ہینڈ آوٹ
لاہور، 24 نومبر ::صوبائی وزیر اقلیتی امور رمیش سنگھ اروڑہ نے یوحانا آ باد کے رینیئول سینٹر آڈیٹوریم میں “اقلیتی حقوق اور آئینی تحفظ” کے موضوع پر منعقد ہونے والے اہم سیمینار میں شرکت کی۔ سیمینار میں پارلیمانی سیکریٹری برائے انسانی حقوق و اقلیتی امور سونیا آشر، سابق صوبائی وزیر اعجاز عالم آ گسٹین، حکومتی نمائندگان، مذہبی رہنما اور مختلف اقلیتی کمیونٹیوں کے نمائندے موجود تھے۔
سیمینار میں سرچ فار جسٹس کے ایگزیکٹو ڈائریکٹر پیٹر جیکب نے سیمینار کے اغراض و مقاصد پر روشنی ڈالتے ہوئے کہا کہ پاکستان کے آئین کے تحت اقلیتی حقوق کے تحفظ اور ان حقوق کے حوالے سے آگاہی بڑھانے کے لیے ایک اہم پلیٹ فارم فراہم کرنا تھا، تاکہ موجودہ سماجی و سیاسی منظرنامے میں ان حقوق کا تحفظ یقینی بنایا جا سکے۔ انہوں نے اس بات پر زور دیا کہ اس طرح کے فورمز اقلیتی حقوق کے فروغ اور مختلف گروپوں کے درمیان تعاون بڑھانے میں مددگار ثابت ہوتے ہیں۔
اپنے کلیدی خطاب میں صوبائی وزیر رمیش سنگھ اروڑہ نے پنجاب حکومت کے اقلیتی حقوق کے آئینی تحفظ کے عزم کو اجاگر کیا۔ انہوں نے کہا کہ صوبائی حکومت ایک ایسی جامع اور مساوات پر مبنی معاشرے کی تشکیل کے لیے کوشاں ہے جہاں تمام شہریوں کو ان کے مذہب یا نسل سے قطع نظر یکساں حقوق اور مواقع ملیں۔ رمیش اروڑہ نے مزید کہا کہ پنجاب حکومت مذہبی اقلیتیوں کی فلاح کے لیے “مینارٹیز کارڈ” متعارف کرانے جا رہی ہے۔ اس کے علاوہ انہوں نے یہ بھی بتایا کہ اقلیتی امور کا محکمہ پانچ سالہ اسٹریٹجک پلان تیار کر رہا ہے، جو کہ کسی بھی صوبے کا پہلا ایسا منصوبہ ہوگا جس میں اقلیتی حقوق کے تحفظ کے لیے جامع روڈ میپ فراہم کیا جائے گا۔
پارلیمانی سیکریٹری سونیا آشر نے بھی حکومتی اور مذہبی کمیونٹیوں کے مشترکہ اقدامات کو اجاگر کیا اور کہا کہ حکومت اقلیتی مذہبی حقوق کے تحفظ اور ان کی مضبوطی کے لیے پر عزم ہے۔ سابق وزیر اعجاز عالم آگسٹین نے اپنے خطاب میں کہا کہ یہ سیمینار بلاشبہ حکومت پنجاب کی جانب سے پاکستان میں مذہبی اقلیتیوں کے لیے ایک زیادہ جامع اور انصاف پر مبنی معاشرے کی تشکیل کے عزم کی عکاسی کرتا ہے۔
انہوں نے کہا کہ سیمینار میں ہونے والی بات چیت اور تعمیری مکالمے اقلیتی حقوق کے تحفظ کے لیے قانونی اور ادارہ جاتی ڈھانچے کو مضبوط بنانے میں معاون ثابت ہوں گے۔ سیمینار میں مختلف مذہبی اقلیتی کمیونٹیوں کے نمائندوں نے اپنے خیالات کا اظہار کیا اور اپنے کمیونٹیز کو درپیش چیلنجز کے بارے میں بات کی، ساتھ ہی ان کے تحفظ اور انضمام کے لیے ممکنہ حل بھی پیش کیے۔ سیمینار کے اختتام پر وزیر رمیش سنگھ اروڑہ اور دیگر معزز مہمانوں کو اقلیتی حقوق کے تحفظ اور فروغ میں ان کی اہم خدمات کے اعتراف میں یادگاری شیلڈ پیش کی گئیں۔
