جنوبی کوریا کی معروف کے پاپ اسٹار ‘نانا’ نے اپنے گھر میں داخل ہونے والے حملہ آور کو اپنی والدہ کی مدد سے قابو کرلیا، واقعے میں زخمی ہونے کے بعد دونوں اسپتال میں زیرِ علاج ہیں۔
پولیس کے مطابق لگ بھگ 30 سال کی عمر کا ایک شخص قیمتی سامان چوری کرنے کی نیت سے سیئول کے مضافات میں واقع اداکارہ کے گھر میں داخل ہوا، تاہم مزاحمت پر وہ نہ صرف ناکام ہوا بلکہ گرفتار بھی ہوگیا۔
گوری پولیس اسٹیشن کے ایک تفتیشی افسر نے اے ایف پی کو بتایا کہ نانا اور ان کی والدہ نے مزاحمت کے دوران حملہ آور کو دبوچ لیا جس کے بعد اسے حراست میں لے لیا گیا۔
پولیس کے مطابق مشتبہ شخص پر سنگین ڈکیتی کے الزام میں مقدمہ درج کردیا گیا ہے۔
34 سالہ نانا اور ان کی والدہ ڈکیت سے لڑائی کے دوران شدید زخمی ہوئیں، نانا کی والدہ بے ہوش بھی ہوگئیں، جبکہ دونوں اس وقت اسپتال میں علاج اور مکمل آرام کی ضرورت کے باعث زیر نگرانی ہیں۔
نانا، جن کا اصل نام ‘ام جن آہ’ ہے، پہلے گرل گروپ آفٹر اسکول کی ذیلی یونٹ ‘اورنج کیرامل’ کا حصہ تھیں، جن کے گانے ‘کیٹی لینا’ کی میوزک ویڈیو یوٹیوب پر 38 ملین سے زائد بار دیکھی جا چکی ہے۔
بعد ازاں انہوں نے اداکاری کی جانب رخ کیا اور متعدد مشہور ڈراموں میں مرکزی کردار ادا کیے۔
