دس منزلہ عمارت ایک دن میں تعمیرکر دی گئی-چینی کمپنی نے 28 گھنٹوں کے وقت میں دس منزلہ عمارت تعمیر کرکے حیران کر دیا


چین میں صرف 28 گھنٹوں میں ایک دس منزلہ رہائشی عمارت کھڑی کردی گئی ہے۔ لیکن یاد رہے کہ عمارت کے کمرے اور گوشے پہلے سے ہی ایک بہت بڑے کارخانے میں ڈھالے جاتے ہیں اور انہیں ٹرکوں پر رکھ کرعمارت کے مقام تک لے جایا جاتا ہے۔ وہاں تمام گوشوں کو ایک جگہ جمع کرکے نٹ اور بولٹس سے جوڑا جاتا ہے۔ چینی کمپنی براڈ گروپ اس کام میں ماہر ہے جس نے یہ نیا کارنامہ انجام دیا ہے۔
اس سے قبل براڈ گروپ کئی ہسپتال، ہوٹل اور گھر بناچکی ہے۔کنسٹرکشن کمپنی کے ترجمان کے مطابق عمارت کے تمام حصوں کو ایک جگہ پہنچایا گیا جہاں کرینوں اور مزدوروں کی مدد سے 28 گھنٹوں اور 45 منٹ میں پوری عمارت اسمبل کی گئی ہے۔ یہ کام گاڑیوں کے کارخانے جیسا ہے جس میں اسمبلی لائن پر تمام پرزے اور آلات جمع کرکے آخرکار گاڑی تیار ہوجاتی ہے۔
اس میں بلڈنگ کا ہر حصہ، مثلاً بالکنی، غسل خانے اور کمرے وغیرہ یکساں جسامت کے بنائے گئے ہیں جنہیں ماڈیول کہا جاسکتا ہے۔

انہیں فولڈ کرکے ٹرکوں میں رکھا جاتا ہے اور مطلوبہ مقام تک پہنچایا جاتا ہے۔ ہرماڈیول کا ڈھانچہ اسٹین لیس اسٹیل سے بنایا گیا ہے جس میں وائرنگ، انسولیشن، وینٹی لیشن اور دیگر سہولیات رکھی جاتی ہیں۔ پھر ان کے ڈھیر لگا کر انہیں نٹ بولٹ سے جوڑکر پانی اور سیوریج کی لائنیں ڈالی جاتی ہیں۔کمپنی کے مطابق پورا اسٹرکچر زلزلے کو برداشت کرسکتا ہے، حسبِ ضرورت اسے کھول کر دوبارہ بکھیر کر کسی دوسرے مقام تک لے جایا جاسکتا ہے۔
دلچسپ بات یہ ہے کہ اسی طریقے سے 200 میٹر بلند عمارت بآسانی بنائی جاسکتی ہے۔ چین میں اس قسم کے ناقابل یقین واقعات اکثر دیکھنے کو ملتے ہیں مگر ایک ہی دن میں دس منزلہ عمارت کو اس طرح سے تیار کرنا کہ اس میں رہائش بھی ممکن ہو جائے یہ پہلی بار دیکھنے کو آیا ہے اور اس بلڈنگ کی تیاری کو سوشل میڈیا پر خوب ٹرول کیا جا رہا ہے۔

https://www.urdupoint.com/daily/livenews/2021-06-18/news-2832977.html