جیکب آباد کی ڈائری۔
رپورٹ: ایم ڈی عمرانی
جیکب آباد میں ایچ آئی وی ایڈز کے مریضوں کی تعداد میں خطرناک حد تک اضافہ، 30نئے کیس رپورٹ، ضلع بھر میں سینکڑوں بچے، خواتین و مرد ایچ آئی وی ایڈز کے مرض میں مبتلا ہونے کا انکشاف۔ تفصیلات کے مطابق جیکب آباد ضلع میں ایچ آئی وی ایڈز کے کیسز میں تیزی سے اضافہ ہوتا جارہا ہے، جیکب آباد میں ایچ آئی وی ایڈز کے مزید 30کیس رپورٹ ہوئے ہیں، ملنے والی معلومات کے مطابق جمس اسپتال میں قائم اے آر پی سینٹر میں مارچ سے نومبر تک 30نئے کیسز رپورٹ ہوئے ہیں جن میں بچے، خواتین اور مرد شامل ہیں، جبکہ جمس اسپتال میں قائم اے آر پی سینٹر میں اس وقت 132سے زائد مریضوں کا علاج کیا جارہا ہے، جمس اسپتال کے ایک ذمہ دار نے بتایا کہ مارچ سے نومبر تک یہاں 30نئے کیس رپورٹ ہوئے ہیں جبکہ ایک سو سے زائد مریض جن کا علاج لاڑکانہ،رتودیرو اور سکھر سمیت دیگر شہروں میں ہورہا تھا انہیں جیکب آباد کے سینٹر میں ٹرانسفر کیا گیا ہے جن کا علاج جاری ہے، جیکب آباد میں ایچ آئی وی ایڈز کی بڑھتے ہوئے کیسز کی وجہ سے عوام میں خوف و ہراس پھیلا ہوا ہے، سماجی تنظیم تاج ویلفیئر ایسوسی ایشن کے رہنما احمد رند نے بتایا کہ جیکب آباد ضلع میں ایچ آئی وی ایڈز کے کیسز میں خطرناک حد تک اضافہ ہوتا جارہا ہے جس کے لیے عوام میں شعور پیدا کرنے کی ضرورت ہے، انہوں نے کہا کہ تاج ویلفیئر ایسوسی ایشن کی جانب سے ایچ آئی وی ایڈز کے خاتمے کے لیے بیداری مہم چلائی جارہی ہے، اس سلسلے میں ڈپٹی کمشنر اور ڈی ایچ او سے رابطے میں ہیں ان سے اپیل کی ہے کہ جیکب آباد کے سب سے زیادہ متاثرہ علاقوں سومرا شاخ اور یونین کونسل محمد پور اوڈھو میں اسکریننگ کی جائے تاکہ اس بیماری کو روکا جاسکے۔
جیکب آباد جمس اسپتال میں ادویات کی قلت، کرپشن، ایمرجنسی کا شعبہ فعال نہ ہونے کے خلاف پی پی شہید بھٹو کا تیسرے روز بھی احتجاج جاری، احتجاجی مظاہرہ اور بھول ہڑتال۔ تفصیلات کے مطابق جیکب آباد میں پیپلز پارٹی شہید بھٹو کی جانب سے جمس اسپتال میں ادویات کی قلت، مریضوں سے نارواسلوک، کرپشن اور ایمرجنسی کا شعبہ فعال نہ ہونے کے خلاف تیسرے روز بھی احتجاج کا سلسلہ جاری رہا، کارکنان نے ندیم قریشی اور نور محمد منجھو کی قیادت میں جلوس نکال کر جمس اسپتال کے سامنے مظاہرہ کیا اور قائم بھوک ہڑتالی کیمپ پر دو گھنٹوں تک علامتی بھوک ہڑتال کی، اس موقع پر مظاہرین نے جمس انتظامیہ کے خلاف نعریبازی کی، پی پی شہید بھٹو کے رہنماؤں نے کہا کہ جمس اسپتال کی کروڑوں کی بجٹ ہونے کے باوجود علاج، ٹیسٹ اور ادویات کی قلت ہے اور ایمرجنسی کے شعبے کو فعال نہیں کیا جارہا ہے، علاج کے لیے آنے والے مریضوں کو خون کے لیے پریشان کیا جاتا ہے جبکہ زچگی کے لیے آنے والے مریضوں کو واپس کردیا جاتا ہے، انہوں نے کہا کہ سیکورٹی انچارج کو جمس کا مالک بنا دیا گیا ہے جس نے جمس کو تباہ کرنے میں کوئی کسر نہیں چھوڑی، انہوں نے کہا کہ اسپتال کے اندر پارکنگ ہونے کے باوجود باہر غیر قانونی پارکنگ قائم کرکے غریب عوام کو لوٹا رہا ہے، انہوں نے کہا کہ تین روز سے احتجاج کررہے ہیں لیکن کوئی پوچھنے تک نہیں آیا انہوں نے مطالبہ کیا کہ جمس اسپتال کو فائدہ مند بنانے کے لیے کرپٹ عملے کو نکالا جائے اور کرپشن کا سلسلہ بند کرکے عوام کو صحت کی سہولیات فراہم کی جائیں۔
جیکب آباد میں بڑھتی ہوئی بدامنی اور دیگر مسائل کے خلاف سندھ دوست کمیٹی کی جانب سے 26 نومبر کو مشعل بردار ریلی نکالی جائے گی۔ سندھ دوست کمیٹی کے رہنماؤں انتظار چھلگری، سردار خالد جھلن، ندیم قریشی، محمد عالم کھوسو نے شہر کی تمام سیاسی، سماجی، دینی، بیوپاری تنظیموں کے رہنماؤں سے ملاقات کرکے ریلی میں شرکت کی دعوت دی، سندھ دوست کمیٹی کے رہنماؤں نے کہا کہ ضلع میں امن و امان کے قیام سمیت دیگر شہری مسائل کے حل کے لیے 26 نومبر کو مشعل بردار ریلی نکالی جائے گی جس میں شہر کی تمام سیاسی پارٹیوں اور تنظیموں کو دعوت دی گئی ہے اور مسائل کے حل تک ہماری تحریک جاری رہے گی۔
جیکب آباد سرحدی چوکیاں پر تعینات عملے کے مک مکا باعث ہر غیر چیز شھر یا اندرونی۔ سندھ پنجاب اسمگلنگ ہونے کا منہ بولتاثبوت سٹی پولیس کی کاروائی، 800نان کسٹم پیڈ موبائل فونز برآمد کرکے ایک ملزم کو گرفتار کرلیا۔ تفصیلات کے مطابق جیکب آباد کے سٹی تھانہ کی حدود قائد اعظم روڈ پر پولیس نے کاروائی کرتے ہوئے ایک جی ایل آئی گاڑی سے مختلف اقسام کے 800نان کسٹم پیڈ موبائل برآمد کرکے سبی بلوچستان کے رہائشی ایک ملزم جاوید اقبال ابڑو کو گرفتار کرلیا ہے، پولیس ترجمان کے مطابق برآمد کئے گئے موبائل فونز قانونی کاروائی کے بعد کسٹم حکام کے حوالے کردئیے گئے ہیں جبکہ ملزم کے خلاف مقدمہ درج کرلیا گیا ہے۔
