بھارت کی بالی وڈ فلم انڈسٹری، جس کی مالیت تقریباً 60 ارب ڈالر ہے، حالیہ عرصے میں جعلی ریویوز اور مصنوعی باکس آفس کلیمز کی وجہ سے ساکھ کے شدید بحران سے دوچار ہے۔
ماہرین کے مطابق یہ رویہ نہ صرف شائقین کے اعتماد کو متاثر کر رہا ہے بلکہ سینما ٹکٹوں کی فروخت بھی نمایاں طور پر کم ہو گئی ہے۔ اس دوران اسٹریمنگ پلیٹ فارمز نے فلمی کاروبار کے منظرنامے کو بدل دیا ہے، تاہم سینئر بالی وڈ شخصیات کے مطابق انڈسٹری کی کچھ مشکلات خود ساختہ ہیں، جن میں ریلیز سے پہلے فلم کو “ہٹ” قرار دینے کا رجحان بھی شامل ہے۔
پروڈیوسر سنیل وادھوا نے اے ایف پی کو بتایا کہ بعض اوقات مخصوص ناقدین اور انفلوئنسرز کو شامل نہ کرنے پر وہ اچھی فلموں کو منفی ریویوز دیتے ہیں، اور اگر فلم کمزور ہو تو ادائیگی کے بدلے مثبت تبصرے فراہم کر دیتے ہیں۔
تجزیہ کار راج بنسل نے کہا کہ اب عوام فلمی ستاروں اور ناقدین کے ریویوز پر بھروسہ نہیں کرتے۔ میڈیا کی طرف سے دی جانے والی چار اسٹار کی ریٹنگ پر بھی شائقین شک کرتے ہیں، جس کی وجہ سے اوپننگ شوز میں ٹکٹوں کی فروخت متاثر ہوتی ہے۔
اندرونی ذرائع کے مطابق کئی انفلوئنسرز کے باقاعدہ “ریٹ کارڈ” موجود ہیں اور پروڈیوسرز ابتدائی دنوں کی کمائی بڑھانے کے لیے خود ٹکٹیں خرید لیتے ہیں۔ جئے پور کے سینما مالک سدھیر کاسلیوال نے بتایا کہ آن لائن بکنگ میں سینکڑوں ٹکٹ بک ہوتے ہیں، مگر ہال میں آدھی سے بھی کم نشستیں بھرتی ہیں، جس سے عوام کو غلط تاثر ملتا ہے۔
حالیہ تنازعات میں اکشے کمار کی فلم “اسکائی فورس” کا نام بھی شامل ہے، جس کی کمائی 60 لاکھ ڈالر سے بڑھا کر 90 لاکھ ڈالر دکھائی گئی۔ اسی طرح 2025 میں ریلیز ہونے والی فلم “ٹھمّا” کے باکس آفس اعداد و شمار پر بھی سوالات اٹھے ہیں۔
فلمی ماہرین نے خبردار کیا ہے کہ جعلی کمائی کے دعوے اور خریدے گئے ریویوز نہ صرف شائقین کے اعتماد کو نقصان پہنچا رہے ہیں بلکہ اسٹارز کے غیر حقیقی معاوضوں میں اضافہ اور نئے ٹیلنٹ کے مواقع محدود کر رہے ہیں۔
اس کے جواب میں اسٹریمنگ پلیٹ فارمز نے فلمیں خریدنے سے پہلے آڈٹ شدہ باکس آفس رپورٹس مانگنا شروع کر دی ہیں۔
اگرچہ عوامی ردعمل اور الزامات سامنے ہیں، ماہرین کا کہنا ہے کہ یہ رجحان فوری طور پر ختم ہوتا دکھائی نہیں دیتا۔ وادھوا کے مطابق یہ سلسلہ تب تک جاری رہے گا جب تک پروڈیوسرز اور اسٹوڈیوز میں ٹکٹیں خریدنے کا رجحان موجود ہے۔
