فاطمہ جناح میڈیکل یونیورسٹی میں 4 ڈی الٹراساؤنڈ ٹیکنالوجی پر پری کانفرنس ورکشاپ کا انعقاد
فاطمہ جناح میڈیکل یونیورسٹی کی سالانہ سائنسی کانفرنس کے تناظر میں ریڈیولوجی ڈیپارٹمنٹ کے زیر اہتمام 4 ڈی الٹراساؤنڈ ٹیکنالوجی پر پری کانفرنس ورکشاپ کا انعقاد وائس چانسلر پروفیسر خالد مسعودگوندل کی سرپرستی میں کیا گیا۔
صوبائی وزراء صحت خواجہ سلمان رفیق نے تقریب میں بطور مہمان خصوصی شرکت کی۔
اس موقع پرپارلیمانی سیکرٹری صحت رشدہ لودھی، پرنسپل پروفیسر عبدالحمید، سابق پرنسپل پروفیسر نورین اکمل، سابق سربراہ ریڈیولوجی ڈیپارٹمنٹ پروفیسر ڈاکٹر خالد رحمان یوسف ، ڈینزپروفیسر عائشہ ملک، پروفیسر بلقیس شبیر، ایم ایس سر گنگارام ہسپتال ڈاکٹر عارف افتخار، فیکلٹی ممبران و دیگر نے شرکت کی۔
ورکشاپ کے سہولت کاروں میں ریڈیالوجی ڈیپارٹمنٹ سے ایسوسی ایٹ پروفیسر ڈاکٹر سمن چودھری ، اسسٹنٹ پروفیسر ز ڈاکٹر وردہ اشرف، ڈاکٹر کرن سرفراز ، اور سینئر رجسٹرار ڈاکٹر مہوش نظام شامل تھے۔
ورکشاپ کا آغاز تلاوتے قرآن پاک سے کیا گیا۔
ریڈیالوجی ڈیپارٹمنٹ کی سربراہ پروفیسر ڈاکٹرمہ جبین مسعود نے تمام معزز مہمانوں کا استقبال کیا ۔
وزیر صحت خواجہ سلمان رفیق نے ورکشاپ کے منتظمین اور سہولت کاروں کو مبارکباد دی اور اس طرح کی ورکشاپس کی اہمیت پر زور دیا ۔
وائس چانسلر پروفیسر خالد مسعود گوندل نے شعبہ طب میں آرٹیفیشل انٹیلیجنس کی اہمیت اور اس سے متعلق مختلف پہلوؤں پر سیر حاصل گفتگو کی۔ انہوں نے ورکشاپس کے انتظامات اور صحت مند سرگرمیوں پر ریڈیولوجی ڈیپارٹمنٹ کی کوششوں کی تعریف کی ۔
پروفیسر بلقیس شبیر نے ٹیلی میڈیسن اور 4 ڈی یو ایس جی ٹیکنالوجی میں اے آئی کے کردار پر روشنی ڈالی ۔
ڈاکٹر کرن سرفراز نے 4 ڈی الٹراساؤنڈز ٹیکنالوجی پر ایک تفصیلی پریزنٹیشن پیش کی ۔
ہینڈز آن ٹریننگ کی نگرانی ڈاکٹر سمن چوہدری، ڈاکٹر وردہ اشرف، سینئر رجسٹرار ڈاکٹر راشد رشید اور کنسلٹنٹس ریڈیولوجی اور گائناکالوجی نے کی۔
پروفیسر ڈاکٹرمہ جبین مسعودنے ورکشاپ میں شرکت پر وزیر صحت خواجہ سلمان رفیق اور وائس چانسلر پروفیسر خالد مسعودگوندل اور تمام شرکاء کا شکریہ ادا کیا ۔
ورکشاپ کے اختتام پر وائس چانسلر پروفیسر خالد مسعودگوندل نے وزیر صحت خواجہ سلمان رفیق کو اعزازی شیلڈ بھی پیش کی۔
========================
پنجاب یونیورسٹی اکیڈمک اسٹاف ایسوسی ایشن (ASA) نے 2024 میں ریٹائر ہونے والے اساتذہ کے اعزاز میں ایک خصوصی تقریب کا انعقاد کیا۔ اس موقع پر پنجاب یونیورسٹی کے وائس چانسلر پروفیسر ڈاکٹر محمد علی، پرو وائس چانسلر پروفیسر ڈاکٹر خالد محمود، اے ایس اے کے صدر ڈاکٹر امجد عباس مگسی، جنرل سیکرٹری ڈاکٹر محمد اسلام اور فیکلٹی کے دیگر اراکین موجود تھے۔
