صوبائی وزیر ورکس اینڈ سروسز و جیل خانہ جات علی حسن زرداری نے کراچی کے علاقے چنیسر گوٹھ اور ڈسٹرکٹ ملیر کے علاقے کاٹھوڑ میں زیرِ تعمیر ہسپتالوں کا تفصیلی معائنہ کیا، دونوں مقامات پر جاری ترقیاتی منصوبوں کے حوالے سے متعلقہ افسران نے صوبائی وزیر کو بریفنگ دی
چنیسر گوٹھ کے دورے کے دوران صوبائی وزیر نے تعمیراتی سرگرمیوں کی رفتار اور معیار کا جائزہ لیا اور افسران کو ہدایت کی کہ منصوبہ مقررہ مدت میں مکمل کیا جائے تاکہ علاقے کے رہائشیوں کو معیاری طبی سہولیات فراہم کی جاسکیں، انہوں نے کہا کہ سندھ حکومت صحت کے شعبے کی بہتری کو اپنی اولین ترجیح سمجھتی ہے،
بعدازاں صوبائی وزیر نے کاٹھوڑ میں زیرِ تعمیر ہسپتال کا دورہ کیا، جہاں افسران نے تعمیراتی مراحل اور مستقبل کی منصوبہ بندی پر تفصیلی بریفنگ دی، علی حسن زرداری نے جاری کام کی رفتار پر اطمینان کا اظہار کرتے ہوئے کہا کہ تعمیر کے معیار پر کسی قسم کا سمجھوتہ قابل قبول نہیں، انہوں نے ہدایت کی کہ منصوبہ بروقت مکمل کیا جائے تاکہ کاٹھوڑ اور قریبی علاقوں کے عوام کو بہتر طبی سہولیات میسر آ سکیں،
صوبائی وزیر نے ہسپتال کے مختلف حصوں کا دورہ کیا، تعمیراتی ٹیم کو ضروری ہدایات جاری کیں، جبکہ ڈیوٹی پر موجود ڈاکٹرز اور میڈیکل اسٹاف سے ملاقات کرکے ہسپتال سے متعلق اہم معلومات بھی حاصل کیں.
