(تحریر: نوید انجم فاروقی)
افغانستان کے خلاف ورلڈکپ میں سنچری، بنگلہ دیش کے خلاف سنچری، متحدہ عرب امارات کے خلاف سنچری اور اَب بھارت کے خلاف ایشیا کپ میں خوبصورت سنچری سے اعلان ہو رہا ہے کہ دُنیا کرکٹ کے آسمان پر ایک نیا ستارہ روشن ہو چکا ہے۔ شاہ زیب خان مانسہرہ سے تعلق رکھنے والے اِس انڈر 19 کھلاڑی نے کامیابیوں کے دروازے پر دستک دے دی ہے اور سینئر ٹیم میں آنے کیلئے پَر تول رہا ہے۔
پاکستان ایسا خوش بخت ملک ہے جسے ابتدائی دور سے شاندار کرکٹر ملے ہیں جنہوں نے ابتدائی سیریز سے ہی ریکارڈز قائم کرتے ہوئے کامیابیوں کے جھنڈے گاڑنے شروع کر دیئے۔ حنیف محمد اور فضل محمود سے شروع ہونے والا یہ سلسلہ جاری ہے اور اِب انڈر 19 کھلاڑی شاہ زیب جگمگانے لگا ہے۔ اُس نے بھارت کی خلاف انڈر 19 ایشیاء کپ میں 159 رنز کی شاندار اننگز کھیل کر بہت سوں کی توجہ سمیٹ لی ہے۔اِس ہونہار لڑکے نے اِس اننگز میں پہلے حوصلے سے قدم جمائے، ڈیڑھ سو رنز کی اوپننگ شراکت قائم کی اور پھر بتدریج اپنا سٹرائیک ریٹ بڑھاتے ہوئے تن تنہا ٹیم کو ایک بڑے ٹوٹل تک لے کر گیا، اکثر لڑکے سنچری کے بعد ذمہ داری پوری سمجھتے ہیں لیکن اِس نوجوان نے جس ذمہ داری اور سمجھداری سے جارحانہ انداز میں اپنی اننگ کو آگے بڑھایا، یہ قومی ٹیم کے بلے بازوں میں بھی کم ہی نظر آتا ہے۔ اتنی کم عمر میں ایسی پختگی نایاب ہے۔
شاہ زیب کی اِس شاندار اننگ اور دوسرے اوپنر عثمان خان کے 60 رنز کی مدد سے پاکستان نے281 رنز بنا کر بھارت کی انڈر 19 ٹیم کو 238 رنز پر پویلین بھیج کر 43 رنز کے واضح فرق سے میچ جیت کر بھارت کو دھول چاٹنے پر مجبور کر دیا۔ یہ ایشیا کپ میں پاکستان کی بڑی کامیابی ہے اِس سے ٹیم میں بھرپور اعتماد پیدا ہو گا اور وہ آنے والے میچوں میں مزید بہتر کارکردگی کا مظاہرہ کریں گے۔
