جیکب آباد
پیدل حج پر جانے والے نوجوان کو ڈاکوؤں نے لوٹ لیا۔ تفصیلات کے مطابق جیکب آباد کے قریبی ضلع کشمور کے علاقے مرید شاخ کے گاؤں حاجی غلام حیدر دستی کے رہائشی نوجوان بادل دستی پیدل حج کی سعادت حاصل کرنے کے لیے اپنے گاؤں سے 15دسمبر کو نکلے ہیں، گزشتہ روز کشمور ضلع کے علاقے تنگوانی میں نامعلوم ڈاکوؤں نے اس سے اسلحہ کے زور پر 15 ہزار روپے لوٹ لیے، پیدل حج پر جانے والے نوجوان بادل دستی نے جیکب آباد کی تحصیل ٹھل پہنچنے پر صحافیوں کو بتایا کہ پیدل حج کی سعادت حاصل کرنے کے لیے اپنے گاؤں سے 15 دسمبر کو نکالا تھا گزشتہ روز تنگوانی کے علاقے میں ڈاکوؤں نے مجھے لوٹ لیا اور میرے پاس موجود 15 ہزار روپے چھین کر فرار ہوگئے، نوجوان نے بتایا کہ پیدل حج کے لیے نکلا ہوں میں نے پیسے اس لیے کم اٹھائے تھے کہ میں کوئٹہ پہنچ کر وہاں بھائی سے پیسے لیکر آگے سفر کے لیے نکلوں گا، نوجوان کے مطابق یہاں سے کوئٹہ پھر تفتان کے راستے ایران میں داخل ہوکر پھر عراق، کویت یا دبئی کے راستے سعودی عرب جاؤنگا، انہوں نے کہا کہ حج کرنا ہر مسلمان کی دلی خواہش ہوتی ہے میرے پاس اتنے پیسے نہیں کہ میں حج کرسکوں اس لیے پیدل نکلا ہوں، میرے والدین فوت ہوچکے ہیں اگر وہ زندہ ہوتے تو میں ان کی خدمت کرکے حج کا ثواب حاصل کرتا۔
جیکب آباد جے یو آئی کے وفد کی ڈپٹی کمشنرسے ملاقات، شہر کے بنیادی مسائل پر گفتگو۔ تفصیلات کے مطابق جمعیت علماء اسلام کے وفد نے ضلعی امیر ڈاکٹر اے جی انصاری کی قیادت میں نئے ڈپٹی کمشنر جیکب آباد نواب سمیر حسین لغاری سے ملاقات کی۔ ملاقات میں وفد نے 13نکات پیش کیا جن میں پینے کے صاف اور میٹھے پانی کی عدم فراہمی، نادرا اور واپڈا آفیس کو شہر سے باہر منتقلی، میڈیکل کالج اور یونیورسٹی کے قیام، جمس ہسپتال میں صحت کی سہولیات کی عدم دستیابی، سول اسپتال کی تباہی، شہر میں ٹریفک ون وے کرنے،کیمیکل سے تیار دودھ اور چائے کی فروخت، ہوٹلوں سمیت دیگر جگہوں پر سماجی برائیوں سمیت دیگر بنیادی مسائل شامل تھے۔ ڈپٹی کمشنر نے کہا کہ آپ کے 13 نکات میں شامل مسائل میں سے 7 پر کام کرنا شروع کر دیا ہے مزید آپ کی نشاندہی پر عملدرآمد کیا جائے گا۔ انہوں نے یقین دہانی کرائی کہ مسائل کے حل میں شہریوں کے تعاون کی ضرورت ہے۔ وفد میں چاکر خان جکھرانی، ایڈوکیٹ عبدالرب اوڈہانو، عبدالرزاق سیال، محمد علی اوڈھو، تاج محمود انصاری اور دیگر موجود تھے۔
جیکب آباد میں محنت کش 11ہزار وولٹیج کی تار سے کرنٹ لگنے کے باعث جاں بحق۔ تفصیلات کے مطابق جیکب آباد کے گاؤں احمد میاں سومرو میں مزدوری کے دوران 11ہزار وولٹیج کی تار سے کرنٹ لگنے کے باعث محنت کش خالد گوپانگ جاں بحق ہوگیا، محنت کی لاش سول اسپتال لائی گئی جہاں ڈاکٹر نے اس کی موت کی تصدیق کی۔
