کراچی، 22 نومبر 2024:-
وفاقی محتسب سیکرٹریٹ کراچی کے ریجنل انچارج، سینئر ایڈوائزر سید انوار حیدر، محترمہ سیما شکیل سینئر ایڈوائزر اور جناب ریاض احمد ایسوسی ایٹ ایڈوائزر نے 22 نومبر 2024 کو ڈی سی کراچی سینٹرل کے دفتر میں کھلی کچہری کا انعقاد کیا۔
کچہری میں ڈپٹی کمشنر طحہٰ سلیم، پولیس، کے الیکٹرک، نادرا، سوئی گیس، واٹر بورڈ، میونسپل کارپوریشن کے افسران کے علاوہ ضلع وسطی کے مکینوں کی بڑی تعداد نے شرکت کی۔
اس موقع پر وفاقی اداروں سوئی گیس، واٹر بورڈ، کے الیکٹرک، نادرا، میونسپل کارپوریشن اور دیگر اداروں کے خلاف متعدد شکایات درج کروائی گئیں۔ لوگوں کی ایک بڑی تعداد نے سوئی گیس، کے الیکٹرک کی جانب سے بلاجواز بلوں اور گیس، پانی اور بجلی کی عدم دستیابی کے مسائل پر آواز اٹھائی۔ سید انوار حیدر نے متعلقہ محکموں کے افسران کو ہدایت کی کہ وہ عوامی شکایات کا فوری ازالہ کریں اور وفاقی محکموں سے متعلق متعدد مسائل کو موقع پر ہی حل کریں۔ انہوں نے یقین دلایا کہ ڈسٹرکٹ سینٹرل کراچی اور گردونواح کے رہائشیوں کی طرف سے اٹھائے گئے جائز مسائل کو فوری طور پر حل کیا جائے گا۔
اس موقع پر خطاب کرتے ہوئے سینئر مشیر اور انچارج وفاقی محتسب کراچی سید انوار حیدر نے کچہری کی میزبانی کرنے اور عوامی شکایات سننے پر ڈپٹی کمشنر سینٹرل کا شکریہ ادا کیا۔ انہوں نے حاضرین کو بتایا کہ وفاقی محتسب کا قیام 1983 میں عوامی شکایات کے حل اور موثر خدمات کی فراہمی کو یقینی بنانے کے لیے کیا گیا تھا۔ انہوں نے عوام کو یقین دلایا کہ وفاقی محتسب 60 دنوں میں وفاقی اداروں کے خلاف عوام کی شکایات کے ازالے کے لیے موثر انداز میں کام کر رہے ہیں۔ اس کے علاوہ وفاقی محتسب کا دفتر شکایت پر عمل درآمد کو بھی یقینی بناتا ہے۔
انہوں نے عوام کی حوصلہ افزائی کی کہ وہ اس پلیٹ فارم کو وفاقی اداروں کے خلاف اپنی جائز شکایات کے لیے استعمال کریں مزید یہ کہ عوام کی آسانی سے بنیادی سہولیات کی فراہمی کو یقینی بنانے کے لیے اس طرح کی مزید سرگرمیوں کا اہتمام کرنے کا وعدہ کیا۔
اجتماع سے خطاب کرتے ہوئے ڈپٹی کمشنر سینٹرل کراچی نے اپنے دفتر میں اجتماع کے انعقاد پر وفاقی محتسب آفس کا شکریہ ادا کیا اور عوامی شکایات کے حل کے لیے ان کی کوششوں کو سراہا۔
