بھارت کی 60 ارب ڈالر کی بالی وڈ فلمی صنعت اس وقت سنگین اعتماد کے بحران سے گزر رہی ہے۔ شائقین اور ناظرین کا کہنا ہے کہ فلموں کے ریویوز اور باکس آفس کے اعدادوشمار میں مبالغہ آرائی نے عوامی رائے پر منفی اثر ڈالا ہے اور ٹکٹ کی فروخت متاثر ہو رہی ہے۔
صنعت کے تجربہ کار ماہرین کے مطابق بالی وڈ کی موجودہ مشکلات خود ساختہ ہیں۔ ان کا کہنا ہے کہ بعض فلموں کو ریلیز ہونے سے پہلے ہی کامیاب قرار دینا اور باکس آفس کے اعدادوشمار میں غیر حقیقی اضافہ کرنا بنیادی مسائل میں شامل ہیں۔
تجزیہ کار راج بنسال کا کہنا ہے کہ اب ناظرین ابتدائی تعریفوں پر شک کرنے لگے ہیں اور میڈیا کی جانب سے فلموں کی درجہ بندی پر بھروسہ کم ہو گیا ہے۔ اس کے نتیجے میں، لوگ سینما جانے سے پہلے حقیقی رپورٹس اور اصل کارکردگی کا انتظار کرنے پر مجبور ہیں، جس سے باکس آفس کی آمدنی پر منفی اثر پڑ رہا ہے۔
