سنٹر کا مقصد طلبہ کو تعلیم، روزگار اور ذاتی صلاحیتوں میں اضافے کے مواقع فراہم کرنا ہے، مراد علی شاہ
نوجوانوں کی کامیابی سے ہی سندھ اور پاکستان کی خوشحالی جڑی ہے، وزیراعلیٰ سندھ
کراچی ( 5 دسمبر ) وزیراعلیٰ سندھ مراد علی شاہ نے طلبہ کو تعلیم، روزگار اور ذاتی صلاحیتوں میں اضافے کے مواقع فراہم کرنے کےلیے سندھ مدرسۃ الاسلام یونیورسٹی میں پروفیسر حشمت لودھی یوتھ ڈیولپمنٹ سنٹر کا افتتاح کردیا۔
تقریب سے خطاب کرتے ہوئے وزیراعلیٰ سندھ نے سندھ مدرسۃ الاسلام کی قائداعظم محمد علی جناح اور دیگر قومی ہیروز کی مادر عملی ہونے کی شاندار تاریخ کو سراہا۔ انہوں نے دور اندیش قائدین، حریت پسند اور علما پیدا کرنے پر یونیورسٹی کی 140 سالہ تعلیمی خدمات کو خراج تحسین پیش کیا۔
وزیراعلیٰ نے آنجہانی پروفیسر حشمت لودی کو خراج عقیدت پیش کرتے ہوئے ان کی تعلیمی خدمات، تعلیمی معیار میں اضافے کےلیے ان کے کردار، ایک دانشور، کھلاڑی اور میڈیا شخصیت کے طور پر ان کی کامیابیوں کو اجاگر کیا۔ وزیراعلیٰ نے کہا کہ پروفیسر لودھی کا کام آنے والی نسلوں کو متاثر کرے گا اور یہ یوتھ ڈیولپمنٹ سینٹر ان کے وژن اور اقدار کا ثبوت ہے۔
مراد علی شاہ نے سندھ مدسۃ الاسلام یونیورسٹی میں بےپناہ ترقی کےلیے شیخ الجامعہ ڈاکٹر مجیب الدین صحرائی کی بھی تعریف کی اور گذشتہ تین سال کے دوروان طلبہ کے داخلے میں 200 فیصد اضافے ، جدید کمپیوٹر اور اے آئی لیب کے قیام، علامہ آئی آئی قاضی لائیبریری کے قیام اور 11 بین الاقوامی کانفرنسوں کی میزبانی پر انہیں خراج تحسین پیش کیا۔
وزیراعلیٰ سندھ نے غیر نصابی سرگرمیوں کی اہمیت کو بھی اجاگر کیا اورمباحثوں، آرٹس، سماجی خدمات ، ادب ، سائنس، کھیلوں اور کردار سازی کےلیے اسٹوڈنٹ سائٹیز کے کردار کی اہمیت پر بھی زور دیا۔ ان کا کہنا تھا کہ ان اقدامات سے ٹیم ورک ، نظم و ضبط اور طلبہ کو نصاب سے بڑھ کر سیکھنے کے مواقع ملتے ہیں۔
مراد علی شاہ نے طلبہ پر نئے سنٹر کو ذاتی اور پروفیشنل ترقی کےلیے استعمال کرنے پر زور دیتے ہوئے تعلیم اور نوجوانوں کی ترقی کےلیے حکومتی عزم کا اعادہ کیا ۔ وزیراعلیٰ سندھ کا کہنا تھا کہ آپ کی کامیابی سے ہی ملک اور صوبے کی خوشحالی جڑی ہے۔ مل کر ہم خوشحال اور ترقی یافتہ سندھ کی تشکیل کرسکتے ہیں۔
افتتاحی تقریب میں چیرمین ایچ ای سی پروفیسر طارق رفیع ، وائس چانسلر این ای ڈی یونیورسٹی ڈاکٹر سروش لودھی، وائس چانسلر سندھ مدسۃ الاسلام یونیورسٹی ڈاکٹر مجیب صحرائی، سیکریٹری یو اینڈ بی عباس بلوچ، سیکریٹری ایچ ای سی معین خان، حاجی حنیف طیب اور دیگر نے شرکت کی۔
عبدالرشید چنا
میڈیا کنسلٹنٹ، وزیراعلیٰ سندھ
