈائریکٹر اسکول کراچی مرزا ارشد بیگ، ڈی ای او سائوتھ ڈولپمینٹ کنسلٹنٹ پریم ساگر، اسکول پرنسپل اور دیگر افسران بھی موجود تھے۔ “مڈل ٹیک انیشی ایٹو” کے حوالے سے جائکا نے اسکول ایجوکیشن اینڈ لٹریسی ڈپارٹمنٹ (SE&LD) کو تکنیکی معاونت فراہم کی ہے، جس کے تحت کریکیولم ڈولپمنٹ، اساتذہ کی تربیت اور اسکولز میں لیبز کی تیاری جیسے اقدامات شامل ہیں، اس موقع پر منعقدہ تقریب سے خطاب کرتے ہوۓ صوبائی وزیر سید سردار علی شاہ نے کہا کہ اس وقت سندھ میں 21ویں صدی کی ضروریات کے مطابق تعلیمی اصلاحات ضروری ہیں انہوں نے کہا کہ “یہ اقدام ہمارے طلبہ کو سماجی اور اقتصادی لحاظ سے قابل شہری بنانے کی طرف ایک قدم ہے۔ روایتی تعلیم اور عملی مہارتوں کے مابین خلا کو پُر کر کے ہم اپنی نوجوان نسل کے لیے روشن مستقبل کی راہ ہموار کر رہے ہیں۔”وزیر تعلیم نے کہا کہ وسائل کی کمی جیسے مسائل کی وجہ سے بھی بچوں کو تعلیم حاصل کرنے میں مشکلات کا سامنا رہتا ہے، اس طرح کے اقدامات کی مدد سے بچے طالب علمی کے دوران خود کفیل بن کر اپنے تعلیمی اخراجات برداشت کرنے کی بھی قابل بن جائیں گے، صوبائی وزیر نے کہا کہ پہلے مرحلے میں سندھ بھر کے 300 اسکولز سہولیات فراہم کی گئی ہیں جس سے 65000 بچوں کو روایتی تعلیم کے ساتھ تکنیکی تعلیم کی واقفیت بھی دی جاۓ گی، اگریکلچر، اپلائڈ الیٹریشن، بیوٹیشن، ڈریس میکنگ، فنڈامینٹل آف کوکنگ، گرافک ڈزائننگ، ہوٹل مینجمینٹ، انٹروڈکشن آف ٹورزم، انٹرنیٹ آف تھنگز، لائیواسٹاک، میڈیا پروڈکشن، پلمبنگ جیسے شعبے بھی اب اسکولز سطح پر روایتی تعلیم کا حصہ ہونگے۔ سید سردار علی شاہ نے کہا کہ اسکولز میں مڈل ٹیک کے سلسلے کو آگے بڑھاتے ہوۓ میٹرک ٹک اور پھر کالجز میں انٹر ٹیک کلاسز بھی جلد شروع کیے جائیں گے۔ اس موقع پر سیکریٹری تعلیم زاہد علی عباسی نے اپنے خطاب میں کہا کہ مڈل ٹیک کے مقاصد حاصل کرنے کے لیے سندھ کے اسکولز میں اس سال 1600 کمپیوٹر لیبز قائم کی جائیں گی، جبکہ دیگر ضروری سہولیات کی دستیابی کو بھی یقینی بنایا جاۓ گا، چیف ایڈوائزر جاپان انٹرنیشنل کوآپریشن ایجنسی (جائکا) چی ہو اوہاشی نے اس موقع پر حاضرین کو بتایا کہ جائکا نے اساتذہ کی تربیت اور مڈ ٹیک کے نصاب کی تیاری میں تعاون فراہم کر رہے ہیں، جبکہ اس کے علاوہ میں انٹرنیٹ آف تھنگز (IoT)، میڈیا پروڈکشن، اور انٹروڈکشن ٹو ٹورزم جیسے اضافی تکنیکی کورسز آئیندہ دنوں میں شامل کیے جائیں گے، جب کے اس طرح کے تعاون کو مستقبل میں بھی جاری رکھا جاۓ گا۔ اس موقع پر صوبائی وزیر سید سردار علی شاہ نے دیگر معززین کے ساتھ مل کر گرافک ڈزائننگ کا کے نصاب کی باقائدہ رونمائی کی کہا کہ یہ ان کی موجودہ مدت وزارت کے دوران انتہائی خوشی کا دن ہے۔ قبل ازیں صوبائی وزیر نے سی ایم ایس گورنمینٹ بوائز سیکنڈری کیمپس اسکول کراچی میں مڈل ٹیک کے لیے قائم کمپیوٹر لیب کا افتتاح کیا اور طلبہ و طالبات سے آگاہی حاصل کی اور نہیں محنت کرنے کی بھی تلقین کی۔
