ایک نئی ڈاکیومنٹری میں دعویٰ کیا گیا ہے کہ امریکا کے سابق صدر جارج ایچ ڈبلیو بش کو 1964 میں نیو میکسیکو کے ہولومن ایئر فورس بیس پر غیر ملکی خلائی مخلوق کے ساتھ ملاقات کے بارے میں آگاہ کیا گیا تھا۔ تاہم، اس دعوے کے حق میں کوئی ٹھوس ثبوت پیش نہیں کیا گیا۔
غیر ملکی میڈیا رپورٹس کے مطابق، ڈاکیومنٹری میں ماہر فلکیات ایرک ڈیوس کا انٹرویو شامل ہے، جن کا کہنا تھا کہ سابق صدر نے 2003 میں نجی گفتگو کے دوران اس واقعے کا ذکر کیا تھا۔
رپورٹ کے مطابق، جارج ایچ ڈبلیو بش نے بتایا کہ تین خلائی جہاز بیس کے قریب آئے اور ایک نے لینڈ کیا۔ اس جہاز سے ایک غیر انسانی ہستی (خلائی مخلوق) اتر کر یونیفارم پہنے فضائی اور سول اہلکاروں کے ساتھ رابطہ قائم کرتی ہے۔
ماہر طبیعیات ہال پٹھوف نے ڈاکیومنٹری میں مزید بتایا کہ مختلف اقسام کی خلائی مخلوقات کے کچھ نمونے بھی حاصل کیے گئے ہیں۔ اسٹینفورڈ یونیورسٹی کے ماہر گیری نولان نے فوجی اہلکاروں کے زخموں کا ذکر کیا، جو نامعلوم فضائی مظاہر سے رابطے کے بعد شدید جلنے اور اندرونی چوٹوں کا شکار ہوئے تھے۔
ہدایتکار ڈین فراہ کے مطابق، یہ فلم خلائی مخلوق کے راز فاش کرنے کے عمل کو تیز کرے گی اور کسی صدر کو اعتماد دے گی کہ وہ عوام کے سامنے خلائی زندگی کے وجود کو تسلیم کر سکے۔
انہوں نے کہا کہ یہ فلم ہمیں ایک نئے زاویے سے سوچنے پر مجبور کرتی ہے اور صدر کے لیے ماحول تیار کرتی ہے تاکہ وہ سب کو باور کرا سکیں کہ ہم کائنات میں اکیلے نہیں ہیں اور دیگر مخلوقات بھی موجود ہیں۔
