پاکستان کی معروف اداکارہ ماہرہ خان نے بالی وڈ کے سپر اسٹار شاہ رخ خان کو نہ صرف عاجز بلکہ اپنے فن سے محبت کرنے والا قرار دیا ہے۔
اپنی آنے والی فلم ’نیلوفر‘ کی پروموشن کے سلسلے میں اینکر منصور علی خان کو دیے گئے ایک انٹرویو میں ماہرہ خان نے کہا کہ بڑے فنکاروں میں ہمیشہ عاجزی، پروفیشنل رویہ اور اپنے کام سے بے پناہ محبت پائی جاتی ہے، اور انہوں نے یہ خصوصیات شاہ رخ خان میں کام کے دوران دیکھی۔
ماہرہ خان نے مزید کہا کہ چاہے بات شاہ رخ خان کی ہو یا پاکستان کے ہمایوں سعید، فواد خان یا فہد مصطفیٰ کی، ان سب میں مشترکہ خوبی ان کی عاجزی اور پروفیشنلزم ہے، جو انہیں سپر اسٹار بناتی ہے۔
اپنی پسندیدہ اداکاروں کے بارے میں بات کرتے ہوئے ماہرہ خان نے کہا کہ ان کی پسندیدہ خواتین اداکار شہناز شیخ، صنم بلوچ اور سجل علی ہیں، جبکہ مرد اداکاروں میں فہد مصطفیٰ، ہمایوں سعید اور فواد خان ان کی پہلی ترجیح ہیں۔
ماہرہ خان نے کہا کہ چونکہ وہ کراچی میں پیدا ہوئی ہیں، اس لیے اردو پر ان کا کنٹرول بہت اچھا ہے، اور انگریزی کا استعمال وہ کام کے مطابق کرتی ہیں۔ بھارت میں کام کے دوران انہیں مقامی زبانیں جیسے گجراتی بولنے کا بھی تجربہ ہوا، جس سے انہیں کافی کچھ سیکھنے کو ملا۔
ٹی وی ڈراموں میں کم نظر آنے کے حوالے سے ماہرہ نے کہا کہ ان کی توجہ زیادہ تر اپنے بیٹے اذلان کی تعلیم پر ہوتی ہے، جس کی وجہ سے زیادہ وقت نہیں ملتا۔ وہ خود بھی امتحانات کی تیاری میں بیٹے کے ساتھ بیٹھ کر پڑھتی ہیں، اور ایسا لگتا ہے جیسے وہ خود بھی امتحان دے رہی ہوں۔
