جمعیت علماء اسلام سندھ کے ترجمان ڈاکٹر اے جی انصاری نے کہا ہے کہ دینی مدارس کی رجسٹریشن میں غیر ملکی ایجنڈے کے تحت روکاوٹیں پیدا کی جا رہی ہیں، دینی مدارس علم کے مراکز اور فلاحی ادارے ہیں اور ان کی آزادی پر حملہ کرنے کی سازش کی جا رہی ہے، جے یو آئی کے سربراہ مولانا فضل الرحمن دینی مدارس، علما اور لاکھوں طلبا کے حقیقی نمائندے ہیں جو انسانی حقوق، آزادی اور خودمختاری کی جنگ لڑ رہے ہیں، انہوں نے مزید کہا کہ جمہوری بالادستی اور سیاسی استحکام کے لیے حکومت قومی اسمبلی اور سینیٹ سے منظور شدہ مدارس رجسٹریشن بل کو قانونی شکل دے کر نافذ کرے، انہوں نے کہا کہ نئے قانون کے تحت مدارس کی رجسٹریشن کے نام پر ان کی آزادی پر وار کرنے کی سازش ہو رہی ہے لیکن مدارس کے دفاع کے لیے ہم ہر قسم کی قربانی دینے کے لیے تیار ہیں انہوں نے دریائے سندھ کو زندگی کی علامت قرار دیتے ہوئے کہا کہ سندھو پر نہریں بنانے سے لاکھوں ایکڑ زمین بنجر ہو جائے گی اور یہاں کے کسان تباہ ہو جائیں گے انہوں نے زور دیا کہ اپنی بقا، خوشحالی اور دریائے سندھ کو بچانے کے لیے مشترکہ جدوجہد کی ضرورت ہے۔ ان کا کہنا تھا کہ سندھ دریا پر کسی صورت نہریں نکالنے کی اجازت نہیں دی جائے گی۔
جیکب آباد میں خشک سردی کی لہر، موسمی بیماریوں میں اضافہ، اسپتالوں میں مریضوں کا رش۔ تفصیلات کے مطابق جیکب آباد میں سردی کے ساتھ خشک ہواؤں کے نتیجے میں پیدا ہونے والی موسمی بیماریاں پھیلنا شروع ہوگئیں ہیں، موسمی بیماریوں میں نزلہ، زکام، کھانسی، بخار، سانس کی تکلیف سمیت دیگر بیماریاں شامل ہیں ان سے چھوٹے بڑے سب ہی متا ثر ہورہے ہیں، موسمی بیماریاں پھیلنے کی وجہ سے اسپتالوں میں مریضوں کا رش ہے، طبی ماہرین کا کہنا ہے کہ سردی سے بچاؤکے لیے مناسب احتیاط نہ کرنا نقصان دہ ثابت ہوسکتا ہے طبی ماہرین کے مطابق اس وقت موسمی بیماریوں سے سب سے زیادہ بچے متاثر ہورہے ہیں اس لیے بچوں کو غیر ضروری گھر سے باہر نہ نکالیں، سردی سے بچنے کے لیے گرم کپڑوں کا استعمال لازمی کریں اور متوازن غذا اور پھلوں کے استعمال سے موسمی بیماریوں سے بچایا جا سکتا ہے۔
