برنالہ ( نیوز رپورٹر)ضلع بھمبر کی تحصیل برنالہ سے آزاد حیثیت میں انتخابات میں حصہ لینے اور عوام کا بڑا مینڈیٹ لینے والے امیدوار اسمبلی محمد مالک اور انکے بھانجے راحیل ملک کے خلاف جھوٹہ مقدمہ قائم کرنے کے خلاف اہلیان برنالہ نے آواز بلند کر دی، بھمبر ضلع کی تحصیل برنالہ کی سیاسی، سماجی، کاروباری، وکلاء برادری سمیت ہر مکتبۂ فکر سے تعلق رکھنے والے نمایاں اور بااثر افراد نے انتہائی سخت مؤقف اختیار کرتے ہوئے کہا ہے کہ محمد مالک پر پوری زندگی کوئی مقدمہ کبھی نہیں بنا، دیانت داری، شفافیت اور عوامی خدمت کے لیے جانے جانے والے سیاسی و سماجی رہنماء کے خلاف جھوٹے، بے بنیاد اور سیاسی انتقام پر مبنی مقدمہ قائم کرنا نہ صرف گھناؤنی سازش ہے بلکہ عوامی مینڈیٹ، انصاف اور قانون کی توہین بھی ہے۔ معروف شخصیات ملک خادم حسین ، ڈاکٹر محمد خلیل ، نازک گل محمد ، محمد جمیل و دیگر نے کہا کہ گزشتہ کئی ماہ سے پولیس اور انتظامی اداروں کو استعمال کرکے قتل جیسے سنگین مگر من گھڑت مقدمے میں پھنسانے کی کوشش ایک خطرناک کھیل ہے جس کے سنگین نتائج برآمد ہو سکتے ہیں۔ برنالہ کے عوام اس ظلم، ناانصافی اور ریاستی اختیارات کے غلط استعمال کو کسی قیمت پر قبول نہیں کریں گے۔ انہوں نے صدر آزاد کشمیر، وزیراعظم آزاد کشمیر، چیف جسٹس سپریم کورٹ، چیف جسٹس ہائی کورٹ، آئی جی پولیس آزاد کشمیر کے ساتھ ساتھ متعلقہ عسکری اداروں سے اپیل کرتے ہوئے کہا کہ اس پوری سازش کا فوری نوٹس لیا جائے، ذمہ دار عناصر کی نشاندہی کی جائے، اور محمد مالک اور ان کے بھانجے راحیل ملک کے خلاف قائم جھوٹہ مقدمہ فی الفور ختم کیے جائیں۔ انہوں نے اس بات پر بھی زور دیا کہ اس مسئلے کی غیر جانبدار، اعلیٰ سطحی اور مکمل شفاف تحقیقات کسی آزاد ٹیم کے ذریعے کرائی جائیں تاکہ سچائی سامنے آئے اور اس منظم سازش کے پیچھے موجود ہاتھ بے نقاب ہوسکیں۔ انہوں نے کہا کہ برنالہ کے عوام نہ جھکیں گے، نہ ڈریں گے، اور اپنے نمائندے محمد مالک کے خلاف ہونے والی کسی بھی زیادتی، سیاسی انتقام یا ریاستی جبر کے سامنے سینہ سپر رہیں گے۔ ہم حق کے لیے کھڑے ہیں، ہم انصاف کا مطالبہ کرتے ہیں، اور ہم اپنی قیادت کے خلاف کسی بھی سازش کو بری طرح ناکام بنائیں گے۔
