امریکی ریاست اوکلاہوما میں عدالت نے ٹریفک قوانین کی خلاف ورزی پر جرمانوں کے بجائے غذا عطیہ کرنے کی شرط عائد کر دی۔
غیر ملکی خبر رساں ایجنسی کے مطابق اوکلاہوما کی میونسپل کورٹ اور لائبریری نے ٹریفک قوانی کی خلاف ورزی اور کتابیں تاخیر سے واپس کرنے انوکھی شرط رکھی دی۔
فیصلے میں کہا گیا کہ تھینکس گیونگ آنے سے قبل اوکلاہوما کے شہر چپکاشا کے شہری میونسپل کورٹ میں غذا کی صورت میں اپنے جرمانے جمع کرا سکتے ہیں۔ جس کے بدلے ان کے جرمانے مکمل طور پر ختم یا ان میں کمی ہو سکتی ہے۔
میونسپل کورٹ نے حکم دیا کہ جمع کرائی جانے والی غذا وہ ہونی چاہیے جو جلد خراب نہ ہو۔ اور یہ کھانے کی اشیا لازمی طور پر وہ افراد ہی عدالت میں جمع کرا سکتے ہیں جن پر جرمانہ عائد کیا گیا ہو گا۔ تاکہ کریڈٹ موصول ہو سکے۔
انتظامیہ کی جانب سے اعلان کیا گیا کہ اس پیشکش سے متعلق تفصیلات ویب سائٹ پر بھی جاری کر دی گئی ہیں۔ جس میں کہا گیا کہ جلد خراب نہ ہونے والے ہر کھانے پر 10 ڈالر تک جرمانے میں کمی کی جائے گی۔ تاہم اس سہولت سے ایک فرد کے زیادہ سے زیادہ 100 ڈالر مالیت کے جرمانے ختم ہو سکتے ہیں۔
