وزیر خارجہ اور اسپیکر قومی اسمبلی کی ملاقات

تفصیلات کے مطابق وزیر خارجہ شاہ محمود قریشی اور اسپیکر قومی اسمبلی اسد قیصر کے درمیان ملاقات ہوئی۔ ملاقات میں چیف الیکشن کمشنر اور الیکشن کمیشن کے ارکان کی تعیناتی پر پیشرفت سے متعلق تبادلہ خیال ہوا۔

ملاقات میں الیکشن کمیشن ارکان اور چیف الیکشن کمشنر کا معاملہ افہام و تفہیم سے حل کرنے پر اتفاق کیا گیا۔ معاملے پر تمام سیاسی جماعتوں سے مشاورت جاری رکھنے کا فیصلہ بھی کیا گیا۔

وزیر خارجہ نے اسپیکر کو اپوزیشن سے ہونے والی ملاقات کی تفصیلات سے بھی آگاہ کیا۔ اسپیکر اسد قیصر کا کہنا تھا کہ الیکشن کمیشن کے معاملے کو پارلیمانی سطح پر حل کرنا ضروری ہے۔

انہوں نے کہا کہ اپوزیشن اور حکومت میں معاملے پر اتفاق رائے کے لیے کردار جاری رکھوں گا، تمام سیاسی جماعتوں کو وسیع القلبی کا مظاہرہ کرنا ہوگا۔

وزیر خارجہ نے کہا کہ حکومت الیکشن کمیشن کے معاملے کا افہام و تفہیم سےحل چاہتی ہے۔

دونوں رہنماؤں کی ملاقات میں بھارت کے متنازعہ شہریت بل سے پیدا ہونے والی خطے کی صورتحال پر بھی گفتگو ہوئی۔ وزیر خارجہ شاہ محمود قریشی کا کہنا تھا کہ بھارت کو بے نقاب کرنے کے لیے پارلیمانی سفارت کاری اہم کردار ادا کر سکتی ہے۔