کراچی18 دسمبر۔سندھ کے سینئر وزیر شرجیل انعام میمن نے کہا ہے کہ پیپلز بس سروس کے روٹس بڑھائے جا رہے ہیں، پیپلز بس سروس کی نئی بسیں اپریل تک آجائیں گی، ہماری کوشش ہے کہ پبلک پرائیوٹ پارٹنرشپ کے تحت ای وی بسز بسیں چلائیں تاکہ عوام کو بہترین اور سستی سفری سہولت کے ساتھ ساتھ ماحول کا بھی تحفظ ہوسکے۔ کراچی کے علاقے کورنگی میں یلو لائن بی آر ٹی کے بس ڈپو کے تعمیراتی کام کا جائزہ لینے کے بعد میڈیا سے گفتگو کرتے ہوئے سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا کہ سندھ حکومت کی جانب سے یلو لائین بی آر ٹی منصوبے پر کام شروع ہوچکا ہے، یلو لائن بی آرٹی کے پہلے حصے کے طور پر جام صادق پل تعمیر کیا جا رہا ہے جبکہ دوسرے حصے کے طور پر بس ڈپو تعمیر کیا جارہا ہے۔انہوں نے کہا کہ حکومت سندھ کی جانب سے عالمی معیار کا ڈبل اسٹوری ڈپو بنایا جا رہا ہے، قبل ازیں یہ ڈپو سنگل اسٹوری پر مشتمل تھا، اس ڈپو میں ایک اور گنجائش بھی چھوڑی جا رہی ہے تاکہ بوقت ضرورت ایک اور منزل بنائی جا سکے۔ یلو لائن بی آر ٹی منصوبہ دو سال میں مکمل ہو گا، یہ منصوبہ ورلڈ بینک کے تعاون سے شروع کیا جا رہا ہےسینئر وزیر شرجیل انعام میمن نے کہا کہ یلو لائن بی آر ٹی پر پہلے ڈیزل بسیں چلائی جانی تھیں، تاہم اب ای وی بسیں چلانے کا فیصلہ کیا گیا ہے، اس ضمن میں ڈپو میں چارجنگ کاسسٹم بھی لگایا جا رہا ہے، یہ ملکی تاریخ کی پہلی بی آر ٹی ہوگی جو ای وی بسز پر مشتمل ہوگی، اس سے لوگوں کو سستی اور بہترین سفری سہولت ملے گی۔انہوں نے کہا کہ ہم ای وی ٹیکسیز اور بائکس بھی لا رہے ہیں، اسکیم کے تحت رائیڈرز کو بھی ای وی بائیکس دیں گے جس سے بہت سے نوجوانوں کو روزگار ملے گا۔سینئر وزیر شرجیل انعام میمن نے کہا کہ ٹرانسپورٹ کے معاملے میں چیلنجز سے نمٹنا ہم سب کی مشترکہ ذمہ داری ہے، ٹرانسپوٹرز سے بھی درخواست کی ہے 
کہ ای وی بسز لائیں۔ انہوں نے کہا کہ اس منصوبے پر جلد کام ہوسکتا ہے، اسے 2026 سے پہلے مکمل کیا جا سکتا ہے، ہماری کوشش ہوگی کہ یہ منصوبہ ایک سال کے اندر مکمل ہو، شروعاتی طور پر اس ڈپو میں 346 بسیں پارک ہونگی۔قبضہ شدہ بس ڈپوز کو بھی خالی کروایا جائے گا۔ایک سوال کےجواب میں سینئر وزیر شرجیل انعام میمن نے کہا کہ پاکستان کے اندرونی مسائل میں کسی کو دخل اندازی نہیں کرنی چاہیے، عمران خان کے لیے عالمی لابسٹ کام کر رہے ہیں۔ ان کی کوششیں ہیں کہ عمران خان کو پنجرے نکالا جائے، پنجرے سے باہر نکلنے کا فیصلہ عدالتیں ہی کریں گے۔ ایک اور سوال کے جواب میں انہوں نے کہا کہ ایم کیو ایم کو وفاقی حکومت سے شکایت ہے، ان کی دھمکی کو سنجیدہ نہیں لینا چاہیے، مولانا فضل الرحمان کو مدارس بل کے حوالے سے وفاقی حکومت سے رجوع کرنا چاہیے۔ ایک اور سوال کے جواب میں سینئر وزیر شرجیل انعام میمن نے کہا کہ گاڑیوں کی فٹنس کے معاملے پر لوگوں کو پریشانی کا سامنا کرنا پڑ سکتا ہے، لیکن روڈ سیفٹی اور ماحولیات کے تحفظ کے لئے یہ بہت ہی اہم ہے، گاڑیوں کی فٹنس کا عمل یکم دسمبر سے شروع ہوچکا ہے۔ اس سے قبل سینئر وزیر شرجیل انعام میمن نے یلو لائن بی آر ٹی کے بس ڈپو کا دورہ کرکے تعمیراتی کام کا جائزہ لیا۔ اس موقع پر بین الاقوامی کنسلٹنٹس نے سینئر وزیر شرجیل انعام میمن کو کام کے حوالے سے تفصیلی بریفنگ بھی دی۔
ہینڈآؤٹ نمبر 951۔۔۔
