ہمیشہ یہ دیکھا گیا ہے کہ جو شخص مار کھاتا ہے، وہی روتا ہے۔ بالی وُڈ کی نئی ایکشن فلم ’دھریندر‘ (Dhurandhar) کا ٹریلر جاری کر دیا گیا ہے، جسے دیکھ کر لگتا ہے کہ غمِ رافل ابھی ختم نہیں ہوا۔
اس فلم کی کہانی کا مرکزی مقام بھارت نہیں بلکہ کراچی کی سب سے بڑی کچی آبادی سمجھی جانے والی ’لیاری‘ ہے۔ بھارت کی جانب سے پاکستان اور اسلام کے خلاف باتیں کرنا کوئی نئی بات نہیں، خاص طور پر پلوامہ حملے کے بعد اس نے شدت اختیار کر لی۔
میڈیا اور سیاستدانوں کے بعد جب یہ جذبات فلم انڈسٹری تک پہنچے تو بالی وُڈ نے سب سے زیادہ “دیش بھگتی” دکھائی۔ پہلے مسلمانوں کی تاریخ پر حملے ہوئے، ’چھاوا‘، ’پدماوت‘ اور ’پانی پت‘ جیسی فلموں میں مغل بادشاہ اورنگزیب، دہلی کے سلطان علاء الدین خلجی اور درانی سلطنت کے بانی احمد شاہ ابدالی کو ہدف بنایا گیا۔ جب یہ قبول نہ ہوا تو ’اُڑی‘ اور ’فائٹر‘ جیسی فلمیں تیار کی گئیں، جن میں حقیقت کی کمی تھی۔
’اُڑی‘ کے ہدایت کار نے اب ’لیاری گینگ وار‘ پر فلم بنائی۔ ’چھاوا‘ سے اکشے کھنہ، ’پدماوت‘ سے رنویر سنگھ اور ’پانی پت‘ سے سنجے دت کو لے کر یہ ثابت کیا گیا کہ بھارت کے پاس اپنی کہانیاں ختم ہو چکی ہیں۔
اس فلم میں بدنامِ زمانہ رحمٰن ڈکیت کا کردار اکشے کھنہ نے نبھایا ہے، رنویر سنگھ بھارتی جاسوس کے روپ میں ہیں اور چوہدری اسلم کا کردار سنجے دت نے ادا کیا ہے۔
رنویر سنگھ کی پچھلی فلمیں ’83‘ اور ’سرکس‘ ناکام ہونے کے بعد ان کا کیریئر رنبیر کپور سے نیچے آ گیا۔ اب ’دھریندر‘ میں وہ انیمل نما کردار ادا کر کے اپنی ہیروگری اور ساکھ بحال کرنے کی کوشش کر رہے ہیں۔
ٹریلر میں سیاسی علامات بھی شامل ہیں، جن میں پاکستان پیپلز پارٹی (پی پی پی) کے جلسوں کے مناظر، سابق وزیراعظم بے نظیر بھٹو کی تصاویر اور پارٹی کے پرچم دکھائے گئے ہیں۔
کچھ عرصہ قبل فلم کی عکس بندی کے دوران پروڈکشن کے 100 سے زائد افراد کو بدہضمی ہوئی تھی۔
معروف بھارتی یوٹیوبر دھروو راٹھی نے کہا ہے کہ بالی وُڈ نے اس ٹریلر کے ساتھ ہر حد پار کر دی۔ انہوں نے سوشل میڈیا پر سوال کیا کہ تشدد، خونریزی اور اذیت کو تفریح کیسے کہا جا سکتا ہے؟
ہدایت کار پر تنقید کرتے ہوئے دھروو نے کہا کہ اس کی دولت کی ہوس اتنی بڑھ گئی ہے کہ وہ نوجوان نسل کے ذہن زہر آلود کرنے پر تلا ہوا ہے، اور سینسر بورڈ سے سوال کیا کہ کسی سے محبت کا اظہار، لوگوں کی زندہ کھال اُتارنے سے بڑا مسئلہ ہے؟
