اعجاز اسلم کی والد کے انتقال کے بعد پہلی پوسٹ

پاکستان شوبز انڈسٹری کے معروف اداکار اعجاز اسلم نے والد کے انتقال کے بعد سوشل میڈیا پر پہلی پوسٹ شیئر کردی۔

فوٹو اینڈ ویڈیو شیئرنگ ایپ انسٹاگرام پر اعجاز اسلم نے ایک فوٹو کولاج شیئر کیا ہے جو کہ اداکار اور اُن کے مرحوم والد کی یادگار تصویر کی مدد سے بنایا گیا ہے۔
اعجاز اسلم نے اپنی پوسٹ کے کیپشن میں لکھا کہ ’میرے پیارے والد گزشتہ روز انتقال کرگئے۔‘

اداکار نے جذباتی ہوتے ہوئے لکھا کہ ’میں نے اپنا سب سے اچھا دوست اور اپنی طاقت کو کھو دیا ہے۔‘

اُنہوں نے اپنے مداحوں اور دوستوں سے اپیل کرتے ہوئے کہا کہ ’میرے والد کے لیے سورۃ فاتحہ لازمی پڑھیں۔‘
واضح رہے کہ اعجاز اسلم کے والد کے انتقال کی اطلاع اُن کے قریبی دوست اور اداکار فیصل قریشی نے اپنے سوشل میڈیا پیغام کے ذریعے دی تھی۔