ویسٹ انڈیز کی کرکٹ ٹیم کے کپتان شے ہوپ نے نیوزی لینڈ کے خلاف میچ میں شاندار بیٹنگ کرتے ہوئے کرکٹ کی تاریخ میں منفرد ریکارڈ قائم کردیا اور ساتھ ہی ویسٹ انڈیز کی تاریخ میں بھی کئی اعزاز اپنے نام کرلیے۔
نیپئر میں نیوزی لینڈ کے خلاف سیریز کے دوسرے میچ میں ویسٹ انڈیز کی کرکٹ ٹیم کے کپتان شے ہوپ نے پہلے بیٹنگ کرتے ہوئے برق رفتار سنچری جڑدی اور منفرد ریکارڈ قائم کیا لیکن ویسٹ انڈیز کو اس میچ میں شکست کا سامنا کرنا پڑا۔
اُنہوں نے صرف 69 گیندوں پر 13 چوکوں اور 4 چھکوں کی مدد سے آؤٹ ہوئے بغیر 109 رنز بنائے، جس کے باعث 34 اوورز میں ٹیم نے 9 وکٹوں پر 247 رنز بنا لئے۔
سیریز کے دوسرے میچ میں نیوزی لینڈ نے ویسٹ انڈیز کو 3 گیندیں قبل 248 رنز بنا کر ہدف حاصل کرلیا اور سیریز میں بھی فتح حاصل کرلی۔
میچ میں سنچری بنا کر شے ہوپ نے ٹیسٹ کرکٹ کھیلنے والی 11 ٹیموں سمیت تمام فل ممبرز کے خلاف ون ڈے میں سنچری بنانے کا ریکارڈ قائم کردیا، اس سے قبل یہ اعزاز سری لنکا کے سابق کپتان مہیلا جے وردھنے اور کرس گیل نے 12،12 ٹیموں کے خلاف سنچری بنا کر حاصل کیا تھا۔
ویسٹ انڈیز کے بلے باز نے 11 ٹیسٹ کھیلنے والے ممالک کے علاوہ نیدرلینڈز اور نیپال جیسی فل ممبر ٹیموں کے خلاف سنچری اسکور کی تھی، جس کے بعد وہ بین الاقوامی کرکٹ میں 13 مختلف ٹیموں کے خلاف سنچری بنانے والے پہلے بلے باز بن گئے ہیں۔
