ڈاکٹر خالد جاوید جان ”عشق سلامت“ بیا جی (نعمانہ خورشید


ڈاکٹر خالد جاوید جان ”عشق سلامت“
بیا جی (نعمانہ خورشید
ڈاکٹر خالدجاوید جان کسے تعارف دا محتاج نہیں اے۔ ایہہ اپنی نظم ”میں باغی ہوں“ لکھ کے ادبی حلقیاں دے میدان وچ اپنے ناں دا جھنڈا گڈ چُکیا اے۔ اک تقریب وچ مینوں بڑی محبت دے نال اپنی نویں کتاب عشق سلامت دیندیاں آکھا! بیا جی ایہدے تے اپنے وچار وی سانجھ کرنا۔ کتاب پڑھن لئی کھولی تے پہلے کتاب دے مُکھ مہاندرے نے اپنے وَل کھچیا تے لگ پئی ورقے پھولن جیوں جیوں پڑھدی گئی تے ”میں باغی ہوں“ نوں اکا اک وکھ وکھالی دتی کتھے باغیانہ سوچ تے عمل دا کردار تے کتھے عشق دے سمندر دی لہراں نال چھلاں وانگ کنڈیاں نوں پار کردا نظر آیا۔ اُردو دیاں نظماں دے نال نال پنجابی نظماں نوں وی نویاں منزلاں وَل ٹوردا نظر آؤندا اے۔ میں سمجھدی ہاں نظم اردو اے یا پنجابی اپنی اپنی تھاں تے کھلوتیاں اپنا آپ منوا رہیاں نیں پر پنجاب نظم چوں کہ ماں بولی وچ لکھی جاندی پڑھنی تے سمجھنی بہت سوکھی اے۔
ایہناں دیاں نظماں دا انگ تے رنگ دنیا جہان نالوں ایس لئی وکھرا اے کیوں جے ایہناں تے میری ماں بولی زبان اے۔
سچی گل
جسم تے روح
آؤ رَل مِل جیناں سکھیے
نہ دس مینوں مائے نی
سو گلاں دی اکو گل
طبقے
دھیلا
بھلن دی عادت
ماں تے ممتا
میں باغی آں
ایہناں دیاں نظماں دے بوہت سارے سرناویں نظماں نوں ہور وی سوہنا بنا دیندے نیں۔
اصل گل اوس سنیہے دی اے جیڑا خالہ جاوید جان ہوریں لوکاں تیک پہنچانا چاہندے نیں۔
چنگی گل نوں سنن والیاں سلاہیا تے جی آیاں نوں آکھیا اے تے چنگیاں گلاں کسے کتاب وچ اکٹھیاں ہو جان تو کتاب ہرمن پریت ہو جاندی اے۔
خالہ جاوید جان اپنی کتاب واہیں جو سنیہا لوکائی تیک اپڑانا چاہندے نیں اوہناں نے کتاب چھاپ کے اپنا فرض تے عمل ادا کر دتا اے تے پڑھن والیاں دے ہتھ ایہہ کتاب ویکھ کے آکھیا جاسکدا اے پئی جاوید جان ہوراں دی محنت رنگ لے آئی اے۔ اج دے دور وچ کسے دے کم نوں من لیا جاوے تے وڈھی گل اے۔
دس اوئے سچیا ربّا!
اس دھرتی تے بھیجن لگیاں
میتھوں کہ اے پچھیا سی توں
دس اوئے بندیا!
ایہناں مصرعیاں تو لگدا اے کہ شاعر وچ اک باغی بولدا پیا اے۔ جیہڑا اپنا حق سچ دے لئی ربّ نال وی آھڈا لیندا اے۔ دنیا توں سکھ مکدا جاندا اے۔ لوکی مال و زر وی ہوس وچ اک دوجے دے گل نوں وڈھن ڈیئے نیں۔ جیے شاعر اپنے شعراں راہیں گل کردا تے اسیں اوہنوں باغی قرار دے دینے آں۔
پر دسّو ڈاکٹر جاوید جان ہوراں نوں باغی بنایا کنے۔ اوہ تے ایس دھرتی دا معصوم جیہا بندہ سی۔ اوہدے دل و دماغ وچ بغاوت دی بو کنے بھری تے اوہنوں بغاوت تے مجبور ہونا کنے کیتا۔ سچی تے کھڑی گل اے ساڈے نظام نے خالد جاوید جاں ورگیاں نوں مظلوم توں باغی بنا دتا۔
”عشق سلامت“ دے ہر پنے تے موتی کھلرے ہوئے نیں۔ جے تسی ایہہ موتی چُک سکدے او تے چک لو نہیں تے ایہہ موتی اس دھرتی دی مٹی وچ مٹی ہو جان گے۔
”عشق سلامت“ پڑھ کے بہت چنگا لگا کیوں جے کسے نے اپنے دل دی ہواڑ تے کڈی۔ جے اسیں ہن وی نہ سمجھے اپنا حق لین لئی آپ نہ لڑے تے اسیں وی ایہناں موتیاں وانگ مٹی وچ رلدے ای رہاں گے۔
ہور دھخا دے دھونی یارا
لا کے من وچ عشق دا لنبو
ساڑ دے نفرت دے چوبارے
آوے ایہو جئی قیامت
رہ جائے باقی عشق سلامت
ڈاکٹر خالد جاوید جان ہوراں دی پنجابی شاعری وچ تصوف دا رنگ بوہت گوڑھا اے۔ میں ڈاکٹر صاحب ہوراں نوں اس نویں شعری پر اگے دی بوہت بوہت مبارک دینی آں۔

بیا جی (نعمانہ خورشید)