گلگت۔
منیجنگ ڈائریکٹر نیٹکو اور سابق ایڈیشنل چیف سیکریٹری گلگت بلتستان عزیز احمد جمالی کے اعزاز میں ایک پروقار الوداعی تقریب کا انعقاد کیا گیا، جس میں چیف سیکریٹری گلگت بلتستان ابرار احمد مرزا سمیت مختلف محکموں کے سیکریٹریز، اعلیٰ حکام اور افسران نے شرکت کی۔
اس موقع پر چیف سیکریٹری گلگت بلتستان ابرار احمد مرزا نے ان کی خدمات کو بھرپور انداز میں سراہتے ہوئے کہا کہ عزیز احمد جمالی ایک زیرک، مخلص اور اعلیٰ انتظامی صلاحیتوں کے حامل افسر ہیں۔ انہوں نے اپنی ذمہ داریوں کو ہمیشہ پیشہ ورانہ انداز، دیانت داری اور تمام اسٹیک ہولڈرز کے ساتھ بہترین روابط کے ساتھ نبھایا۔ گلگت بلتستان میں اپنے عرصہ تعیناتی کے دوران انہوں نے انتظامی استحکام، ادارہ جاتی مضبوطی اور عوامی خدمت کے جس جذبے کا مظاہرہ کیا، وہ قابل تحسین ہے۔ ان کی خدمات نہ صرف انتظامیہ کے لیے ایک مثال ہیں بلکہ نوجوان افسران کے لیے بھی مشعل راہ ہیں۔ ہم اُن کے مستقبل کے لیے نیک خواہشات کا اظہار کرتے ہیں اور امید کرتے ہیں کہ وہ جہاں بھی جائیں گے اپنی صلاحیتوں سے اداروں کی مضبوطی اور عوامی فلاح میں اہم کردار ادا کرتے رہیں گے۔
تقریب سے خطاب کرتے ہوئے منیجنگ ڈائریکٹر نیٹکو و سابق ایڈیشنل چیف سیکریٹری عزیز احمد جمالی نے کہا کہ گلگت بلتستان میں خدمات کی ادائیگی میرے لیے اعزاز سے کم نہیں رہی۔ یہاں کے عوام کی خلوص، انتظامیہ کی ٹیم ورک اور افسران کی محنت نے ہمیشہ مجھے بہترین پالیسی فیصلے کرنے میں مدد دی۔ میں چیف سیکریٹری، تمام ساتھی افسران اور ٹیم کا شکر گزار ہوں جنہوں نے تعاون اور اعتماد کے ساتھ مجھے اپنے فرائض موثر طریقے سے انجام دینے کا موقع فراہم کیا۔ میں یہاں گزارے گئے وقت کو ہمیشہ اچھے الفاظ میں یاد رکھوں گا اور امید کرتا ہوں کہ ادارے اسی جذبے اور تسلسل کے ساتھ ترقی کی راہ پر گامزن رہیں گے۔تقریب کے اختتام پر چیف سیکریٹری گلگت بلتستان سمیت دیگر سیکریٹریز اور اعلیٰ افسران نے عزیز احمد جمالی کو یادگاری تحائف اور شیلڈز پیش کیں، اور ان کی خدمات کو شاندار الفاظ میں خراجِ تحسین پیش کیا۔
Office of the Chief Secretary, Gilgit Baltistan
Planning & Development Department GB
