کراچی(اسٹاف رپورٹر)کراچی واٹر اینڈ سیوریج کارپوریشن نے نومبر 2025 کے دوران شہر کے مختلف واٹر پمپنگ اسٹیشنز پر بجلی کی بندش کے باعث پانی کی کمی کے اعداد و شمار جاری کر دیے۔ ترجمان واٹر کارپوریشن کے مطابق نومبر میں کے الیکٹرک کی مسلسل بجلی کی بندش کے نتیجے میں شہر کو مجموعی طور پر 884 ملین گیلن پانی کی کمی کا سامنا کرنا پڑا۔ ترجمان نے بتایا کہ دھابیجی پمپنگ اسٹیشن میں 132 گھنٹے 20 منٹ کی بجلی معطلی کے باعث 424 ملین گیلن پانی کی کمی ہوئی۔ اسی طرح ڈملوٹی اسٹیشن میں 146 گھنٹے کی بندش سے 111 ملین گیلن پانی کی کمی ریکارڈ کی گئی۔ نارتھ ایسٹ کراچی پمپنگ اسٹیشن میں پانی کی کمی 335 ملین گیلن رہی جبکہ حب اور پپری اسٹیشنز میں 6-6 ملین گیلن اور گھارو اسٹیشن میں 2 ملین گیلن پانی کی کمی ہوئی۔ اس موقع پر واٹر کارپوریشن کے حکام کا کہنا تھا کہ نومبر میں مسلسل بجلی کی بندش کے باعث مرکزی پمپنگ اسٹیشنز پر آپریشن کئی گھنٹوں تک رکے رہے، جس کی وجہ سے شہر میں پانی کی فراہمی متاثر ہوئی۔ حکام نے کے الیکٹرک انتظامیہ سے مطالبہ کرتے ہوئے کہا کہ مرکزی پمپنگ اسٹیشنز کے لیے مستقل، مستحکم اور بلا تعطل بجلی کی فراہمی کو یقینی بنانے کے فوری اقدامات کیے جائیں۔ انہوں نے کہا بار بار کیبل فالٹس کی وجہ سے پمپنگ مشینری کو پہنچنے والے نقصانات کا بھی سنجیدگی سے نوٹس لیا جائے اور مرکزی پمپنگ اسٹیشنز میں متبادل فیڈرز، اسٹینڈ بائی کیبلز اور تکنیکی اپ گریڈیشن جیسے اقدامات ناگزیر ہیں تاکہ مستقبل میں شہر میں پانی کی فراہمی کے نظام کو ہر قسم کی رکاوٹ سے محفوظ بنایا جا سکے۔ ترجمان نے مزید کہا کہ واٹر کارپوریشن شہریوں کو بلا تعطل پانی کی فراہمی کے لیے کے الیکٹرک کے ساتھ قریبی رابطے اور مربوط تعاون جاری رکھے ہوئے ہے۔ انہوں نے بتایا کے الیکٹرک کی جانب سے بجلی کی بحالی کے بعد شہر بھر میں پانی کی فراہمی مکمل طور پر معمول پر آگئی ہے۔ ترجمان کے مطابق پانی کی فراہمی کے نظام میں مزید بہتری کے لیے تمام ممکنہ اقدامات کیے جا رہے ہیں تاکہ شہریوں کو پانی کی مسلسل فراہمی میں کوئی دشواری پیش نہ آئے اور شہر کی ضروریات پوری کی جا سکیں۔
