9 دسمبر 2024
راولپنڈی
آل پاکستان پرائیویٹ سکولز مینجمنٹ ایسوسی ایشن شمالی پنجاب کے صدر ابرار احمد خان اور ضمیر حیدر قادری نے سی ای۔او ایجوکیشن ڈسٹرکٹ ایجوکیشن اتھارٹی راولپنڈی امان اللہ خان سے ان کے دفتر میں ملاقات کی اور علامہ پیر سید ریاض حسین شاہ کی لکھی ہوئی تفسیر تبصرہ کی 2 جلدیں انھیں پیش کیں۔ امان اللہ خان نے علامہ سید ریاض حسین شاہ کی دینی و علمی خدمات کو شاندار الفاظ میں سراہا اور کہا کہ سید ریاض حسین شاہ کا نام علمی حلقوں میں بڑی عزت و احترام سے لیا جاتا ہے۔ مجھے انکی کتب پڑھنے کا بھی موقع ملا ہے۔ انھوں نے کہا کہ قرآن کریم کی تفاسیر میرے زیر مطالعہ رہتی ہیں۔ امان اللہ خان نے راولپنڈی کو کوالٹی ایجوکیشن اور جدید طریقہ ہائے تدریس سے ہم آہنگ کرنے کے حوالے سے ضلع راولپنڈی کو مثالی ضلع بنانے کے عزم کا اظہار بھی کیا۔
انھوں نے کہا کہ پنجاب حکومت پبلک پرائیویٹ پارٹنرشپ کے تصور پر یقین رکھتی ہے۔ پبلک و پرائیویٹ تعلیمی شعبہ پر یکساں توجہ دینا ہماری پالیسی کا حصہ ہے۔ سرکاری شعبہ تعلیم کے ساتھ ساتھ نجی تعلیمی اداروں کے اساتذہ کو بھی ٹیچنگ ٹریننگ دی جائے گی۔ ابرار احمد خان نے سی۔ای۔او ایجوکیشن کے ویژن کی تعریف کی اور تعلیمی نظام کی بہتری کے لیے اٹھائے گئے حکومتی اقدامات کو مکمل طور پر سپورٹ کرنے کی یقین دھانی کرائی۔ ابرار احمد خان نے کہا کہ ایپسما کے ویژن کے مطابق نوجوان نسل کو تعلیم کے ساتھ ساتھ ٹیکنیکل ایجوکیشن اور خود انحصاری کے جذبے سے سرشار کرکے ملک و ملت کی تعمیر و ترقی کے عمل میں شامل کرنا ہے۔
۔۔۔۔۔۔۔۔۔۔۔۔۔۔۔۔۔۔۔۔
