وزیر اعلیٰ بلوچستان میر سرفراز بگٹی کا افراد باہم معذور کی تعلیمی اسکالرشپ میں سو فیصد اضافے کا اعلان، مکمل سرپرستی کی جائے گی، وزیر اعلٰی بلوچستان میر سرفراز بگٹی کا عالمی یوم معذوران کی تقریب سے خطاب
لئے کوئٹہ، 03 دسمبر
وزیر اعلیٰ بلوچستان میر سرفراز بگٹی نے معذور افراد کی تعلیمی اسکالرشپ میں سو فیصد اضافے کا اعلان کرتے ہوئے کہا ہے کہ صوبائی حکومت معذور افراد کی مکمل سرپرستی اور کفالت کرے گی، منگل کو عالمی یوم معذوران کے حوالے سے منعقدہ تقریب سے خطاب کرتے ہوئے وزیر اعلٰی میر سرفراز بگٹی نے کہا کہ معذوران کی مدد کے لئے “کمک پروگرام” میں وسعت پیدا کی جائے گی ، وزیر اعلیٰ ہاوس کے دروازے معذور افراد کے لئے ہر وقت کھلے ہیں حکومتی پالسیوں میں معذور افراد کی شرکت یقینی بنائیں گے ، انہوں نے محکمہ سماجی بہبود کو ہدایت کی کہ بیس دنوں میں معذور افراد کی فلاح کے لئے قوانین کو حتمی شکل دی جائے بصورت دیگر ذمہ داران کے خلاف کارروائی کی جائے گی انہوں نے کہا کہ معذور افراد کی مکمل سرپرستی کریں گے آئندہ مالی سال میں معذوران کے لئے الگ بجٹ رکھیں گے وزیر اعلٰی نے حکم دیا کہ شاہراہوں سے معذور افراد کی سہولت کے لئے غیر ضروری اسپیڈ بریکر آج ہی ختم کئے جائیں اور انہیں ہر ممکن سہولیات فراہم کی جائیں میر سرفراز بگٹی نے کہا کہ معذور افراد کو کسی صورت تنہا نہیں چھوڑیں گے اور سرکاری ملازمت سمیت ہر شعبہ زندگی میں ان کی مہارت کے مطابق انہیں ترقی کے مواقع فراہم کریں گے انہوں نے کہا کہ معذور خواتین کو آمد و رفت کے لئے پنک اسکوٹی فراہم کی جائیں گی
=====================
کمیشن یا ذاتی مفادات پر مبنی کوئی بھی اسکیم پبلک سیکٹر ڈیویلپمنٹ پروگرام کا حصہ نہیں ہوگی، وزیر اعلٰی بلوچستان میر سرفراز بگٹی کا ترقیاتی منصوبوں کی پیش رفت سے متعلق جائزہ اجلاس میں اظہار خیال
کوئٹہ۔ 03 دسمبر ۔ وزیراعلیٰ بلوچستان میر سرفراز بگٹی کی زیر صدارت بلوچستان میں ترقیاتی منصوبوں پر پیشرفت سے متعلق جائزہ اجلاس منگل کو یہاں چیف منسٹر سیکرٹریٹ میں منعقد ہوا ، اجلاس میں صوبائی وزیر منصوبہ بندی و ترقیات میر ظہور احمد بلیدی، صوبائی وزیر خزانہ میر شعیب احمد نوشیروانی ،چیف سیکرٹری بلوچستان شکیل قادر خان، پرنسیپل سیکرٹری بابر خان، ایڈیشنل چیف سیکرٹری منصوبہ بندی و ترقیات حافظ عبدالباسط ، صوبائی سیکرٹری خزانہ عمران خان زرکون ، ترجمان صوبائی حکومت شاہدرند سمیت دیگر متعلقہ حکام نے شرکت کی۔ اجلاس میں وزیراعلیٰ بلوچستان نے تعلیم اور صحت کے شعبوں میں ترقیاتی منصوبوں پر عمل درآمد میں سست روی پر عدم اطمینان کا اظہار کرتے ہوئے کام کی رفتار تیز کرنے کی ہدایت کی اجلاس میں ضلع واشک کے لیے پانچ سالہ ترقیاتی منصوبوں پر اتفاق کرتے ہوئے پسماندگی کے خاتمے کیلئے جامع حکمت عملی مرتب کرنے کا فیصلہ کیا گیا وزیر اعلٰی نے ہدایت کی کہ گزشتہ سال کی پی ایس ڈی پی میں ہونے والی کمی بیشیوں کو مدنظر رکھتے ہوئے آئندہ سال اسے جامع اور اجتماعی ضروریات سے ہم آہنگ کیا جائے اور ماضی کی غلط روایات کو ختم کر کے پی ایس ڈی پی کے لیے مختص وسائل کو عوام کا معیار زندگی بلند کرنے کے لئے زیر استعمال لایا جائے وزیر اعلٰی نے ہدایت کی کہ صوبائی ترقیاتی پروگرام کی شفافیت کا بہتر طریقے سے جائزہ لینے کے لیے جدید ٹیکنالوجی متعارف کرائی جائے اور ہر مرحلے پر کڑی نظر رکھی جائے انہوں نے واضح کیا کہ کمیشن یا ذاتی مفادات پر مبنی کوئی بھی اسکیم پبلک سیکٹر ڈیویلپمنٹ پروگرام کا حصہ نہیں ہوگی انہوں نے کہا کہ کوئی بھی بابو کسی بھی خلاف ضابطہ اقدام میں ملوث پایا گیا تو سخت کاروائی ہوگی انہوں نے کہا کہ ترقیاتی منصوبوں کے ثمرات عام آدمی تک پہنچانا چاہتے ہیں ہمارا مقصد صوبے کی اجتماعی تعمیر و ترقی ہے جس کے لیے ہم روز اول سے کوشاں ہیں انہوں نے کہا کہ صوبائی ترقیاتی پروگرام میں تمام اضلاع کے لیے خاطر خواہ فنڈز رکھے گئے ہیں اور آئندہ اس میں مزید بہتری لائی جائے گی آئندہ پی ایس ڈی پی میں صوبے کی یکساں ترقی کو مد نظر رکھتے ہوئے ترقیاتی منصوبوں کا حجم برابری کی بنیاد پر طے کیا جائے گا جس کا مقصد صوبہ بھر کے ضلعوں میں مساوی ترقی کا جال بچھاتے ہوئے ہر خاص عوام کو صوبائی ترقیاتی پروگرام سے مستفید کرنا ہے