اپنے خطاب میں وائس چانسلر پروفیسر ڈاکٹر محمد علی نے کہا کہ ریٹائرڈ اساتذہ کی خدمات کو خراج تحسین پیش کرنے کا یہ اقدام قابل تعریف ہے، جس کے لیے اے ایس اے مبارکباد کی مستحق ہے۔ انہوں نے کہا کہ یونیورسٹیوں کو اپنے ریٹائرڈ اساتذہ کی خدمات کا اعتراف کرنا چاہیے۔ انہوں نے کہا کہ پنجاب یونیورسٹی کے اساتذہ بہت قابل ہیں اور ان کی حمایت ادارے کے لیے بہت اہمیت رکھتی ہے۔ انہوں نے مزید کہا کہ ایک استاد کبھی ریٹائر نہیں ہوتا اور تحقیق کو فروغ دینے میں اہم کردار ادا کر سکتا ہے۔
ڈاکٹر امجد مگسی نے کہا کہ وہ وائس چانسلر پروفیسر ڈاکٹر محمد علی کے شکر گزار ہیں جنہوں نے اس کامیاب تقریب کے انعقاد میں تعاون کیا۔ انہوں نے کہا کہ اپنے منشور کے مطابق پنجاب یونیورسٹی اکیڈمک اسٹاف ایسوسی ایشن نے اساتذہ کی خدمات کو سراہنے کے عمل کا آغاز کیا ہے، جو آئندہ بھی جاری رہے گا۔ انہوں نے کہا کہ اس طرح کی تقریبات محبت، بھائی چارے اور باہمی احترام کو فروغ دیتی ہیں۔ انہوں نے مزید کہا کہ اے ایس اے پنجاب یونیورسٹی کے اساتذہ کی خدمت کے لیے اپنا کردار ادا کرتا رہے گا۔
بعد ازاں، وائس چانسلر پروفیسر ڈاکٹر محمد علی نے ڈاکٹر شاہدہ پروین، ڈاکٹر محمد اسلم، ڈاکٹر عبد الستار، ڈاکٹر بشریٰ حمید الرحمن، ڈاکٹر محمد رفیق، ڈاکٹر محمد طاہر نذیر، ڈاکٹر محمد عبد القادر، ڈاکٹر رشید احمد، ڈاکٹر اشتیاق احمد گوندل، ڈاکٹر مبشرہ خاتون، ڈاکٹر عمرا رضا، ڈاکٹر سکندر سلطان، ڈاکٹر طارق محمود خان، ڈاکٹر فرح دیبا، ڈاکٹر ضیا الحسن، ڈاکٹر رشید علی، ڈاکٹر فرح ناز نقوی، ڈاکٹر نوید احسن، اور ڈاکٹر عبد الناصر خالد کو اعزازی شیلڈز پیش کیں۔
==========
پروفیسر فاروق افضل کے والد کا انتقال، پرنسپل جنرل ہسپتال و فیکلٹی ممبران کا اظہار افسوس.
پوسٹ گریجویٹ میڈیکل انسٹی ٹیوٹ و لاہور جنرل ہسپتال کے پروفیسر آف سرجری ڈاکٹر فاروق افضل کے والد منگل کے روز اپنے خالق حقیقی سے جا ملے۔ پروفیسر فاروق افضل کے والد کی نماز جنازہ اُن کے آبائی علاقہ کنجاہ ضلع گجرات میں ادا کر دی گئی جس میں طب سے وابستہ افراد، سیاسی و سماجی شخصیات اور اہل علاقہ نے کثیرتعداد میں شرکت کی اور اُن کیلئے مغفرت کی دعا کی۔
پرنسپل امیر الدین میڈیکل کالچ پروفیسر ڈاکٹر محمد الفرید ظفر، ایم ایس ڈاکٹر فریاد حسین، فیکلٹی ممبران اورہیلتھ پروفیشنلز نے پروفیسر فاروق افضل سے ان کے والد کے انتقال پر گہرے دکھ اور افسوس کا اظہار کیا اور دعا کی کہ اللہ تعالیٰ مرحوم کو اپنے جوار رحمت میں جگہ عطا فرمائے اور پروفیسر فاروق افضل سمیت اہل خانہ کو یہ نا قابل تلافی نقصان ہمت اور حوصلے سے برداشت کرنے کی توفیق دے۔
=====================
سول سروسز اکیڈمی کے 52ویں کامن ٹریننگ پروگرام (سی ٹی پی) کی آئی سی ٹی سوسائٹی کے افسران نے پنجاب آئی ٹی بورڈ کا دورہ کیا۔ دورے کا مقصد وفد کو صوبے میں پی آئی ٹی بی کی جانب سے کی گئی آئی سی ٹی انوویشنز کے حوالے سے معلومات فراہم کرنا تھا۔ پی آئی ٹی بی ڈائریکٹر جنرل آئی ٹی سلوشنز وقار نعیم قریشی نے وفد کو ادارے کی کامیابیوں سمیت ای گورننس، سروس ڈیلیوری اور تکنیکی پیشرفت میں پی آئی ٹی بی کے کردار بارے بریفنگ دی۔ وفد نے پی آئی ٹی بی کے جدید ترین ڈیٹا سینٹر کا بھی دورہ کیا اور جوائنٹ ڈائریکٹر ہارون رشید نے ڈیٹا سینٹر کے اہم آپریشنز، محفوظ ڈیٹا مینجمنٹ اور تکنیکی انفراسٹرکچر پر روشنی ڈالی۔ وفد نے پنجاب ماس ٹرانزٹ اتھارٹی کے پنجاب ماسٹر کمانڈ اینڈ کنٹرول سینٹر کا بھی دورہ کیا جہاں 
