جیکب آباد میں سانحہ پارا چنار کے خلاف مجلس وحدت مسلمین کی جانب سے احتجاجی مظاہرہ اور دھرنا، وفاقی، صوبائی اور قانون نافذ کرنے والے ادارے سانحہ کے ذمہ دار قرار۔ تفصیلات کے مطابق جیکب آباد میں مجلس وحدت مسلمین کی جانب سے سانحہ پارا چنار کے خلاف ایک احتجاجی جلوس مرکزی رہنما علامہ مقصود علی ڈومکی، سید کامران شاہ، نظیر حسین جعفری، عدیل شجاع اور نثار احمد ویسر کی قیادت میں نکالا گیا، مظاہرین نے سانحہ پارا چنار کے خلاف نعریبازی کرتے ہوئے شہر کی مختلف شاہراہوں پر مارچ کیا اور پریس کلب کے سامن پہنچ کر دھرنا دیا، اس موقع پر مجلس وحدت مسلمین کے مرکزی رہنما علامہ مقصود علی ڈومکی نے خطاب کرتے ہوئے کہا کہ پارا چنار میں بے گناہ مسافروں کا قتل عام ریاستی اداروں کی ناکامی اور نااہلی ہے، پولیس اور فوج کی موجودگی میں دہشت گردوں نے مسافروں کو روک کر 60معصوم لوگوں کو قتل کیا قتل ہونے والوں میں شیر خوار بچے بھی شامل ہیں،
انہوں نے کہا کہ عالمی سازش کے تحت پارا چنار میں فرقیواریت کی آگ لگانے کی کوشش کی جارہی ہے لیکن ہم سمجھتے ہیں کہ یہ شیعہ سنی کا کوئی مسئلہ نہیں بلکہ یہ دشمن کا ایجنڈا ہے، انہوں نے کہا کہ پاکستان میں فرقیواریت کی آگ لگانے کی سازش میں امریکہ، اسرائیل اور بھارت ملوث ہے، انہوں نے کہا کہ عمران خان کے جلسے کو ناکام بنانے اور توجہ ہٹانے کے لیے بے گناہ لوگوں کا قتل عام کیا گیا ہے، ریاستی ادارے بے گناہ لوگوں کا قتل عام بند کریں، انہوں نے کہا کہ دہشت گرد فوج اور ریاست سے زیادہ طاقتور نہیں ہم سمجھتے ہیں کہ دہشت گردوں کو گرین سنگل دیا گیا ہے اس لیے شہر کے اندر گاڑیوں کو روک کر بے گناہ معصوم لوگوں کو قتل کیا گیا، انہوں نے کہا کہ صوبائی و وفاقی حکومتوں سمیت قانون نافذ کرنے والے ادارے سانحہ پارا چنار کے ذمہ دار ہیں، انہوں نے کہا کہ شہداء پارا چنار کے لواحقین اگر ملک بھر میں احتجاج کی کال دیتے ہیں تو ملک بھر میں دھرنے دئیے جائیں گے۔ انہوں نے مطالبہ کیا کہ بے گناہ لوگوں کو قتل کرنے والے دہشت گردوں اور ان کے سہولت کاروں کوگرفتار کرکے بے گناہ لوگوں کا قتل عام بند کیا جائے۔
جیکب آباد
جمعیت علماء اسلام صوبہ سندھ کی مجلس عاملہ کا اہم اجلاس مولانا عبدالقیوم ہالیجوی کی صدارت میں ہوا، اجلاس میں صوبائی جنرل سیکریٹری علامہ راشد محمود سومرو نے 23نومبر کو کراچی میں ہونے والی آل پارٹیز کانفرنس کے متعلق جلاس کو آگاہ کیا، اس موقع پر صوبائی رہنما مفتی سعود افضل، ڈاکٹر اے جی انصاری، مولانا محمد رمضان پھلپوٹو، مولانا محمد اسحاق لغاری، سلیم سندھی بھی موجود تھے۔ اجلاس میں خطاب کرتے ہوئے صوبائی سیکریٹری جنرل علامہ راشد محمود سومرو نے کہا کہ دریائے سندھ سے 6کینال نکالنے اور سندھ کے پانی کی چوری کے خلاف 23نومبر کو کراچی میں آل پارٹیز کانفرنس کا انعقاد کیا جارہا ہے جس میں حکمران جماعتوں سمیت تمام سیاسی و قومپرست جماعتوں کو شرکت کی دعوت دی ہے، آل پارٹیز کانفرنس میں سندھ کے بنیادی مسائل پرغور کیا جائے گا خصوصاً دریائے سندھ پر ڈاکے کے خلاف متفقہ لائحہ عمل تیار کیا جائے گا، راشد محمود سومرو نے کہا کہ جے یو آئی سندھ کے پانی پر ڈاکے کو کسی صورت قبول نہیں کرے گی اس کے لیے ہر محاذ پر جدوجہد کریں گے، اس موقع پر جے یو آئی کے صوبائی ترجمان ڈاکٹر اے جی انصاری نے کہا کہ آل پارٹیز کانفرنس کی میڈیا کوریج کے لیے تمام صحافیوں کو دعوت دی گئی ہے تاکہ صحافی سندھ کے مسائل پر ہونے والی کانفرنس کو مکمل کوریج کرکے ہماری آواز پوری قوم اور اقتدار میں بیٹھے حکمرانوں تک پہنچائیں۔
جیکب آباد کی جمس اسپتال میں سہولیات کے فقدان، ادویات کی قلت اور کرپشن کے خلاف پی پی شہید بھٹو کا احتجاجی مظاہرہ، جمس اسپتال کے گیٹ کے سامنے دھرنا۔ تفصیلات کے مطابق جیکب آباد میں پی پی شہید بھٹو کی جانب سے جمس اسپتال میں سہولیات کے فقدان، ادویات کی قلت اور کرپشن کے خلاف ایک احتجاجی جلوس ندیم قریشی، نورمحمد منجھو کی قیادت میں نکالا گیا، مظاہرین نے جلوس نکال کر شہر میں مارچکیا اور جمس انتظامیہ کے خلاف نعریبازی کی، مظاہرین نے جمس اسپتال کے مین گیٹ کے سامنے پہنچ کر دھرنا دیا جس کے باعث روڈ بلاک اور ٹریفک معطل ہوگئی، اس موقع پر رہنماؤں نے خطاب کرتے ہوئے کہا کہ کروڑوں روپیوں کی بجٹ ہونے کے باوجود مریضوں کو ادویات فراہم نہیں کی جارہی اور سہولیات کا فقدان ہے جبکہ انتظامیہ کی کرپشن سے ادارہ تباہ ہورہا ہے، انہوں نے کہا کہ جمس اسپتال کو ایک سازش کے تحت ناکام بنانے کی کوشش کی جارہی ہے انہوں نے حکام سے مطالبہ کیا کہ جمس اسپتال میں کرپشن کا خاتمہ کرکے ملوث عناصر کے خلاف کاروائی کی جائے اور مریضوں کو ادویات سمیت اسپتال میں سہولیات فراہم کی جائیں بصورت دیگر احتجاج کا دائرہ وسیع کیا جائے گا
جیکب آباد میں ٹماٹر کی قیمت میں ہوشربا اضافہ، 240روپے کلو فروخت کئے جانے لگے۔ تفصیلات کے مطابق جیکب آباد میں گزشتہ ایک ہفتہ سے سبزیوں کی قیمتوں میں اتار چڑھاؤ کا سلسلہ جاری ہے، چند روز پہلے 120روپے فروخت ہونے والے ٹماٹر کی قیمت میں اچانک ہوشربا اضافہ ہوگیا ہے شہر بھر میں ٹماٹر 240روپے کلو فروخت کئے جارہے ہیں، سبزیوں کی قیمتوں میں اضافے نے شہریوں کو پریشان کردیا ہے، شہریوں کا کہنا ہے کہ سبزی منڈی میں موجود مافیا کی ملی بھگت سے سبزیوں کی قیمتوں میں ہوشربا اضافہ کیا گیا ہے، خصوصاً ٹماٹر اور پیاز کی قیمتوں میں اضافہ کرکے عوام کو لوٹا جارہا ہے، شہریوں نے ضلع انتظامیہ سے مطالبہ کیا کہ منافع خوروں کے خلاف کاروائی کرتے ہوئے سبزیوں کی قیمتوں پرکنٹرول کرکے عوام کو رلیف فراہم کیا جائے۔
