پاکستان سپر لیگ نے اپنے شاندار 10 سال پورے کر لیے ہیں اور اب یہ ایک نئی دہائی میں داخل ہو رہی ہے، جس کا آغاز نیا پرو مو جاری کرنے سے کیا گیا ہے۔ پی ایس ایل دنیا کی مقبول ترین کرکٹ لیگز میں سے ایک ہے، جہاں بین الاقوامی کرکٹرز کھیلنے کی خواہش رکھتے ہیں اور ہر سال اپنے کھیل سے شائقین کو محظوظ کرتے ہیں۔
پانچ ٹیموں سے شروع ہونے والا پی ایس ایل کا سفر چھ ٹیموں تک پہنچا، اور اب یہ مقابلہ مزید پھیلتے ہوئے چھ سے بڑھ کر آٹھ ٹیموں پر مشتمل ہونے جا رہا ہے۔ کراچی، لاہور، کوئٹہ، پشاور، اسلام آباد اور ملتان کے ساتھ ساتھ دو مزید شہروں کو بھی ٹیمیں ملیں گی۔
نئی ٹیمیں فیصل آباد، گلگت، حیدرآباد، راولپنڈی، سیالکوٹ یا مظفر آباد میں سے کسی بھی دو شہروں کی ہو سکتی ہیں۔
پاکستان کرکٹ بورڈ نے پاک–سری لنکا تیسرے ون ڈے کے دوران پی ایس ایل کا نیا پرو مو جاری کیا، جس میں 10 سالہ سفر کی کامیابیوں کو مختصر جھلکیوں کے ساتھ دکھایا گیا ہے۔
اس پرو مو کو شائقین کرکٹ کی جانب سے بہت سراہا جا رہا ہے اور اجرا کے چند گھنٹوں میں ہی ہزاروں لوگوں نے اسے دیکھ کر پسندیدگی اور اپنی رائے کا اظہار کیا ہے۔
