یاسر شاہ نے آسٹریلیا میں زیادہ رنز دینے کی وجہ بتادی

اچی: قومی ٹیم کے لیگ اسپنر یاسر شاہ نے آسٹریلیا میں زیادہ رنز دینے کی وجہ بتادی۔

تفصیلات کے مطابق قومی ٹیم کے لیگ اسپنر یاسر شاہ نے آسٹریلیا میں زیادہ رنز دینے کی وجہ بتاتے ہوئے کہا ہے کہ زیادہ رنز اس لیے دئیے کیونکہ انہوں نے زیادہ بولنگ کرائی تھی۔

یاسر شاہ نے کہا کہ آسٹریلیا کی کنڈیشنز ویسے بھی اسپنرز کے مقابلے میں فاسٹ بولرز کو زیادہ سپورٹ کرتی ہیں اور جب کنڈیشنز سپورٹ نہ کریں تو زیادہ رنز بن جاتے ہیں۔

انہوں نے کہا کہ وہ وکٹیں نہ لینے کی وجہ سے پریشان نہیں یہ کھیل کا حصہ ہے، کبھی کوئی پلیئر ایک دن میں دس وکٹیں لے لیتا ہے اور کبھی اس کو ایک وکٹ بھی نہیں ملتی، اس میں پریشانی والی کوئی بات نہیں ہے۔

یاسر شاہ نے کہا کہ مشتاق احمد کے ساتھ اکیڈمی میں وقت گزارنے کے بعد اعتماد بحال ہوا ہے، مشتاق احمد نے ان کی کافی حوصلہ افزائی کی ہے۔

لیگ اسپنر کا کہنا ہے کہ اکیڈمی میں ایک دن میں 25 سے 30 اوورز کرائے، مشتاق احمد نے ان کے بولنگ ایکشن اور گوگلی پر کام کیا ہے۔

یاسر شاہ نے کہا کہ وہ کراچی ٹیسٹ میں ٹیم کا حصہ ہوں گے اور اگر موقع ملا تو ہوم گراؤنڈ پر پہلے ٹیسٹ میں شاندار پرفارمنس دینے کی کوشش کریں گے۔

یاد رہے کہ یاسر شاہ نے آسٹریلیا کے خلاف ٹیسٹ سیریز میں 400 سے زائد رنز دئیے تھے ان کی خراب فارم ٹیم مینجمنٹ کے لیے تشویش کا باعث بنی ہوئی ہے، پنڈی ٹیسٹ میں ان کو ریلیز کرکے اکیڈمی بھیج دیا گیا تھا جہاں انہوں نے مشتاق احمد کی نگرانی میں بولنگ کرائی۔