انہوں نے ریئل ٹائم مانیٹرنگ اور مینجمنٹ سسٹمز کا مشاہدہ کیا۔ وفد نے ارفع سافٹ ویئر ٹیکنالوجی پارک میں قائم کردہ ای خدمت مرکز کا بھی دورہ کیا اور پی آئی ٹی بی جوائنٹ ڈائریکٹر عثمان وحید نے وفد کو سرکاری خدمات کی فراہمی کے حوالے سے جامع بریفنگ دی۔ اس موقع پر پی آئی ٹی بی چیئرمین فیصل یوسف نے حکومتی عمل کو ڈیجیٹلائز کرنے میں پی آئی ٹی بی کے کردار اور کامیابیوں کو اجاگر کرتے ہوئے کہا کہ ہم حکومت کو جدید ٹیکنالوجی و ڈیٹا پر مبنی حل کے ذریعے شہریوں کی خدمت کرنے میں معاونت فراہم کرنے کیلئے پرعزم ہیں۔
================================
یونیورسٹی اف ایجوکیشن لاہور کے زیر اہتمام امریکن سفارت خانہ کے تعاون سے انگلش ایکسیس پروگرام کا آغاز کر دیا گیا۔ پروگرام کی افتتاحی تقریب کے مہمان خصوصی امریکی سفیر ڈونلڈ بلوم تھے اور صدارت وائس چانسلر یونیورسٹی آف ایجوکیشن، لاہور پروفیسر ڈاکٹر عاکف انور چوہدری نے کی جبکہ امریکن قونصل جنرل، لاہور کرسٹن کے ہاکنز مہمان اعزاز تھیں۔ انگلش ایکسیس پروگرام کے تحت 300 طلبہ وطالبات کو 18 ماہ میں جدید طرز پر کاروباری مہارتیں، روزمرہ زندگی کی مہارتیں، کمیونٹی سروس اور عالمی خدمات پر مبنی تربیت فراہم کی جائے گی۔ ڈیڑھ سالہ پروگرام میں امریکی سفارت خانہ کی طرف سے جاری کردہ تقریباً 3 لاکھ ڈالرز کی گرانٹ سے طلبہ و طالبات کوجدید تعلیمی مواد کتابیں وظائف اور کتب فراہم کی جائیں گی۔
افتتاحی تقریب سے خطاب کرتے ہوئے امریکی سفیر ڈونلڈ بلوم نے کہا یونیورسٹی آف ایجوکیشن نے ماضی میں بھی جدید طرز کے کامیاب پروگرامز منعقد کیے جس کی وجہ سے ہمارا تعلیمی میدان میں رشتہ مزید مضبوط ہو چکا ہے۔ انہوں نے پروگرام کے لئے منتخب ہونے والے طلباء اور یونیورسٹی آف ایجوکیشن، لاہور کے وائس چانسلر کو مبارکباد بھی پیش کی۔ وائس چانسلر پروفیسر ڈاکٹر عاکف انور چوہدری نے تقریب سے خطاب کرتے ہوئے کہا کہ یونیورسٹی اف ایجوکیشن عالمی سطح کی جدید ترین ٹیکنالوجی اور مہارتوں کو اپنے طلبہ وطالبات سے متعارف کرانے پر یقین رکھتی ہے اور انگلش ایکسیس پروگرام اسی مقصد کے لیے ایک اور اہم سنگ میل ہے۔ تقریب سے خطاب کرتے ہوئے پروگرام ڈائریکٹر پروفیسر ڈاکٹر احسن بشیر نے کہا کہ پروگرام سے مستفید ہونے والے طلبہ و طالبات نئے تکنیکی رجحانات اور روزمرہ زندگی کی مہارتوں میں ملکی معیشت کے لیے اہم کردار ہوں گے۔ تقریب میں پروگرام کے طلباء، یونیورسٹی کی اعلی انتظامیہ اور تعلیمی میدان کے نامور عہدے داران نے بھی شرکت کی۔
==============================
