مور خہ17 دسمبر 2024
پریس ریلیز
سندھ پبلک سروس کمیشن (SPSC) نے سی سی ای-2021 کے حتمی نتائج کا اعلان کردیا
چار خواتین امیدوار PMS BPS-17 اور چھ خواتین امیدوار DSP BPS-17 کے لیے منتخب، مجموعی طور پر 73 امیدواروں کو مختلف محکمے الاٹ
کراچی 17 دسمبر ۔سندھ پبلک سروس کمیشن (SPSC) نے مشترکہ مقابلہ جاتی امتحان (CCE-2021) کے حتمی نتائج جاری کر دیے ہیں۔ امتحانی عمل جو کہ کئی مراحل پر مشتمل تھا، صوبے کے مختلف محکموں کے لیے 73 امیدواروں کی سفارش کے ساتھ مکمل ہوا۔ میرٹ کی بنیاد پر بھرتی کا یہ عمل شفافیت اور سخت معیارات کے مطابق انجام دیا گیا۔ایس پی ایس سی کے جاری کردہ نتائج کے مطابق پروونشل مینجمنٹ سروس (PMS) BPS-17 کے لیے 15 امیدوار کامیاب قرار پائے ہیں، جبکہ ڈپٹی سپرنٹنڈنٹ پولیس (DSP) BPS-17 کے لیے 30 امیدواروں نے کامیابی حاصل کی۔ اس کے علاوہ اسسٹنٹ ڈائریکٹر لیبر (BPS-17) کے لیے 3 امیدوار، اسسٹنٹ رجسٹرار کوآپریٹو سوسائٹی (BPS-17) کے لیے 3 امیدوار، مختیار کار (BPS-16) کے لیے 14 امیدوار اور لیبر آفیسر (BPS-16) کے لیے 8 امیدوار کامیاب قرار دیے گئے ہیں۔کامیاب خواتین امیدواروں میں کنول رونجھو، پروہ ارباب، طیبہ مظفر اور فرزانہ واحد کو PMS کے لیے منتخب کیا گیا ہے، جبکہ پارس میرانی، صنوبَر طفیل، پروہ شیخ، فضیلہ ممتاز، سائرہ پروین اور صدرا اقبال کو DSP کے عہدے کے لیے منتخب کیا گیا ہے۔ اس کے علاوہ ارم مشتاق نے مختیار کار کے عہدے پر کامیابی حاصل کی۔CCE-2021 کے پہلے مرحلے میں اسکریننگ ٹیسٹ لیا گیا، جس میں 22,877 امیدواروں نے شرکت کی۔ ان میں سے 2,758 امیدوار کامیاب قرار پائے۔ بعد ازاں تحریری امتحان منعقد ہوا، جس میں 186 امیدواروں نے کامیابی حاصل کی۔ تحریری امتحان میں کامیاب امیدواروں کا زبانی امتحان رواں سال اکتوبر تک جاری رہا۔ایس پی ایس سی نے اس بھرتی کے عمل میں شہری، دیہی، خواتین اور دیگر کوٹہ سمیت آئینی تقاضوں کو پورا کیا۔ کامیاب امیدواروں کی فہرست اور محکموں کی الاٹمنٹ کی تفصیلات ایس پی ایس سی کی ویب سائٹ پر بھی موجود ہیں۔
کراچی
مور خہ17 دسمبر 2024
نجی اسکولز یونیفارم کوڈ میں نرمی برتیں تا کہ بچوں کو سردیوں سے بچنے میں مدد مل سکے۔ وزیر تعلیم سندھ سید سردار علی شاہ
کراچی 17 دسمبر ۔صوبائی وزیر تعلیم و ترقی معدنیات سندھ سید سردار علی شاہ نے کہا ہے کہ سردیوں کی شدت کو مد نظر رکھتے ہوۓ نجی اسکول کو مشورہ دیا جاتا ہے کہ وہ طلباء کے یونیفارم کوڈ میں نرمی برتیں تا کہ بچوں کو سردیوں سے بچنے میں مدد دینے کے ساتھ ان کے تعلیمی سلسلے کو جاری رکھا جا سکے۔ اس ضمن میں صوبائی وزیر تعلیم کی ہدایت پر ڈائریکٹوریٹ آف انسپیکشنز اینڈ پرائیوٹ انسٹیٹیوشن سندھ کی طرف سے نجی اسکولوں کے لئے ایک سرکیولیشن بھی جاری کیا گیا ہے جس میں وزیر تعلیم سید سردار علی شاہ کی ہدایت کے مطابق اسکولز کو سردیوں کے دوران یونیفارم کوڈ میں نرمی کے حوالے کہا گیا ہے کہ اسکول آنے والے بچوں کو سوئٹرز، کوٹ، جیکٹ، کیپ جرابیں، جوتے اور دیگر چیزیں شامل ہیں پہننے کی اجازت دی جاۓ۔ ڈائریکٹوریٹ کی جانب جاری ہونے والی ہدایات میں مزید کہا گیا ہے کہ بچوں کی صحت کی خاطر سردی سے بچاؤ کے اقدامات میں ان کے ساتھ تعاون کیا جاۓ، مزید ہدایات میں واضح کیا گیا ہے کہ سردی کے دنوں میں طلباء جو گرم کپڑے پہن سکتے ہیں انہیں اس کی اجازت دی جاۓ جبکہ اسکول کلاسز میں بھی سردی کے بچاؤ کے ہر ممکن اقدامات پورا کیا جائے ۔
ہینڈآؤٹ نمبر 950۔۔۔اے وی
