29 نومبر 2024
راولپنڈی
محمد فاروق چوہدری صدر ریسٹورنٹس کیٹرز سویٹس اینڈ بیکرز ایسوسی ایشن چیئرمین ممتاز احمد کی سربراہی میں فوڈ سیکٹر سے منسلک تاجر برادری نے آبگینے خان ڈائریکٹر نارتھ پنجاب فوڈ اتھارٹی اور عدنان اکرم ڈپٹی ڈائریکٹر آپریشنز راولپنڈی سے اہم ملاقات کی،اس موقع پر ان کے ہمراہ نائب صدر ارشد فاروق ،سلیم پرویز بٹ صدر کریانہ ایسوسی ایشن راولپنڈی و سرپرست اعلی پنجاب، ملک وقار صدر فریش ملک ایسوسی ایشن، چوہدری خالد محمود جنرل سیکرٹری فریش ملک ایسوسی ایشن، ظہیر عباس، جاوید راحت صدر میٹ ایسوسی ایشن،خورشید قریشی جنرل سیکرٹری نان بائی ایسوسی ایشن نے خصوصی شرکت کی۔ملاقات کے دوران محمد فاروق چوہدری صدر راولپنڈی ریسٹورنٹس، کیٹرز ،سویٹس اینڈ بیکرز ایسوسی ایشن اور چیئرمین ممتاز احمد نے پنجاب فوڈ اتھارٹی کے منتظمین کو فوڈ ہینڈلرز کے میڈیکل سرٹیفکیٹ، لائسنسنگ، جرمانوں، انسپکشنز سے متعلق مسائل سے تفصیلاً آگاہ کیا ۔علاوہ ازیں خوراک کے عالمی دن کے حوالے سے راولپنڈی ریسٹورنٹس ،کیٹرز ،سویٹس اینڈ بیکرز ایسوسی ایشن کی جانب سے آگاہی سیمینارز کے انعقاد اور پنجاب فوڈ اتھارٹی سے ہر دو ماہ بعد میٹنگ کے انعقاد سے متعلق تجاویز پیش کیں، اس موقع پر سلیم پرویز بٹ صدر کریانہ ایسوسی ایشن راولپنڈی و سرپرست اعلی پنجاب نے کریانہ سے متعلقہ لائسنسنگ، میڈیکل سرٹیفکیٹ کے حوالے سے مسائل سے آگاہ کیا، اسی طرح ملک وقار صدر فریش ملک ایسوسی ایشن نے دودھ کی چیکنگ اور غیر قانونی طور پر تھڑوں پہ بیٹھ کر کھلا دو فروخت کرنے والوں کی نشاندہی کی، خورشید قریشی جنرل سیکرٹری نان بائی ایسوسی ایشن نے بیلن پر ٹیپ لگائے جانے پر پنجاب فوڈ اتھارٹی کی جانب سے جرمانوں کے حوالے سے آگاہ کیا ،جب کہ جاوید راحت صدر میٹ ایسوسی ایشن نے غیر قانونی طور پر گوشت فروخت کرنے والوں کی نشاندہی کی۔اس پر آبگینے خان ڈائریکٹر پنجاب فوڈ اتھارٹی نارتھ نے تمام مسائل کو تفصیلاً سنا اور ان کے حل کےلیے تمام ایسوسی ایشنز کے ساتھ مل کر کام کرنے کی یقین دہانی کروائی ۔
