الیکشن کمیشن کی تشکیل پر سپریم کورٹ سے رجوع کرنا بدقسمتی ہوگی: فواد چوہدری

وفاقی وزیر برائے سائنس و ٹیکنالوجی فواد چوہدری نے سماجی رابطے کی ویب سائٹ ٹویٹر پر اپنے ٹویٹ میں کہا کہ الیکشن کمیشن کی تشکیل پر سپریم کورٹ سے رجوع کرنا بدقسمتی ہوگی۔

فواد چوہدری کا کہنا تھا کہ سیاست دان ایک شخص پر اتفاق نہیں کر سکتے تو بڑے مسائل پر کیا اتفاق کریں گے۔ فریقین اپنی پوزیشن میں نرمی لائیں اور فیصلہ کریں۔وفاقی وزیر کا کہنا تھا کہ عمران خان کو ہٹانے کی کوشش پر مولانا فضل الرحمٰن نے منہ کی کھائی، پاکستان میں لیڈر صرف وزیراعظم عمران خان ہی ہیں۔

انہوں نے کہا تھا کہ ہم آپس میں لڑتے رہیں گے اور اختیارات چھیننے کی کوشش کریں گے تو معاملات خراب ہوں گے، جمہوریت میں حکومت اور اپوزیشن کو اپنا کردار ادا کرنا ہوتا ہے۔

فواد چوہدری کا کہنا تھا کہ امید ہے الیکشن کمیشن ممبران اور چیف الیکشن کمشنر کے معاملے پر اتفاق ہوجائے گا، پہلے ایسے موضوعات کو اٹھایا جا رہا ہے جن میں فاصلے کم ہیں۔