سندھ حکومت کے زیر اہتمام منعقدہ سندھ ای اسپورٹس چیمپئن شپ کا شاندار اختتام ہوا، جہاں ویلورینٹ گیم کا ٹائٹل ٹیم گیم تھیوری نے اپنے نام کر لیا

سندھ حکومت کے زیر اہتمام منعقدہ سندھ ای اسپورٹس چیمپئن شپ کا شاندار اختتام ہوا، جہاں ویلورینٹ گیم کا ٹائٹل ٹیم گیم تھیوری نے اپنے نام کر لیا۔
ای اسپورٹس کے دلچسپ مقابلوں میں ٹیم لیجن نے دوسرے راؤنڈ میں ٹیم واہ واہ کو شکست دے کر 5 لاکھ روپے نقد انعام اور ٹرافی حاصل کی۔
تقریب میں اعلان کیا گیا کہ پہلی فائنل جیتنے والی ٹیم کو 5 لاکھ جبکہ دوسری پوزیشن حاصل کرنے والی دونوں ٹیموں کو ڈھائی ڈھائی لاکھ روپے نقد انعام دیا گیا، جبکہ چیمپئن شپ کے لئے مجموعی انعامی رقم 15 لاکھ روپے رکھی گئی تھی۔
انعامات کی تقسیم مہمان خصوصی وزیر کھیل سندھ سردار محمد بخش مہر اور سیکریٹری کھیل منور علی مہیسر نے کی۔
تقریب میں وزیراعلیٰ سندھ کے معاون خصوصی راجویر سنگھ سوڈھا، جنید بلند، پارلیمانی سیکریٹری صائمہ آغا، ڈائریکٹر اسپورٹس اسد اسحاق، سندھ بینک کے سید اسد شاہ، ڈپٹی ڈائریکٹر حبیب اللہ، ڈی ایس او فرید علی اور کراچی کے تمام ڈی ایس اوز سمیت ہزاروں نوجوانوں نے شرکت کی۔
تقریب سے خطاب کرتے ہوئے سردار محمد بخش مہر نے کہا کہ ای اسپورٹس چیمپئن شپ کا انعقاد چیئرمین بلاول بھٹو زرداری کے وژن کا حصہ ہے۔ سیاسی مصروفیات کے باعث بلاول بھٹو تقریب میں شریک نہ ہوسکے، اس ایونٹ میں 400 سے زائد ٹیموں اور 2500 کھلاڑیوں نے حصہ لیا۔
وزیر کھیل سردار محمد بخش مہر نے اعلان کیا کہ ای اسپورٹس چیمپئن شپ کو مستقل بنیادوں پر سالانہ کلینڈر میں شامل کیا جائے گا، اور اس سے بھی بڑا ایونٹ منعقد کیا جائیگا، جبکہ اگلے ایونٹ میں 15 لاکھ روپے کی انعامی رقم میں اضافہ بھی کیا جائے گا۔
وزیر کھیل نے کہا کہ نیشنل گیمز آئندہ کراچی کے ساتھ ساتھ صوبہ کے دیگر شہروں میں بھی منعقد کرائے جائیں گے، پارٹی چیئرمین بلاول بھٹو کا یقین ہے کہ ای اسپورٹس مستقبل میں ایک بڑی انڈسٹری بن سکتی ہے، اسی لیے سندھ حکومت نوجوانوں کے لیے اس پلیٹ فارم کو مضبوط بنا رہی ہے.
وزیر کھیل سندھ سردار محمد بخش مہر نے فائنل جیتنے والی ٹیموں میں کیش انعامات، ٹرافیاں اور میڈلز تقسیم کیے۔ اور خود بھی کچھ وقت ای اسپورٹس گیم کھیلے،