کراچی22 نومبر ۔ فوڈ اینڈ ایگریکلچر آرگنائزیشن (ایف اے او) کے اعلیٰ سطحی وفد نے وزیر آبپاشی سندھ جام خان شورو اور سیکریٹری آبپاشی ظریف اقبال کھیڑو سے اہم ملاقات کی۔ ملاقات میں زرعی شعبے میں جدید ٹیکنالوجی کے استعمال، پانی کے مؤثر انتظام اور باہمی تعاون کے حوالے سے تفصیلی بات چیت کی گئی۔وفد میں ایشیا و پیسفک ریجنل آفس کے لینڈ اینڈ واٹر آفیسر مسٹر ولید حسن ابو الحسن، سینئر واٹر اینڈ لینڈ آفیسر ڈاکٹر روبینہ وہاج سمیت دیگر ماہرین شامل تھے۔ایف اے او کے وفد نے محکمہ آبپاشی کے ہائیڈرو اِنفارمیٹک سینٹر اور کوٹری بیراج کا دورہ بھی کیا، جہاں انہیں جدید مانیٹرنگ سسٹمز، تکنیکی ڈھانچے، ڈیٹا بیسڈ مینجمنٹ اور آن لائن مانیٹرنگ سسٹمز کے بارے میں تفصیلی بریفنگ دی گئی۔ملاقات میں محکمہ آبپاشی سندھ کے فعال مانیٹرنگ سسٹمز اور ایف اے او کے زیرِ تعمیر “ایکیا پورٹل” کے باہمی ربط اور اس کی افادیت پر بھی گفتگو کی گئی۔وزیر آبپاشی جام خان شورو نے وفد کو بتایا کہ ایکیا پورٹل کا مقصد صوبے بھر کے کسانوں کو ریئل ٹائم معلومات فراہم کرنا ہے، 
جس سے زرعی فیصلے بہتر ہوں گے، پیداوار میں اضافہ ہوگا اور پانی کے مؤثر استعمال کو فروغ ملے گا۔ انہوں نے کہا کہ یہ پورٹل سندھ کے زرعی شعبے کی پائیدار ترقی کے لیے نہایت اہم پیش رفت ثابت ہوگا، جس کے ذریعے کسان سائنسی بنیادوں پر بہتر فیصلے کر سکیں گے۔سیکریٹری آبپاشی ظریف اقبال کھیڑو نے وفد کو ہائیڈرو اِنفارمیٹک سینٹر میں موجود جدید ٹیکنالوجی، ڈیٹا مینجمنٹ، ریموٹ سینسنگ اور آن لائن مانیٹرنگ سسٹمز پر بھی جامع بریفنگ دی۔ایف اے او کے وفد نے سندھ حکومت کے تکنیکی اقدامات اور جدید زرعی حکمتِ عملیوں کی تعریف کرتے ہوئے مستقبل میں مکمل تعاون کی یقین دہانی کرائی. 
وزیر آبپاشی جام خان شورو نے وفد کو یقین دلایا کہ حکومتِ سندھ زراعت کی ترقی اور پانی کے مؤثر استعمال کے لیے مکمل عزم اور وابستگی رکھتی ہے. ملاقات کے اختتام پر وزیر آبپاشی جام خان شورو نے مہمان وفد کو روایتی سندھی اجرک کا تحفہ پیش کیا اور احترام کے ساتھ انہیں اجرک پہنائی، جس پر مہمانوں نے خوشی اور شکریہ کا اظہار کیا۔
ہینڈ آؤٹ نمبر 1310۔۔۔۔آئی ایس
